/* up Facebook

Jun 20, 2017

ஆடையில் நவீனம் சிந்தனையில் பழமை: இந்திய இளைஞர்களின் மனநிலை – அருண் பாண்டியன்


வளர்ச்சியடைந்த நாடுகளுக்கு இணையாக எல்லா நவீன வசதிகளையும் இந்திய இளைஞர்கள் கைக்கொள்கிறார்கள். ஜீன்ஸ், கூலிங் கிளாஸ், ஃபேஸ்புக் மற்றும் ட்விட்டர் என படு மார்டனாக தன்னை காட்டிக்கொள்ளும் 20 வயது இந்திய இளைஞனின் மனநிலையோ பழமைவாதங்களால் கிழடுதட்டிப் போயிருக்கிறது. இந்து தேசியம் எழுச்சி பெற்று பண்பாட்டுவாதம் மதம் வழியே இந்தியா முழுக்க வியாபித்து வரும் இந்தக் காலக்கட்டத்தில், இந்திய இளைஞர்களின் சிந்தனையில்  நவீனம் இல்லை என்று  தேசிய அளவிலான கணக்கெடுப்பு கூறுகிறது.

உடைகளுக்கும் பழக்கவழக்கங்களுக்கும்  செலவழிக்கும் நேரத்தை சிந்தனையை மேம்படுத்த செலவழிப்பதில்லை. இந்திய இளைஞர்களின் சமூகம் சார்ந்த அணுகுமுறைகள், கவலைகள், விருப்பங்கள் என்ற அடிப்படையில் எடுக்கப்பட்ட இந்த கணக்கெடுப்பு அவர்களின்  பழமைவாத சிந்தனையை வெளிப்படுத்துகிறது. 15 வயது முதல் 34 வயதிற்குட்பட்ட  6,122 இளைஞர்களிடம்  எடுக்கப்பட்ட இந்த கணக்கெடுப்பு, வளரும் சமுதாயத்தை பற்றி அறிய உதவும் கொன்ராட் அடினவ்ர் ஸ்டிஃப்டங் மற்றும் லோக்னிடி ( Konrad Adenauer Stiftung and Lokniti) மையங்களால் கடந்த ஆண்டு ஏப்ரல் முதல் மே வரையிலும் 19 மாநிலங்களில் எடுக்கப்பட்டது. இது இரண்டாம் கணக்கெடுப்பாகும், இந்தியா முழுக்க மரணதண்டனை தொடர்பான விவாதம் நடந்து கொண்டிருந்த 2007-ஆம் ஆண்டில் மரணதண்டனையை ஆதரிக்கின்றீர்களா என்று கேட்கப்பட்ட கேள்விக்கு ஆதரிக்கிறோம் என்று 49% பேர்  கருத்துத் தெரிவித்திருந்தனர். 33% பேர் மரண தண்டனை வழங்குவது வருந்தத்தக்கது, அதனை ஒழிக்கவேண்டும் என்று கூறியிருக்கிறார்கள். திரைப்படக் கலைஞர்களை மதத் தலைவர்கள் கட்டுப்படுத்துவதும் கண்காணிப்பதும் இந்திய கலைத்துறையில் சவாலாக ஒரு சங்கடமாக நீடித்து வருகிறது. அது பற்றிய கேள்வி ஒன்றுக்கு மத உணர்வுகளை காயப்படுத்தும் திரைப்படங்களை தடை செய்ய  வேண்டுமென 60% கருத்துத் தெரிவித்தனர். இதுபோன்று தடை விதிப்பதற்கு எதிராய் வெறும் 23% இளைஞர்கள் மட்டுமே எதிர்ப்பை பதிவு செய்து கருத்துச் சுதந்திரத்தை ஆதரித்தனர்.

இன்று நாடு முழுக்க விவாதத்திற்குள்ளாகியிருக்கு மாட்டிறைச்சி உண்ணும் விவகாரத்திலும், கலப்பு மணம் செய்து கொள்வது  தொடர்பாகவும் இளைஞர்களின் பார்வையை பார்ப்போம்.

மாட்டிறைச்சி உண்ணுதல்

2015 ஆம் ஆண்டு  வீட்டில் மாட்டிறைச்சி வைத்து சாப்பிட்டார் என்று பரவிய வதந்தியை அடுத்து உத்திரபிரதேசத்தைச் சார்ந்த 50  வயது அக்லக் அடித்தே கொலை செய்யப்பட்டார். அதன் பின்னர் வட இந்தியா முழுக்க மாட்டிறைச்சி உண்ணும் மக்களும், மாட்டு வணிகர்களும் தாக்கப்பட்டார்கள். 2014-ஆம் ஆண்டு மோடி ஆட்சிக்கு வந்த பின்னர் பசு பாதுகாப்பு எனும்  பெயரில் இத்தாக்குதல்கள் நடந்தேறின. உத்திரபிரதேச தேர்தல் வெற்றிக்குப் பிறகு இத்தாக்குதல் மூர்க்கமடைந்து செல்கிறது.  இந்த சர்ச்சைக்குரிய பிரச்சனை பற்றி இளைஞர்களிடம் கேட்கப்பட்டது. மாட்டிறைச்சி எடுத்துக்கொள்வது தனி மனிதனின் உணவுப் பழக்க வழக்கம், அதற்கு எதிர்ப்பு தெரிவிக்க யாருக்கும் அதிகாரமில்லை என்ற கருத்துக்கு 46% இளைஞர்களுக்கு உடன்பாடில்லை என்றனர். அதாவது மாட்டிறைச்சியை உண்ணக் கூடாது என்கிறார்கள். மாட்டிறைச்சி உண்ணுவது அவரவர் தனிப்பட்ட உரிமை என்பதை  36% பேர் மட்டுமே அதனை ஏற்றுக்கொள்கின்றனர். எனினும் அசைவத்தை உண்ணும் 40% இந்து மத இளைஞர்களுக்கும் மற்ற 90% நபர்களுக்கும் இதில் எந்த பிரச்சனையும் இல்லை. ஆனால் கணக்கெடுப்பின்படி 58% இளைஞர்கள் அசைவம் சாப்பிடுபவர்கள், 30% பேர் சைவம் சாப்பிடுபவர்கள் மற்றும் 9% பேர் முட்டையுடன் சைவ உணவு எடுத்துக்கொள்பவர்கள் என அறியப்படுகிறது.

பன்மைத் தன்மையுள்ள இந்த பழக்கவழங்கங்களை ஏற்க மறுக்கும் இந்திய இளைஞர்களின் மன நிலையே திருமண பந்தம் போன்ற உறவுக் களத்திலும் காணப்படுகிறது. திருமணம் என்ற வட்டத்துக்குள் அடங்காமல் ஒருவரையொருவர் புரிந்துகொண்டு வாழும் முறை ( live-in relationship) பற்றிய கணக்கெடுப்பில், 67% பேர் எதிர்ப்பு தெரிவித்துள்ளனர். அதேபோன்று மதம் மாற்றி திருமணம் செய்வதற்கு 45% பேர் எதிர்ப்பு தெரிவிக்கின்றனர். மதம் மாறி திருமணம் செய்வதை வெறும் 28% பேர் மட்டுமே ஆதரிக்கின்றனர்.

மேலும் பெண்களை அடிமையாக பாவிக்கும் தன்மை இளைஞர்களிடம் மண்டிப்போய் கிடக்கிறது. திருமணத்துக்குப் பிறகு கணவன் சொல்வதைதான் மனைவி கேட்கவேண்டும் என்று 51% பேர் தெரிவித்துள்ளனர். அதேபோல் திருமணமான பெண்கள் வேலைக்கு செல்வது தவறு என 41% பேர் கூறியிருக்கிறார்கள். டேட்டிங் செல்வதற்கு எதிராக 53% பேரும், காதலர் தின கொண்டாட்டங்களுக்கு எதிராக 40% பேரும் தங்கள் கருத்துகளை பதிவு செய்திருக்கின்றனர். இதில் கவனிக்கப்பட வேண்டிய விசயம் என்னவென்றால், பெரும்பான்மையான இளம் பெண்களும் இந்த பழமைவாத கருத்துகளுக்கு ஆதரவு தெரிவித்துள்ளனர்.

சாதி மறுப்பு திருமணம்

சாதிய ஆணவ கொலைகள் அதிகரித்துவரும் வேளையில், இதுபற்றி இளைஞர்களின் பார்வையை அறிவது அவசியமாகிறது. சாதி மாறி திருமணம் செய்து கொள்வது பற்றி 2007-ஆம் ஆண்டு இதே நிறுவனம் எடுத்த கருத்துக்கணிப்பில் சாதி மீறி திருமணம் செய்வதை ஆதரித்தவர்கள் 31% பேர். 2016 – இல் அது 55 % உயர்ந்திருக்கிறது. ஆதரிக்கிறவர்களில்  சாதி மறுப்புத் திருமணம் செய்து கொள்கிறவர்கள் வெறும் 4% மட்டுமே. 84% இளைஞர்கள் நிச்சயிக்கப்பட்ட திருமணம் செய்துகொள்ளும் வேளையில் 6% மட்டுமே காதல் திருமணம் நடப்பதாக அறிக்கை கூறுகிறது. அதிலும் மூன்றில் ஒரு பங்குதான் சாதி மறுப்பு திருமணம் செய்துகொள்கின்றனர். 97% நிச்சயிக்கப்பட்ட திருமணங்கள் ஒரே சாதிக்குள்தான் நடைபெறுகிறது. திருமணமாகாத இளைஞர்களில் 50% பேர் தங்கள் பெற்றோரே வாழ்க்கை துணையை தேர்ந்தெடுக்க வேண்டும் என்று விரும்புகின்றனர். 12% பேர் மட்டுமே காதல் திருமணத்தை விரும்புகிறார்கள்.

அதேபோல் தெய்வபக்தியில் இந்திய இளைஞர்களின் சதவிதம் அதிகமாகவே இருக்கிறது. 78% பேருக்கு தினம் பிரார்த்தனை செய்யும் பழக்கமும், 68% பேருக்கு மத வழிபாடு நடத்தப்படும் இடங்களுக்கு செல்லும் பழக்கமும் இருக்கிறது. ஆண், பெண் சமத்துவம் என்பதை இளைஞர்களால் சரிவர ஏற்றுக்கொள்ள முடியவில்லை. மேலும் அரசாங்க வேலைகளில் இடஒதுக்கீடுக்கு 48% பேர் ஆதரவும், 26% பேர் எதிர்ப்பும் தெரிவித்துள்ளனர். இந்த கணக்கெடுப்பின் முடிவுகள், இந்திய இளைஞர்கள் மோசமான மனநிலையில் இருப்பதை விளக்குகிறது.

வட இந்தியாவை விட சிந்தனை அளவிலும், பண்பாட்டு அளவிலும் வேறுபட்ட மாநிலங்களான தமிழகம், கேரளம் போன்ற மாநிலங்களில் இக்கருத்துக்கணிப்பு நடத்தப்பட்டதா என்ற விபரம் இதில் இல்லை.

நன்றி - http://tamilarasial.com
...மேலும்

Jun 18, 2017

கல்லறைத் தோட்டத்தின் சந்தோஷக் கணங்கள்!


அருந்ததி ராய்

முதல் நாவலை எழுதி முடித்துவிட்டு, அடுத்த நாவலைக் கொண்டு வருவதற்கு, ஒரு நாவலாசிரியருக்கு இருபது ஆண்டுகள் தேவைப்படுகின்றன என்பது வாசகருக்கு வேண்டுமானால் மலைப்பாக இருக்கலாம். நாவலாசிரியருக்கோ, ‘உள்ளுக்குள் ஒரு படைப்பு உருவாகிக்கொண்டிருக்கும் காலம்’ அது!

தான் எழுதிய முதல் நாவலுக்கே புக்கர் பரிசு கிடைக்கப் பெற்றவர் அருந்ததி ராய். அப்போது அவர் எழுத்தாளராக மட்டுமே இருந்தார். 1997-ம் ஆண்டு ‘காட் ஆஃப் ஸ்மால் திங்ஸ்’ எனும் அவரின் முதல் நாவல் வெளியானது. சரியாக 20 ஆண்டுகளுக்குப் பிறகு ‘தி மினிஸ்ட்ரி ஆஃப் அட்மோஸ்ட் ஹேப்பினஸ்’ எனும் நாவல் பெங்குவின் பதிப்பக வெளியீடாக இந்த மாதம் 6-ம் தேதி உலகெங்கும் வெளியானது.

இந்த 20 ஆண்டுகளில் அருந்ததி ராய் என்பவர் எழுத்தாளராக மட்டுமே இல்லாமல், குறிப்பாக, புனைவு எழுத்தாளராக மட்டுமே தன்னைக் கருதிக்கொள்ளாமல், நாட்டில் அவ்வப்போது நிகழும் அரசியல் நிகழ்வுகளின் அடிப்படையில், அபுனைவு எழுத்துகள் மூலமும் தன் கருத்துகளைப் பிரதிபலித்துவந்திருக்கிறார். நர்மதா அணை உள்ளிட்ட மக்களுக்கு எதிரான வளர்ச்சித் திட்டங்களை விமர்சித்தல், தூக்குத் தண்டனைக்கு எதிராகக் குரல் கொடுத்தல், மாவோயிஸ்ட்டுகளுடன் தண்டகாரண்யம் காட்டுக்குள் பயணம் செய்தல் எனப் பல்வேறு விதங்களில் தன்னை ஒரு செயற்பாட்டாளராகவும் முன்னிறுத்திக்கொண்டிருக்கிறார்.

எழுத்தாளர் என்ற நிலையிலிருந்து செயற்பாட்டாளர் என்ற நிலைக்கு அவர் வர நேர்ந்திருக்கும் இருபது ஆண்டு அனுபவங்களின் அடிப்படையில் அவர் எழுதியிருக்கிற படைப்பாகத் தான் நாம் அவரின் இரண்டாவது நாவலை அணுக வேண்டும். இந்த நாவலின் கதை, இந்தியாவின் கடந்த இருபது ஆண்டு கால வரலாற்றில் நிகழ்ந்திருக்கும் அரசியல் நிகழ்வுகளின் திரட்சியாக அமைந்திருக்கிறது. அஞ்சும் என்ற திருநங்கை, காஷ்மீர் பிரிவினைவாதியைக் காதலித்துத் திருமணம் செய்துகொண்ட திலோத்தமா, காவல்துறையின் வன்புணர்வால் பிறந்த தன் மகளை டெல்லி ஜந்தர் மந்தர் பகுதியில் விட்டுச்செல்லும் ரேவதி எனும் மாவோயிஸ்ட் போராளி ஆகிய மூன்று பெண்களின் பார்வையில் கதை சொல்லப்படுகிறது.

அஞ்சும் தனது வாழ்க்கையை நேர்க்கோட்டில் சொல்லிச் செல்ல, திலோத்தமாவின் வாழ்க்கையோ முன்னும் பின்னுமாகச் சொல்லப்படுகிறது. ரேவதியின் வாழ்க்கையோ கடித முறையில் சொல்லப்படுகிறது. இப்படி அந்தப் பெண்களின் வாழ்க்கையைச் சொல்லும் முறையில் வித்தியாசம் காட்டியதோடு, அவர்கள் நடமாடிய இடங்களான முறையே டெல்லி, காஷ்மீர், தெலங்கானா ஆகியவற்றின் நிலப்பரப்பையும் அந்தந்தக் காலச் சூழலில் நிலவிய அரசியல் பின்னணியோடு கதையை நெய்திருப்பதில் தேர்ந்த எழுத்தாளராக வெற்றி பெற்றிருக்கிறார் ராய். நாவலாசிரியராக வெற்றி பெற்றிருக்கிறாரா என்பது, இந்த நாவல் பரவலான வாசகப் பரப்பில் என்ன மாதிரியான அதிர்வலைகளை ஏற்படுத்தப்போகிறது என்பதைப் பொறுத்து அமையும்!

இறந்தவர்களைப் புதைக்கும் கல்லறைத் தோட்டம்தான் நாவலில் முக்கியமான சம்பவங்கள் நடைபெறும் இடம். அதுதான் பல்வேறு அரசியல் சூழல்களால் பாதிக்கப்பட்ட நபர்கள் ஒன்றுகூடும் இடமாகவும், எங்கோ தொலைத்த தங்களின் சந்தோஷக் கணங்களைத் தேடிக் கண்டடைகிற இடமாகவும் இருக்கிறது. ‘மனிதர்கள் தங்களின் உண்மையான மகிழ்ச்சியை இறந்த பிறகுதான் கண்டடைகிறார்கள்’ எனும் சிந்தனையின் குறியீடா கவும் கல்லறைத் தோட்டத்தை நாம் அணுகலாம்.

அவுரங்கசீப் காலத்தில் கடவுள் இல்லை என்று சொன்ன ஹஸ்ரத் ஷர்மத் ஷாஹீத்தின் வரலாற்றைச் சொல்வதில் தொடங்கி, இந்தியப் பிரிவினை, நெருக்கடிநிலைக் காலம், இந்திரா காந்தி கொலை, சீக்கியர் மீதான தாக்குதல், போபால் விஷ வாயுத் தாக்குதல், காஷ்மீர் தீவிரவாதம், பாபர் மசூதி இடிப்பு, குஜராத் கலவரம், இரட்டைக் கோபுரத் தாக்குதல், இராக்கில் அமெரிக்கா நடத்திய போர், ஆப்பரேஷன் ‘க்ரீன் ஹன்ட்’, மாட்டு அரசியல், அண்ணா ஹசாரே போராட்டம், உனா எழுச்சி உள்ளிட்ட இந்திய, உலக அரசியல் நிகழ்வுகளை எல்லாம் நாவலின் ஆங்காங்கே வரும் ஓரிரு கதாபாத்திரங்களின் மூலம் தொட்டுச் செல்கிறார் ராய். இந்தியாவின் கடந்த இருபது ஆண்டுகால வரலாற்றை இந்த நாவலின் மூலம் ஒரு கழுகுப் பார்வை பார்த்துவிட முடியும் என்பது இந்நாவலின் சிறப்பம்சம். தமிழகத்தில் சாதியம் எப்படி வேரூன்றியிருக்கிறது என்பதற்கு முருகேசன் எனும் ராணுவ வீரர் கதாபாத்திரம் மூலமாக அருந்ததி ராய் சொல்லும் செய்தி, மிகவும் அழுத்தமான ஒன்று!

‘சில்லுசில்லாக உடைந்திருக்கிற ஒரு கதையை எப்படி மொத்தமாகச் சித்தரிப்பது? எல்லாருமாக மாறுவதன் மூலம். இல்லை. எல்லாமுமாக மாறுவதன் மூலம்!’ என்று நாவலின் பின்னட்டையில் குறிப்பிடுகிறார் அருந்ததி ராய். நாமும் அப்படி நாவலின் ஒவ்வொரு கதாபாத்திரமாக மாறும்போது, ஒவ்வொரு அரசியல் சம்பவத்திலும் தன்னைப் பொருத்திப் பார்த்துக்கொள்ளும்போது, இந்த நாவலின் முழுமையை நம்மால் உணர முடியும். 

நன்றி - தி இந்து 
...மேலும்

ஆண்களையும் மீட்க வந்த அற்புதப் பெண்



டயானாவின் தாயும் தெமிஸ்ரா தீவின் மகாராணியுமான ஹிப்போலிதா


பெண்களுக்கு ‘சூப்பர்ஹீரோ’ கதாபாத்திரங்களை அணிவித்து அழகு பார்ப்பது ஹாலிவுட் சினிமாவுக்கு ஒன்றும் புதிதல்ல. ‘சார்லி’ஸ் ஏஞ்சல்ஸ்’(Charlie’s Angles), ‘லாரா கிராஃப்ட் டாம்ப் ரைடர்’ (Lara Croft Tomb Rider), ‘கேட்வுமன்’ (Catwoman) எனப் பல படங்களைச் சொல்லலாம். ஆனால், அவை பெண்களைக் கொண்டாடும் படங்களா? உற்றுப் பார்த்தால் அவை பெண் உருவங்களுக்கு ஆண் சிந்தனையைப் போர்த்திய படங்களே. பலம் வாய்ந்தவர்களாகவும் துணிச்சல்மிக்கவர்களாகவும் பெண்களைச் சித்தரிக்கும் அதேவேளையில் அவர்களை ஈவிரக்கமற்றவர்களாவும், சுயபுத்தி இல்லாமல் ஆணால் இயக்கப்படுபவர்களாகவும், கவர்ச்சிப் பண்டங்களாகவும்தான் அவை உருவகப்படுத்தியுள்ளன.

நிச்சயமாக அவர்களிலிருந்து மாறுபட்டுத் தனித்து நிற்கிறார் ‘வொண்டர் வுமன்’ (Wonder Woman). பெண் இயக்குநரான பேட்டி ஜெக்கின்ஸ் (Patty Jenkins) இயக்கத்தில் கால் கேடட் (Gal Gadot) ‘வொண்டர் வுமன்’- ஆகத் திரையில் தோன்றியிருக்கும் இப்படம் கடந்த வாரம் வெளியானது.

அழுத்தமாகவும் ஆழமாகவும்

வன்மமும் பலவீனமும் பிடித்தாட்டும் விதமாக ஆண்களைப் படைக்கிறார் போர்க் கடவுளான ஏரிஸ் (Ares). ஏரிஸிடமிருந்து உலகை மீட்க ஆண் இனமற்ற தெமிஸ்ரா தீவை உருவாக்குகிறார் ஜீயஸ் (Zeus). உலக வரைபடத்தில் இடம்பெறாத இந்தத் தன்னந்தனி தீவில் ‘அமேசான்’ என்ற இனத்தைச் சேர்ந்த போர் வீராங்கனைகள் மட்டுமே பிறக்கிறார்கள்; வசிக்கிறார்கள். அமேசான்களின் இளவரசி டயானா.

மறுபுறம், உலகை ஆக்கிரமிக்க அபாயகரமான ஆயுதங்களைத் தயாரிக்கும் ஆராய்ச்சியில் ஈடுபட்டுவருகிறது ஜெர்மனி. அதன் சதித் திட்டங்களை முறியடிக்க பிரிட்டிஷ் படைத் தளபதியான ஸ்டீவ் முயல்கிறார். போரைத் தடுக்க யத்தனிக்கும் ஸ்டீவுடன் கைகோத்துப் போர்க் கடவுளையே அழிக்க ‘வொண்டர் வுமன்’- ஆக அவதாரம் எடுக்கிறார் டயானா. இப்படி, கிரேக்கப் புராணத்தையும், உலகப் போர் சரித்திரத்தையும் இழையோடவிட்டுப் பெண்ணியத்தை அழுத்தமாகவும் ஆழமாகவும் திரையில் விரிக்கிறது படம்.

பெண்களை ஏற்றத்தாழ்வுடன் நடத்தும் ஆணாதிக்கச் சிந்தனையைக் கேலியாகவும் தீவிரமாகவும் சாடுகிறது படம். குறிப்பாக “ஆண்களின் உலகில் எச்சரிக்கையோடு இரு. உன்னை அடையும் தகுதி அவர்களுக்குக் கிடையாது” என்பது போன்று டயானாவுக்கும் அவருடைய தாய்க்கும் இடையிலான உரையாடல் முக்கியத்துவம்வாய்ந்தது. ஸ்டீவுடன் லண்டன் செல்லும் டயானா முதன்முறையாகப் பெண்களுக்கு எதிரான பாகுபாட்டைக் கண்கூடாகப் பார்க்கிறார்.

போரைத் தடுத்து நிறுத்துவதற்கான பேச்சுவார்த்தைக் கூட்டத்தில் டயானா நிற்பதைக் கண்டு, “அமைதிக்கான பேச்சுவார்த்தையில் பெண்ணுக்கு என்ன வேலை?” என்று ஸ்டீவைத் திட்டுகிறார் ராணுவத் தலைவர். ஆயிரக்கணக்கான மொழிகள் அறிந்த அமேசான் இனப் பெண்ணான டயானாவின் அறிவைக் கண்டு, “ஒரு பெண்ணுக்கு எப்படி இவ்வளவு புத்திக்கூர்மை?” என்று பல ஆண்கள் ஆச்சரியப்படும் காட்சியும் இடம்பெறுகிறது. உடை, நடை என ஒவ்வொன்றிலும் பெண் எவ்வாறு கட்டுப்படுத்தப்படுகிறாள் என்பது கிண்டலான தொனியில் ஆங்காங்கே விமர்சிக்கப்படுகிறது.


கம்பீரமும் கருணையும்

‘நீ அற்புதமானவளாக இருக்கலாம். ஆனால் எனக்கு ஈடாக முடியாது’ என்று ஜெர்மனி படைத்தலைவர் ஆணவமாகப் பேசியதை அடுத்துக் கொல்லப்படும் காட்சியில் ஆணாதிக்கம் நொறுங்கிவிழுகிறது. குறிப்பாக, போர்க் கடவுளான ‘ஏரிஸ்’ உடன் டயானா சண்டையிடும் காட்சி பெண்ணியத்தைப் பறைசாற்றுகிறது. தன் வாள் மட்டுமே ஏரிஸை அழிக்க முடியும் என அதுவரை நம்பியிருந்த டயானாவின் வாளை ஏரிஸ் உடைத்துச் சுக்குநூறாக்குகிறான். அதன் பிறகுதான் தன்னுடைய முழுமையான பலத்தை டயானா உணர்ந்து அவனை அழிக்கிறாள். நிதர்சன வாழ்விலும் பெண்ணின் இயல்பான ஆற்றல் காலங்காலமாக மட்டுப்படுத்தப்பட்டு, அவள் தன் பேராற்றலை அறியாமல் கிடக்கிறாள். ஆனால், வாழ்வின் சில தருணங்கள் அவளுக்கே அவளை அடையாளம் காட்டிவிடுன்றன.

வழக்கமான சூப்பர்ஹீரோ படங்கள் தூக்கி நிறுத்தும் ஆண்மைப் பிம்பத்தைத் தகர்க்கும் அற்புதப் பெண்ணாக ‘வொண்டர் வுமன்’ இருக்கிறாள். ஏனென்றால், அவள் எதிரியை அழித்துத்தொழிக்க மட்டும் புறப்படவில்லை. ‘உலகில் ஆண்களுக்கிடையில் புரிந்துணர்வை உருவாக்கும் பாலமாகத் திகழ்பவர்கள் நாம்தான்’ என்கிறாள் அவள். இப்படிப் பராக்கிரமம் பொருந்தியவளாக இருக்கும் அதேநேரம் மகாகருணையும் அவளிடம் ததும்புகிறது.

ஆக்ரோஷமாகப் போரிடும்போதே உயிர்களை அழிக்க அவள் மறுக்கிறாள். அவளுடைய தாய் உள்ளம் குழந்தையைக் கண்டால் அன்பில் நிரம்பி வழிகிறது, காயமடைந்த போர் வீரர்களையும் அப்பாவி மக்களையும் கண்டு நெகிழ்கிறது. இவ்வுலகை அன்பால் காக்கவும் இயக்கவும் பிறந்தவள் பெண் என்பதை அசாத்தியமாக நிரூபிக்கிறாள் கம்பீரமும் கருணையும் கொண்ட இந்த அற்புதப் பெண்.

நன்றி - தி இந்து 



...மேலும்

Jun 12, 2017

அஞ்சுகம் : மலையக இலக்கியத்தின் முதல் பெண் ஆளுமை - மு.நித்தியானந்தன்


(கூலித் தமிழ் நூல் கட்டுரையின் இறுதியில் இணைக்கப்பட்டுள்ளது)

இந்து சனாதன மரபு பெண் ஒடுக்குமுறையைக் கருத்தியல்ரீதியிலும் யதார்த்த சமூகக் கட்டமைப்பிலும் தீவிரமாகச் செயற்படுத்திவந்திருக்கிறது. இந்து சமூக அமைப்பில் பேணப்பட்டுவந்த தேவதாசி முறை இந்தப் பெண் ஒடுக்குமுறையின் கொடூர வடிவமாகும். தமிழ்நாட்டுக் கோயில்களில் திருப் பணிக்காக அர்ப்பணிக்கப்பட்ட நடன மங்கையர்களை தேவதாசிகள் என்று வழங்குவர். பொதுவழக்கில், இவர்கள் தாசிகள், விபச்சாரிகள் என்றே கூறப் பட்டார்கள். புகழ் வாய்ந்த ஒவ்வொரு கோயிலிலும் இத்தகைய தேவமாதர்களின் படை ஒன்றிருப்பதைக் காணலாம்.

"சமய சாஸ்திரங்களின் பேராலும், கடவுளின் பேராலும் பகிரங்கரமாய் விய பிசாரம் செய்யும் பெண் சமூகம் 'புண்ணியபூமி’ என்று போற்றப்படும் இந்நாட்டில்தான் உண்டு. இதைப் போல் உலகில் வேறெங்கும் காணமுடியாது என்றே நம்புகிறேன். தேவதாசிமுறை நம்முடைய நாகரிகத்திற்கும் கலைப் பெருமைக்கும் பெருங்களங்கமாய் இருக்கிறது. இந்நாட்டில் பெண்களின் பெருமைகளைப் பற்றி வானளாவப் பேசப்படுகிறது. ஆனால், நடைமுறை வேறுவிதமாயிருக்கிறது. பெண்கள் விலங்குகளிலும் இழிவாக நடத்தப்படுகின் றனர். வியபிசாரத்திற்கென்றே ஒரு பெண் சமூகத்தைச் சிருஷ்டித்து க்கொண்டு வாழ்ந்த-வாழும் எமது ஆணுலகத்தின் மனப்பான்மையை என்னென்பது?’ என்று மூவலூர் ஆ. ராமாமிர்தத்தம்மாளின் தாஸிகள் மோச வலை அல்லது மதிபெற்ற மைனர் (1) என்ற நாவலின் முன்னுரையில் கூறுகிறார் செ. வெள்ளைத்துரைச்சி நாச்சியார்.

“தேவதாசிகள் என்று ஒரு கூட்டமே, ஆரிய பார்ப்பனர்களிடமிருந்துதான் உற்பத்தியாகி இருக்கவேண்டுமென்று நூலாசிரியர் ஒரிடத்தில் சுட்டிக்காட்டி யிருப்பது மிகவும் சிந்திக்கவேண்டிய உண்மையாகும். ஆரிய பார்ப்பனரது ரிக்வேதத்தில் கூறப்பட்டுள்ள நியோய விவாக முறையைச் சிறிது ஆராய்ந் தால், இந்நாட்டில் தங்கள் கூட்டத்தைப் பெருக்குவதற்காக மறைமுகமான பல விபசாரமுறைகளை ஆரியர் இந்நாட்டில் ஏற்படுத்திவிட்டார்கள் என்பது வெள்ளிடைமலைபோல் விளங்கா நிற்கும்’ என்று இந்நாவலின் புகழுரையில் குறிப்பிடுகிறார் திருமதி. குருசாமி குஞ்சிதம் அவர்கள்.

"ஓர் இலக்கிய சிருஷ்டி என்ற வகையில் தாசிகள் மோசவலை அல்லது மதிபெற்ற மைனர்' என்ற இந்த நாவல் பெரும் கணிப்பிற்குரியதல்ல எனினும், தாசியாகவே வாழ்ந்த தனிப்பட்ட அனுபவத்தின் அடிப்படையில் எழுதப்பட்டதால், ஒரு சமூக ஆவணம் என்ற வகையில் இது பெரும் அக்கறைக்குரிய ஒன்றாகும்’ என்கிறார் அறிஞர் கமில் ஸ்வலெபில். (2)

இழிவுபடுத்தப்பட்ட இந்தக் கணிகையர் குலத்திலிருந்து எழுந்த இலக்கிய வெளிப்பாடுகள் இன்று ஆழ்ந்த ஆராய்வுக்குள்ளாகியுள்ளன. இதன் அற்புத வெளிப்பாடாக, தஞ்சையை ஆண்ட நாயக்க மன்னனான பிரதாபசிம்மனின் அரசவையில் பெண் புலவராகவும் நடனக் கணிகையாகவும் இசைஞானமிக்க வராகவும் பிரபலம்பெற்றிருந்த முத்துப்பழனி (1730 - 1790) இயற்றிய 'ராதிகா சாந்தவனம்’ என்ற சிருங்கார ரசம் ததும்பும் தெலுங்குக் காவியம் அற்புதமான காதல் இலக்கியமாகப் பேசப்படுகிறது.

“எதுவும் வழிந்து ஒழுகிவிடாமல், விளிம்பிலே ததும்பிக்கொண்டிருக்கும் வகையில் நவரசங்களின் அற்புதமான கலவையில் உருவான இலக்கியம்’ என்று மதிப்பிடுகிறார், இக்காவியத்தை மறுமதிப்புச் செய்த கணிகை பெங்களூர் நாகரத்தினம்மாள்.

ஆண் புலவர்கள் தமது சிருஷ்டிகளை ஒரு பெண் கவிக்குச் சமர்ப்பணம் செய்வது வழக்கில்லையாயினும், அக்காலத்தில் பல்வேறு ஆண் கலைஞர்கள் தமது படைப்புகளை முத்துப்பழனிக்குச் சமர்ப்பணம் செய்துள்ளமை அவரது மேதைமையைப் புலப்படுத்துவதாகவே உள்ளது.

ஆனால், ஆந்திராவின் சமூக மறுமலர்ச்சி இயக்கத்தின் தந்தை என்று போற்றப்படுபவரும், தெலுங்கின் முன்னோடி நாவலாசிரியருமான கந்துகூரி வீரேசலிங்கம் (1848 -1919) மிகக் கடுமையான வார்த்தைகளில் முத்துப் பழனி யின் ராதிகா சாந்தவனத்தை நிராகரித்தார்.

இந்த முத்துப்பழனி ஒரு பரத்தை’ என்றும், இந்நூலின் பல பகுதிகள் ஒரு பெண்ணின் வாயிலிருந்து வந்தது ஒருபுறமிருக்க, அவற்றை ஒரு பெண் தனது செவிகளாலேயே கேட்கக்கூட உகந்தது அல்ல, சிருங்கார ரசம் என்ற போர்வை யில், ஒரு வெட்கமும் இல்லாமல், பாலியல் பற்றிய பச்சையான வர்ணனை களால் தனது கவிதைகளை நிறைத்திருக்கிறார் என்றும் அவர் எழுதினார். 'ஒரு விபசார தாசிகுலத்தில் பிறந்த ஒருவரிடமிருந்து இம்மாதிரிக் கவிதைகள் வரு வதில் ஆச்சரியப்பட எதுவுமில்லை’ என்றும் இந்த உன்னதக் கவிமேதையின் மீது தீர்ப்பெழுதினார் அவர். (3)

முத்துப்பழனியின் சிருங்காரப் பிரபந்தமான ராதிகா சாந்தவனத்தின் கவித் துவ மேன்மையை நிலைநிறுத்த பெங்களூர் நாகரத்தினம்மாள் முன்வைத்த வாதங்கள் ஆணித்தரமானவை. ஆங்கிலேயர் ஆட்சியில் முத்துப்பழனியின் காவியத்தின் மீது விதிக்கப்பட்டிருந்த தடை நீண்ட போராட்டத்தின் பின்னரே 1947இல் நீக்கப்பட்டது.

முத்துப்பழனியின் ஒரு கவிதை இது: (4)

இதழ்களில் ஈரமிடு
அவளின் இதழ்களை உன் நாவின் முனையால்
ஈரமிடு அழுந்தக்கடித்து அவளை அச்சுறுத்திவிடாதே
அவளின் கன்னங்களில்
மோஹனமாய் முத்தமிடு
உனது கூர்மையான
நகங்களால் அவளைக்
கீறிவிடாதே
அவளின் முலைகளை உனது விரல்நுனியால் தடவிவிடு
முலைகளை இறுகக்கசக்கி
அவளை அச்சுறுத்திவிடாதே
மெதுவாய் மிருதுவாய்
சம்போகம் செய்
பலவந்தப்படுத்தி அவளைப் பயமுறுத்திவிடாதே
இதெல்லாவற்றையும் உனக்குச் சொல்ல நான் ஒரு முட்டாள்
அவளைச் சந்தித்து
அவளோடு நீ காதல் போர்
நிகழ்த்தும்போது
நான் சொன்னவற்றையா
நினைத்துப்பார்க்கப்போகிறாய்
என் அன்பே
இந்துப் பாரம்பரியத்தில் கல்வியை மேற்கொள்ளவும்,நடனம், இசை போன்ற லலித கலைகளைப் பயிலவும், இலக்கியம் பயிலவும் சாதாரணப் பெண்களுக்கு

வாய்ப்புகள் இல்லாத நிலையில், கணிகையர் குலத்துப் பெண்களுக்கே இந்த வாய்ப்புகள் இருந்தன. மேட்டுக்குடியினரின் சிருங்கார சுகானுபவங்களுக்கு விருந் தளிக்கப் பிறந்த இவர்கள் லலித கலைகளைக் கற்றுத் தேர்ந்தவர்களாக விளங்க அனுமதிக்கப்பட்டிருந்தனர். சிறந்த பெண் எழுத்துக்கள் இந்தக் கணிகையர் குலத் திலிருந்தே உற்பவித்துள்ளன.

இருபதாம் நூற்றாண்டின் ஆரம்பத்தில் தமிழகத்திலிருந்து இலங்கை நோக் கிப் புலம்பெயர்ந்த மக்கள் கூட்டத்தில் தேவதாசிகளும் இசை, நடனக் கலைஞர் களும் இடம்பெற்றுள்ள கதை சுவாரஸ்யமானது. யாழ்ப்பாணத்தைச் சார்ந்த புர வலர்களினதும், கோயில் ஆதீனகர்த்தாக்களினதும் அழைப்பின்பேரில் யாழ்ப் பாணத்திலும் கொழும்பிலுமாக தேவதாசிகள் இறைப்பணிபுரிந்துவந்துள்ளனர்.

அந்தப் பாரம்பரியத்தில் "கொழும்பு நகரிலே திருக்கோயில் கொண்டெழுந் தருளியிருக்கும் பூரீ சிவகாமியம்பிகா சமேத பொன்னம்பலவாணேசுரர் திரு வடிகளுக்கடிமை பூண்ட மாது பூரீ கா. கமலாம்பிகையார் புத்திரி க. அஞ்சுகம்’ இயற்றிய, "உருத்திர கணிகையர் கதாசாரத் திரட்டு (5)  என்ற நூல் மலையக இலக்கியத்தின் உன்னதமான முன்னோடிப் பெண் ஆளுமையை வெளிப் படுத்திநிற்கிறது.

'வரலாற்று நாயகி தாசி அஞ்சுகம்’ என்று இந்நூல்பற்றிய கட்டுரை ஒன்றை சோ. சிவபாதசுந்தரம் நாழிகை (6)  இதழில் எழுதியிருக்கிறார்.

"யாழ்ப்பாணக் கலாசாரத்தின் சென்ற நூற்றாண்டு வடிவத்தின் ஓர் அம் சத்தை” இந்நூலில் காணலாம் என்று சிவபாதசுந்தரம் இக்கட்டுரையில் குறிப் பிடுகிறார்.

ஆகம, புராண இதிகாசங்களிலிருந்து தேவதாசிகள் எனப்படும் உருத்திர கணிகையர் வரலாற்றைத் தொகுத்துக் கூறும் இந்நூலில் அன்னை அஞ்சுகம் தனது ஆழ்ந்த புலமையை வெளிப்படுத்தி நிற்கிறார்.

திருக்கைலாச மலையிலே உமாதேவியாருக்குச் சேடியராயிருந்த கமலினி யின் அவதாரமாயுள்ளவரும், அரிபிரமேந்திராதி தேவர்களாலும் அறிதற்கரிய பரம்பொருளாகிய தியாகேசப்பெருமான், சுந்தரமூர்த்திசுவாமிகள் பொருட்டுத் தூதராகி எழுந்தருளும் பேறுபெற்றவருமாகிய பரவையாரும், சோமசுந்தரப் பெருமான் இரசவாதம் செய்யும்பொருட்டு எழுந்தருளும் பேறு பெற்ற பொன்னணையாரும், இவர் போன்ற பிறரும் திருவவதாரஞ் செய்த உருத்திர கணிகையர் கோத்திரச் சிறப்பை சிற்றறிவுடையளாகிய யானோ எடுத்துச் சொல்லவல்லேன்' என்று அஞ்சுகம் தனது முகவுரையில் கூறுகிறார். பரவையார், பொன்னணையார், மாணிக்கவல்லி, மானந்தை, மாணிக்கநாச்சியார், ஞான வல்லி, அருணகிரிப் பெருந்தகையாரின் தாயார், சோமி, வெள்ளையம்மாள், கூத்தாள், மாதவி, சித்திராபதி, மணிமேகலை ஆகிய கணிகையரின் வரலாற்றை அஞ்சுகம் இந்நூலில் ஆழமாக எழுதிச்செல்கிறார்.

இந்த உருத்திர கணிகையரின் வரலாற்றை எழுதுவதற்கு இவர் எடுத்தாண் டிருக்கும் இலக்கிய நூல்களின் பட்டியல் பிரமிப்பூட்டுவதாகும். சிவஞான தீபம், சிவஞான சித்தியார், சித்தாந்த சிகாமணி, இறையனாரகப்பொருள், ஆசௌசதீபிகை, திருவருட்பா ஆகிய வைதீக சித்தாந்த நூல்கள் அனைத்தையும் அஞ்சுகம் ஆளுமையோடு கையாண்டிருக்கிறார். அபத்தக் கலப்பில்லாத சுத்த வைதீகத்தில் ஆழ்ந்து தோய்ந்த அஞ்சுகம் அசுத்த வைதீகங்களுள் ஒன்றாகிய மீமாஞ்சம் என்னும் சமயத்தைக் கண்டிக்கும்போது, பின்வருமாறு கூறுகிறார்:

'மீமாஞ்சமாவது உலகமெல்லாம் அநாதிநித்திய, கர்த்தா ஒருவரில்லை; சிவன் முதலிய எல்லாரும் அநித்தர்; வேதம் அநாதி நித்தியம்; வேதத்திற் காணப்பட்ட சிவன் முதலிய சத்தங்களே பிரமம்; அச்சத்தங்கள் தம்மின் வேறாகிய தேவர்கள் அறிவிப்பன அல்ல; வேதம் விதித்த தருமங்களே இம்மை மறுமைப் பயன்களைத் தருவன. இங்ங்ணம் கூறிய ஞானமும் ஆசைவிட்டுச் செய்யும் கருமமுமாகிய இரண்டுங் கால்களாக முத்தியடையலாம், என்றிவ்வாறு கொள்ளும் சமயமேயாம். இக்கருத்தை அடக்கிய மீமாஞ்சை என்னும் நூல் சைமினியால் வேதத்தின் வழிநூலென்றே சாட்டிச் செய்யப்பட்டது.*

அஞ்சுகம் இந்நூலில் பக்கத்திற்குப் பக்கம் தனது ஆழ்ந்த சைவசித்தாந்த ஞானத்தை வெளிப்படுத்திச்செல்கிறார்.

இந்நூலாக்கத்திற்கு அஞ்சுகம் எடுத்தாண்ட 44 இலக்கிய நூல்களின் விபரம் அவரது தமிழ்ப் புலமைக்கு அரும்பெரும் சான்றாகும்.

சங்க இலக்கியங்கள், ஐம்பெருங்காவியங்கள், புராணங்கள், இராமாயண, பாரத இதிகாசங்கள் அனைத்தையும் நுணுகி ஆராய்ந்து உருத்திர கணிகையர் கதாசாரத்தை அஞ்சுகம் திரட்டித் தந்திருக்கிறார். இலங்கையின் தலைநகரான கொழும்பிலே திருக்கோயில் கொண்டெழுந்தருளியிருக்கும் பூரீ சிவகாமி அம் மையார் சமேத கொழும்பு பொன்னம்பலவாணேசுரப் பெருமானுக்கு அடிமை பூண்ட கமலாம்பிகை என்னும் எனது தாயார் எனக்குப் புத்திரப்பேறின்மையால், தமது பெண்வழிச் சந்ததி என்னோடு நின்றுவிடுமென்பதை நன்குணர்ந்து, தம் கோத்திர வரலாற்றை ஒரு புத்தகரூபமாய்ப் பிரசுரித்து வெளிப்படுத்தும்படி எனக்குப் பன்முறையுங் கட்டளையிட்டுவந்தார்’ என்று அஞ்சுகம் இந்நூலின் முகவுரையில் குறிப்பிடுகிறார்.

திருக்கண்ணமங்கை என்னும் திருப்பதியைச் சேர்ந்த அபிஷேகவல்லி என் னும் தேவதாசி மரபில் உதித்த ஆறு தலைமுறையினரின் வரலாற்றை அஞ்சுகம் இந்நூலில் விரிவாக எழுதுகிறார்.

அபிஷேகவல்லி தென்மொழி, வடமொழி, தெலுங்கு முதலிய மொழிகளைக் கற்றும், பரத சாஸ்திரத்தைப் பயின்றும், இசை பாடியும், நடனமாடியும் சிறப் புப் பெற்று, "மகாவித்துவவசி’ என்ற பட்டமும் பெற்றவர். அவரது கோத்திரத்தில் உதித்த வெள்ளையம்மாள் என்பாரும் கல்வியிற் சிறந்தவராய்த் திகழ்ந்து, பர்வதம்

என்ற புத்திரியையும், காந்தப்பர் என்ற புத்திரனையும் பெற்றார். பர்வதத்திற்குப் பிறந்த காமாட்சி என்னும் தேவதாசியே அஞ்சுகத்தின் பாட்டியாவார். காமாட்சி தனது மகளான கமலாம்பிகைக்குப் பத்து வயதில் திருப்பொட்டுத்தாரணம் என்னும் பொட்டுக்கட்டும் சடங்கை நிகழ்த்தினார். காமாட்சியார் தனது மகள் கமலாம்பிகைக்குச் சிறப்பான தமிழ்க் கல்வியையும் கற்பித்து, திருவாரூர் பரத சாஸ்திர வித்துவானாகிய மருதப்ப நட்டுவனாரிடம் ஆடற்கலையையும் பயிற்றுவித்தார்.

1850இல் யாழ்ப்பாணம் கைதடியைச் சேர்ந்த விக்கினேசுராலய தருமகர்த்தா வான காசிநாத முதலியாரின் மகன் வேலப்ப முதலியார், தமிழகத்திலுள்ள குளிக்கரைக்கு சிவக்ஷேத்திர தரிசனம் செய்யச் சென்ற வேளையில், கமலாம் பிகையின் நடனச் சிறப்பைப் பார்த்து, தமது திருக்கோயில் உற்சவத்துக்காகக் காமாட்சியையும் அவரது பதினொரு வயது மகள் கமலாம்பிகையையும் கைதடிக் குக் கொண்டுவருகிறார்.

கமலாம்பிகையும் ஆடல் பாடல்களில் சிறந்து விளங்கி, அவரது கீர்த்தி யாழ்ப்பாணம் முழுதும் பரவியது. அப்போது கொழும்பில் பிரபலம் பெற்றுத் திகழ்ந்த பொன்னம்பல முதலியாரின் திருமண வைபவத்தில் நடனமாடக் கமலாம்பிகை அழைக்கப்பட்டு, அவர் அங்கு சென்று, நடனமாடிக் கீர்த்தி பெற் றார். பின்னர், கமலாம்பிகை பிரசவத்திற்காக, தமிழ்நாட்டில் குளிக்கரைக்குத் தன் தாயாருடன் சென்று, அங்கு சந்தானவல்லி என்ற பெண் குழந்தையைப் பெற்றார். கமலாம்பிகையின் தாயார் காமாட்சியாரும் சில காலத்தின் பின் மரணமுற்றார்.

இந்நிலையில், கைதடி ஆதீனகர்த்தாக்கள் குளிக்கரையிலிருந்து மீண்டும் கம லாம்பிகையையும் அவரது மகள் சந்தானவல்லியையும் கைதடிக்கு அழைத்து வந்து, கோவில் பணிகளில் ஈடுபடுத்தினர். அங்கு வாழும் காலத்தில், கமலாம்பிகை அன்னம்மா என்ற இரண்டாவது மகவைப் பெற்றார்.

கமலாம்பிகையின் மூத்த புதல்வி சந்தானவல்லிக்கு ஆடல் பாடல்களைக் கற் பிப்பதற்கு, கமலாம்பிகையின் மைத்துனரும், பாட்டு, நட்டுவாங்கம், மிருதங் கம், தவில் முதலியவற்றிலே கீர்த்தி பெற்றவருமாகிய புன்னைவனம் நட்டுவனார் அவர்களைத் தமிழகத்தின் திருப்புகலூரினின்றும் அழைப்பித்திருந்தார். இவரது தவில் வாசிக்கும் திறமையை வியந்து, பூரீலபூரீ ஆறுமுக நாவலரின் தமைய னாரும், சிறந்த வித்துவானும் சங்கீதத்தில் வல்லுநருமாகிய பூரீலழறி பரமானந் தப் புலவர் அவர்கள் சிங்கமுகச் சீலையும் வெள்ளிக் கழியும் பரிசளித்தார்கள்.

இக்காலத்தில், கொழும்பில் சிவாலயப் பிரதிஷ்டா கும்பாபிஷேகத்திற்கு வருமாறு பொன்னம்பல முதலியார் வேண்டியதை அடுத்து, கமலாம்பிகை தமது இரு புதல்வியர்களோடும், பரத சாஸ்திர வித்துவான் புன்னைவனம் நட்டுவனா ரோடும் கொழும்பு வந்தார். கொழும்பு சிவாலயத்திலே கணிகையராகத் திகழு மாறு பொன்னம்பல முதலியார் கேட்க, அதற்கிணங்கி, கமலாம்பிகை தனது மூத்த புதல்வி சந்தானவல்லிக்கு பொட்டுக்கட்டி அவ்வாலயத்தின் கணிகையாக்கினார்.

அதன் பின் கமலாம்பிகை தமது புதல்வியருடன் கொழும்பிலேயே வசிக்க லானார்.

பின்னர், கமலாம்பிகைக்குக் குழந்தைவேல் என்ற ஆண்மகவும், அஞ்சுகம் என்ற பெண்மகவும் பிறந்தனர்.

கமலாம்பிகை தனது 73ஆவது வயதில் மரணமடைந்த பின்னர், கொழும்பு பொன்னம்பலவாணேசர் ஆலயத்தின் ஆதீனகர்த்தாவாகத் திகழ்ந்த பொன்னம் பலம் இராமநாதன் அவர்கள் அஞ்சுகத்தை ஆலயப் பணிகளில் ஈடுபடுத்தி, உதவிவந்தார்.

இந்த அஞ்சுகம்தான் தங்கள் கணிகையர் குல வரலாற்றையும், அபிஷேக வல்லியின் தலைமுறையிலிருந்து தங்களின் குலவரலாற்றையும் எழுத்தில் பதித்த அறிஞராவார்.

கமலாம்பிகையின் ஐந்தாவது புத்திரியான அஞ்சுகம், மாயூரம் பரத சாஸ் திர வித்துவான் கந்தசாமி நட்டுவனாரிடம் ஆடல் பாடல்களைக் கற்றுச் சிறந்த நர்த்தகியாகத் திகழ்ந்தார். அஞ்சுகம் 12ஆவது வயதில் பூரீபொன்னம்பலவாணே சுரர் சந்நிதியில் திருப்பொட்டுத்தாரணஞ் செய்துவைக்கப்பட்டார்.

பின்னர், யாழ்ப்பாண சங்கீத வித்துவான் பூரீ நாகலிங்கம் அவர்களிடம் இந் துஸ்தானி இசையையும், மைசூர் சமஸ்தான வித்துவான் கிருஷ்ணசாமி முத லியார், திருசிரபுரம் அழகிரிசாமி செட்டியார் ஆகியோரிடம் வாய்ப்பாட்டையும், திருநெல்வேலி சீதாராம் பாகவதரிடம் வீணையையும் பயின்றார்.

சிலகாலம் சென்றபின், கொழும்பிலுள்ள பிரபல வர்த்தகர் க. சின்னையா பிள்ளை அவர்களின் அபிமான ஸ்திரீயாயினார். அதன்பின் அஞ்சுகம் தனது 16ஆவது வயதில் வேதாரணியம் சொ. சுந்தரேசக் குருக்களிடம் சிவதீட்சை பெற்று, பின் யாழ்ப்பாணம் குழந்தைவேற்பிள்ளை உபாத்தியாயரிடம் தமிழ் இலக்கியமும் கற்றுத் திகழ்ந்தார்.

"சிறியேன் 25 வருடம் மேற்கூறிய கனவான் அவர்களின் (க. சின்னையா பிள்ளை) அபிமான ஸ்திரீயாயிருந்து வாழ்ந்த செல்வவாழ்க்கையின் அருமை பெருமையும் மனமகிழ்ச்சியும் இத்துணையதென எடுத்துச்சொல்லுந்தரத்தவன்று' என்று அஞ்சுகம் குறிக்கிறார்.

அஞ்சுகம் இயற்றிய உருத்திர கணிகையர் கதாசாரத்திரட்டு’ என்ற நூல் இருபதாம் நூற்றாண்டின் முதல் தசாப்தத்தில் ஈழத்துத் தமிழ் அறிஞர்களின் கொடுமுடிகள் எனக் கருதத்தக்க அனைத்துப் புலமையாளர்களினதும் பாராட் டைப் பெற்றமை அஞ்சுகத்தின் பெருந்தமிழ்ப் புலமைக்கு சாட்சியமாகும்.

"கருவி நூலுணர்வும், உருக்கிடும் இசைத்தமிழ் உணர்வும், சிறந்த நாடக நூலுணர்ச்சியுங்கொண்டு, தேவநற் தொண்டினில் சிறந்தே திகழும் அஞ்சுக மாது பத்திமெய் யன்புக்கருளுவார் சிவபெருமானே’ என்று சிறப்புப்பாயிரம்

வழங்குகிறார் மகாவித்துவான் மாதகல் சு. ஏரம்பையர் அவர்கள்.
கல்வியின் மிக்குள கவிஞர் புகழு
நல்லிசைப் புலமை நன்கு வாய்ந்துள்ள
கிஞ்சுக மலர்பொரூஉங் கேழ்நிறச் செவ்வா
யஞ்சுக மெனும்பெயரடைந்தமெல்லியலே!
என்று வாழ்த்துகிறார் பிரம்மபூரீசி. கணேசையர் அவர்கள்.

யாழ்ப்பாணம் நீர்வேலி சிவ.சங். சிவப்பிரகாச பண்டிதர், மயிலிட்டி பிர சித்த நொத்தாரிஸ் க. மயில்வாகனப்பிள்ளை, மகாவித்துவான் உ.ப.வே.திரு.ஸா. இராகவாசாரியார், நாகபட்டினம் வித்துவான் ஜி. சதாசிவம்பிள்ளை, யாழ் சி. மா. தியாகராச பண்டிதர் போன்ற தமிழ்ப் புலமை மரபினர் அஞ்சுகப் பண்டிதையின் இலக்கியப் பணியை மெச்சியுள்ளனர்.

இருபதாம் நூற்றாண்டு ஈழத்துத் தமிழ் வசனநடை வரலாற்றில் உருத்திர கணிகையர் கதாசாரத்திரட்டு” நூலின் வசனநடையின் மேன்மை விதந்து குறிப் பிடத்தக்கதொன்றாகும். புராண வரலாறுகளைச் செய்யுள் மூலத்தில் ஆய்ந்து, தெளிந்து சுவையான சிறப்புமிக்க உரைநடையில் வார்த்துத் தந்திருக்கும் அஞ்சு கத்தின் பணி மெச்சத்தக்கதாகும்.

தமிழகத்தின் குளிக்கரையைச் சேர்ந்த அஞ்சுகம், யாழ்ப்பாணம் கைதடியில் வளர்ந்து, கொழும்பு சிவனாலயத்தில் "பொட்டுக்கட்டிய தேவதாசியாகத் திகழ்ந்து, க. சின்னையாபிள்ளை என்ற வர்த்தகரின் அபிமான ஸ்திரீயாக வாழ்ந்து, உருத்திர கணிகையர் கதாசாரத்திரட்டு’ என்னும் அரிய இலக்கிய நூலினை ஆக்கி, தனது குலக்கோத்திரத்தின் சரித்திரத்தைப் பதிவுசெய்த வரலாற்று ஆசிரியையாகக் கெளரவம் பெறுகிறார்.

எனினும், உருத்திர கணிகையர் மரபினை முற்றுமுழுவதாக ஏற்றுக்கொண்ட அஞ்சுகம், தமது குலத்தினர் இம்மரபைத் தொடர்ந்து பேணிவர வேண்டுமென்று அழுத்தம்திருத்தமாகக் கூறியிருக்கிறார்.

“நம் குலக்கன்னிகை எப்பொழுது திருப்பொட்டணியப் பெற்றாளோ அப் பொழுதே "தேவதாசி"யெனவும், "தேவர் அடியாள்" எனவும் பெயர் பெறு கின்றாள். ஒரு நாயகனால் திருமாங்கல்யம் கட்டப்பட்ட ஒரு நாயகி, அவ னிடத்தில் எவ்வகைத் தொடர்புடையவளாகின்றாளோ, அவ்வகைத் தொடர்பை, இவள் ஈசுரனிடத்திற் கொண்டவளாகின்றாள். ஆகவே, இவள் சிவகைங்கர்யத் திற்குரியாளென்பதையே அத்திருப்பொட்டு விளக்கிநிற்கிறது. அல்லாது, பிறி தொரு விஷயத்தில் பெருநிதி சம்பாதிக்கலாம் என்பதைக் குறித்து நிற்கவில்லை.

"அங்ங்னந் திருப்பொட்டணிந்த பின், நாணமென்பதை விட்டவளாகிச் சந்நிதானங்களிலே பலசன சமூகத்தில் பாடவும் ஆடவும் தக்கவளாகின்றாள். அவ்வாறானபோது, தான் கற்ற ஆடல் பாடலாகிய வித்தையைக்கொண்டு செல் வப்பொருளைத் தேடுவதும், அப்பொருளைக்கொண்டு தானதருமங்கள் செய்வ தும், ஈசுரத்தியானஞ் செய்வதுமாகிய விஷயங்களிற் பொழுதுபோக்குவதன்றோ கல்வியறிவுக்கு அழகாகும்?

"தந்தை - தாயர், ஆண் குழந்தைகளை இளமையிலேயே கல்விகேள்விகளிற் சிறந்தவர்களாக்கிச் செல்வப்பொருள்கள் தேடும் வழியைக் கற்பிக்கின்றார்கள். அவ்வாறே, கணிகைக் கன்னியர்க்கும் இளமைதொட்டு நீதிநூல்களையும் ஆடல் பாடலையும் நன்கு கற்பித்துவைத்தால், அவை வாயிலாகப் பொருளையும் சம்பாதித்துக் கீர்த்தியையும் பெற்று நல்வாழ்வடைவரன்றோ! செந்தமிழ்க் கல்வி யிலும் ஆடல் பாடலாகிய குலவித்தையிலும் சிறந்தவர்களாகிய அஞ்சனாட்சி, சோமி, சண்முகவடிவு முதலானோர் எவ்வளவு பெருமையையும் பெருவாழ் வையும் பெருங்கீர்த்தியையும் பெற்றிருக்கின்றார்கள். இவர்களின் நிலைமையை எய்தும்படி கற்பித்துவைக்கின்ற பெற்றோரல்லவோ நற்பெற்றோர். இவர்களல் லவோ பிள்ளைகளிடத்து உள்ளீடான மெய்யன்புள்ளவர்கள். இவர்களை யன்றோ நாம் என்றும் முன்னிருத்திப் போற்றி வழிபடவேண்டும்’ என்று இந் நூலின் முடிப்புரையில் அஞ்சுகம் அம்மையார் தெரிவித்திருக்கும் கருத்துகள் கணிகையர் குலமரபைப் பேணும் அவரது தீர்க்கமான வாதத்தை வெளிப்படுத்து வனவாகும்.

இந்து சனாதன மரபை எவ்விதக் கேள்வியுமின்றிப் பரிபூரணமாக விசு வசித்து, அதனை முழுமையாக ஏற்றுக்கொண்டுவிட்ட தன்மையை அஞ்சுகம் அம்மையார் இக்கணிகையர் கதாசாரத்திரட்டிலே வெளிப்படுத்துகிறார்.

கணவன்-நாயகன் இறந்ததும், அவரோடு அவரது பத்தினியும் உடன்கட்டை ஏறுவதே உத்தம பத்தினிக்கு அழகு என்றும், அதனைக் கணிகைக்குலமும் கைக் கொண்டொழுக வேண்டும் என்றும் அஞ்சுகம் அம்மையார் பல இடங்களிலே வலியுறுத்துகிறார்.
"காதலரிறப்பிற் கனையெரிபொத்தி
யூதுலைக்குருகினுயிர்த்தகத்தடங்கா
தின்னுயிரீவ ரீயாராயி
னன்னீர்ப் பொய்கையினளியெரிபுகுவர்
னளியெரி புகா அராயினன்பரோ
டுடனுறை வாழ்க்கைக்கு நோற்றுடம்படுவர்
பத்தினிப் பெண்டிர்”
என்பது மணிமேகலை.

மேற்கூறிய இலக்கணங்கொண்டு ஒழுகாத மகளிர் சுவாலித்தெரிகின்ற கொடு நரகடைந்து துன்புறுவதென்க. அல்லதுா உம் தீயொழுக்குடையராகிய மகளிர் நாய், நரி, பேய், புலி, கூகை, பன்றி, மலப்புழு ஆகிய இழிந்த பிறப்புக்களை எய்துவரென நீதிநூல்கள் வலியுறுத்திக் கூறுகின்றன.

“அஃதன்றி, உத்தம இலக்கணமுடையராகிய கற்புடை மாதர்நாயகனிறந்தவப் பொழுதே அக்கினிப்பிரவேசத்தை வெஃகி மனாதிதிரிகரண மொருங்குற முயற் சிப்பரேல், பரிமகப் பேறடைவரென்றும், அங்ங்ணமே செய்துமுடித்தோர்

யமதூதரினின்றும் நீங்கி, கணவனோடு சுவர்க்கலோகப் பிராப்தி பெறுவரென் றும், நாயகன் மகாபாதகனாயினும் அவனோடு உடன்கட்டை ஏறினவள் கற் புடையாளெனக் கண்டவிடத்து, யமன் அவனை விடுத்தோடுவன் எனவும் கூறு கின்றன’ என்று அஞ்சுகம் மிகத் தீர்க்கமாகக் கூறுகிறார்.

கணவனுடன் அக்கினிப்பிரவேசம் செய்யாதுவிட்டால், ஏற்படக்கூடிய இழி பிறப்புகள் பயமுறுத்தக்கூடியதாயும், உடன்கட்டை ஏறிவிட்டால் சொர்க்க லோகம் போகலாம் என்று கூறுவது நியாயமற்ற வஞ்சக ஆசைவலை போன்றுமே தோன்றுகிறது.

இந்து சனாதனப் புராணப்புனைவுகளை மெய்யென்று நம்பிவிட்ட பாங்கு இந்நூலின் அனைத்துப் பக்கங்களிலும் பளிச்சிடுகிறது.

“இப்பிரபு (க. சின்னையாபிள்ளை) என்னை அபிமான ஸ்திரீயாய் மதியாது, சொந்தப் பாரியாகவே மதித்துவந்தமையால், யான் அவருக்கு முன் இவ்வுலக வாழ்வை விட்டுநீங்க வேண்டுமென்னும் பேரவாப் பூண்டிருந்தேன். சிவபெரு மான் அப்பிரபுவையே முன்னர்த் தமது திருவடியிற் சேர்த்துக்கொண்டார்’ என்று எழுதும் அஞ்சுகம், அப்பிரபு இறந்ததும், அதிர்ஷ்டவசமாக உடன் கட்டை ஏறிவிடாமல், நிதானித்து,

'ஊழிற் பெருவலி யாவுள மற்றொன்று

சூழினுந்தான் முந்துறும்’

என்ற திருக்குறள்வழி அமைதிகண்டமை நமது நற்பேறாகும்.

தேவதாசி மரபை இல்லாதொழிக்கும் புரட்சிக் குரல்கள் தமிழகத்தில் பின் னாளில் வேகம் பெற்று, அம்மரபு சட்டவிரோதமானது என்று பிரகடனப் படுத்தப்பட்டது.

ஆனால், வலிமை வாய்ந்த இந்து சனாதன மரபிற்குப் பலியாகிப்போன அஞ் சுகத்தின் தமிழ்ப் புலமை வரலாற்றில் அவருக்குத் தனித்துவமான இடத்தைத் தேடிக் கொடுத்திருக்கிறது.

இன்று புத்தெழுச்சி பெற்றுவரும் மலையக இலக்கியப் பாரம்பரியத்தின் மூத்த தலைமகளாக அன்னை அஞ்சுகம் நிலைபெறுகிறார். விளிம்புநிலை சமூ கத்தின் ஆறு தலைமுறை வரலாற்றை எழுதிவைத்துவிட்டுச் சென்ற இம் மாதரசி, வாயிழந்துபோன மலையகச் சமுதாயத்தின் உயரிய அங்கீகாரத்திற்குரிய மகத்தான இலக்கிய ஆளுமை என்பதில் எவ்வித ஐயமும் இல்லை.

உசாத்துணை
  1. மூவலூர் ஆ. ராமாமிர்த்தம்மாள். 1939. தாஸிகள் மோசவலை அல்லது மதிபெற்ற மைனர். ஈரோடு: குடி அரசுப் பதிப்பகம்.
  2.   Kamil V. Zvelebil. 1987. A Devadasi as the Author of a Tamil novel. Journal of the Institute of Asian Studies 5, 1 Sep. 1987.
  3.   Susie Tharu, K. Lalita. 1993. Women writing in India. 600 B.C. to the Early Twentieth Century. CUNY: The Feminist Press, Page 3.
  4.   Ibid, Page 118.
  5.   * க. அஞ்சுகம். 1911. உருத்திர கணிகையர் கதாசாரத் திரட்டு. கொழும்பு: மீனாம்பாள் அச்சி  " நாழிகை, ஜனவரி 1994 லண்டன்.
  6. கூலித்தமிழ் நூலிலிருந்து நன்றியுடன் மீள்பதிவு செய்யபடுகிறது.
...மேலும்

Jun 10, 2017

இலங்கையில் கட்டாய திருமணத்தால் பாதிக்கப்பட்ட முஸ்லிம் சிறுமிகள்


இலங்கையில் சட்டபூர்வ திருமண வயது 18. ஆனால், பல தசாப்த காலமாகத் தொடரும் இந்தச் சட்டத்தின் கீழ் முஸ்லிம் சிறுமிகள் முன்னதாகவே திருமணம் செய்யலாம். இந்தச் சட்டத்தை நீக்குமாறு கோரிக்கைகள் வலுத்துவரும் நிலையில், தனது விருப்பத்துக்கு மாறாக கட்டாய திருமணம் செய்து வைக்கப்பட்ட ஒரு சிறுமியை பிபிசி சிங்கள சேவையின் சரோஜ் பத்திரன சந்தித்தார்.

15 வயதாக இருக்கும் போது சாஃபாவுக்கு கட்டாய திருமணம் நடந்தது. ''பரீட்சைக்கு படிக்கும் போது ஒரு பையனுடன் எனக்கு காதல் வந்தது.'' என்று கண்ணீர் வழிய சாஃபா கூறினார்.

'' எனது பெற்றோருக்கு அது பிடிக்கவில்லை. எனது மாமாவின் இடத்துக்கு என்னை அவர்கள் அனுப்பி வைத்தார்கள். அங்கு நான் படித்துக்கொண்டிருக்கும் போது, அங்கு வழமையாக வந்து போகும் ஒருவர் என்னை திருமணம் செய்ய விரும்புவதாக எனது மாமா, மாமியிடம் கூறினார்.''

இலங்கையின் பின் தங்கிய கிராமம் ஒன்றைச் சேர்ந்த முஸ்லிமான சாஃபா அதற்கு மறுத்தார்.

தனது இடைநிலைக் கல்வியை முடித்த பிறகு தான் காதலித்த பையனையே திருமணம் செய்ய அவர் விரும்பினார்.

ஆனால், அவர் மறுத்த போதிலும் தமது நண்பருக்கு அவரை மாமாவும் மாமியும் திருமணம் செய்து வைத்தனர்.

திருமணத்துக்கு மறுத்த போது சாஃபா தாக்கப்பட்டார். தமது சொல்லை கேட்காவிட்டால் தாம் தற்கொலை செய்யப்போவதாகவும் மாமாவும் மாமியும் மிரட்டியுள்ளனர்.

''வேறு வழியில்லாததால் நான் எனது கைகளை வெட்டிக்கொண்டேன்,'' என்றார் சாஃபா. தனது சட்டைக் கையை உயர்த்தி தழும்பை காண்பித்தார். ''மாமாவின் இடத்தில் இருந்து கொஞ்சம் மாத்திரைகளையும் எடுத்து சாப்பிட்டுவிட்டேன்.''

''நான் மருத்துவமனையில் சிகிச்சை பெற்றுக்கொண்டிருந்த போது டாக்டருக்கு லஞ்சம் கொடுத்து என்னை சேலைன் பாட்டிலுடன் வெளியே கொண்டுவந்து, தனியார் மருத்துவமனைக்கு கொண்டு போனார்கள். சில நாட்களின் பின்னர் அந்த ஆளை திருமணம் செய்யுமாறு கட்டாயப்படுத்தினார்கள்.''

குழந்தையை இழந்த குழந்தை சாஃபா
தப்ப வழி ஏதும் இல்லாததால், தனது இளம் கணவனுடன் இருக்க சாஃபா முடிவு செய்தார்.

ஆனால், சாஃபா தனது ஆண் நண்பருடன் தொடர்பை நீடிப்பதாக அவர் சந்தேகித்தார்.

''அவர் தினமும் என்னை அடிப்பார்'' என்றார் சாஃபா. ''நான் கருவுற்றிருப்பதாக சொன்னபோது என்னை தூக்கி நிலத்தில் அடித்தார்.''

''தனக்கு ஒரு நாளைக்கு மாத்திரமே நான் தேவை என்றும், அது நடந்துவிட்டதால், இனி நான் தேவையில்லை என்றும் அவர் கூறினார்.''

வன்முறையால் தான் தனது குழந்தையை இழந்துவிட்டதை மருத்துவமனையிலேயே தான் அறிந்துகொண்டதாக சாஃபா கூறுகிறார்.

சாஃபா போலிஸ் நிலையத்துக்கு போனபோது அவர்கள் இவரது முறைப்பாட்டை பெரிதாக எடுக்கவில்லை.

ஒரு நாள் கிராம மசூதியில் இருந்து அழைப்பு வந்துள்ளது. அங்கு அவரது கணவர் திருமணத்தை தொடர ஒப்புக்கொண்டுள்ளார். ஆனால், சாஃபா மறுத்துவிட்டார்.

சில நாட்களின் பின்னர் தம்மோடு படுக்க எவ்வளவு பணம் வசூலிக்கிறாய் என்று கேட்டு அடையாளம் தெரியாத ஆட்களிடம் இருந்து தொலைபேசி அழைப்புக்களும் குறுஞ்செய்திகளும் வரத்தொடங்கின.

தனது கணவர் தனது படத்தையும், தொலைபேசி இலக்கத்தையும் சமூக ஊடகங்களில் பகிர்ந்திருந்த்து சாஃபாவுக்கு தெரியவந்தது. கெட்ட வார்த்தைகளில் மிரட்டிய ஆட்கள், `உன்னுடைய தொலைபேசி எண்ணை உனது கணவனிடம் இருந்து பெற்றோம்` என்று கூறியுள்ளனர்.

''இந்த அழைப்புக்கள் அனைத்தையும் நான் பதிவு செய்து வைத்துள்ளேன். அனைத்து குறுஞ்செய்திகளும் என்னிடம் இருக்கின்றன.'' என்று சொன்ன சாஃபாவால் அழுகையை கட்டுப்படுத்த முடியவில்லை. ஆனாலும் முழுக் கதையையும் சொல்வது என்று திடமாக இருந்தார்.

சாஃபா
கட்டாய திருமணம் செய்து வைக்கப்பட்ட சாஃபாவுக்கு இப்போது 16 வயது

ஒரே ஆண்டில் 14% இருந்து 22% மாக அதிகரித்த குழந்தை திருமணங்கள்
என்ன நடந்தது என்பதில் தலையிட சாஃபாவின் தந்தை விரும்பவில்லை.

இந்த கொடுமையான திருமண அனுபவத்தில் இருந்து மீள தேவையான உளநல மற்றும் சட்ட உதவியை பெற சாஃபாவின் தாயார் இப்போது அவரை சமூக நல நிலையத்துக்கு அழைத்துச் சென்றார்.

உளநல சிகிச்சையை பெறுவதற்கு இலங்கையில் இருக்கும் மனத்தடை காரணமாக அவர்கள் ரகசியமாகவே அந்த நிலையத்துக்கு வந்தார்கள்.
கிராமத்தில் தொழிலாளியாக பணியாற்றி சாஃபாவின் தாய் தனது ஐந்து பிள்ளைகளை காப்பாற்றுகிறார்.

1990இல் தனது சொந்த ஊரில் இருந்து இவர் விடுதலைப்புலிகளால் வெளியேற்றப்பட்டார்.

'' ஒரு சம்பவத்தால்தான் நான் எனது மகளை எனது சகோதரனின் இடத்துக்கு அனுப்பினேன். அவளுக்கு இப்படி நடக்கும் என்று நான் நினைத்ததே இல்லை.'' என்றார் அவர்.

தனது மகளை கட்டாயமாக திருமணம் செய்து வைப்பதை தான் எதிர்த்ததாகவும், ஆனால், தனது சகோதரன் அதனை பொருட்படுத்தவில்லை என்றும் அவர் கூறுகிறார்.

''இது ஒரு கட்டாயக் கல்யாணம்'' என்கிறார் அவர். ''அவளது பாதுகாப்பு மற்றும் இப்போது கல்விக்காக அச்சத்தில் இருக்கிறேன்( அவரைப் பற்றி அவரது கணவர் பரப்பும் பொய்கள் காரணமாக). அவள் வகுப்புகளுக்கு போகமுடியாது. பேருந்தில்கூட அவள் போகமுடியாது. அவள் எதிர்காலமே ஸ்திரமில்லாமல் இருக்கிறது.''

ஒவ்வொரு வருடமும், இலங்கையின் முஸ்லிம் சமூகத்தை சேர்ந்த சாஃபா போன்ற நூற்றுக்கணக்கான சிறுமிகள் அவர்களது பெற்றோர் அல்லது பாதுகாவலர்களால் கட்டாயமாக திருமணம் செய்துவைக்கப்படுகிறார்கள்.

முஸ்லிம் சிறார் திருமணம் கிழக்கு மாகாணத்தில், ஒரு வருடத்துக்குள் 14% இருந்து 22% மாக அதிகரித்துள்ளதாக மனித உரிமைகள் சட்டத்தரணி எர்மிஸா திகல் கூறுகிறார். பழமைவாதம் காரணமாகவே இந்த அதிகரிப்பு.

சஃபாவுக்கு 15 வயது. ஆனால், 12 வயதான சிறுமிகள்கூட கட்டாய திருமணத்துக்கு உட்படுத்தப்பட்டதாக முஸ்லிம் குழுக்கள் ஆவணப்படுத்தியுள்ளன.
ஷரீன் சரூர்
முஸ்லிம் சமூகம் தமது சிறுமிகளை பாதுகாக்க வேண்டும் என்கிறார் ஷரீன்
இலங்கையின் பொதுச்சட்டம் சிறுவயது திருமணங்களை அனுமதிப்பதில்லை. சட்டபூர்வ திருமண வயது 18. ஆனால், ஒரு தசாப்தகால சமூகச் சட்டமான ''முஸ்லிம் திருமண மற்றும் விவாகரத்துச் சட்டம்'', பெரும்பாலும் ஆண்களை உள்ளடக்கிய முஸ்லிம் சமூக தலைவர்களே திருமண வயதை நிர்ணயிக்க அனுமதிக்கிறது.

12 வயதுக்கு குறைவான ஒரு சிறுமி திருமணம் செய்துகொள்ள இஸ்லாமிய மஜிஸ்ட்ரேட்டின் சிறப்பு அனுமதி தேவை என்ற போதிலும், குறைந்த வயதெல்லை கிடையாது.

சிறுமிகளும் அவர்களது தாய்மார்களும் மௌனத்தில் துன்பப்படுகிறார்கள். ஆனால், முல்லாக்கள் மற்றும் பழைமைவாத சமூகத்தலைவர்களின் கடுமையான அச்சுறுத்தல் இருக்கின்ற போதிலும், முஸ்லிம் திருமண மற்றும் விவாகரத்துச் சட்டத்தை திருத்த வேண்டும் என்று முஸ்லிம் பெண் செயற்பாட்டாளர்கள் வலியுறுத்துகிறார்கள்.

சிறார் திருமணம்: உண்மைகள்
•வளரும் நாடுகளை சேர்ந்த மூன்றில் ஒரு பெண் 18 வயதை எட்டு முன் திருமணம் செய்கிறார்கள்.

•சிறார் திருமணத்தை அதிக வீதத்தில் கொண்ட நாடுகள்- நைஜர்(76%), மத்திய ஆப்பிரிக்க குடியரசு(68%), சாட் (68%).

•பிராந்தியமென்ற வகையில் தெற்காசியா அதிக சிறார் திருமண வீதத்தை கொண்டது.- 17 வீதமான பெண்கள் 15 வயதில் திருமணம் செய்கிறார்கள். 45 வீதமான பெண்கள் 18 வயதில் திருமணம் செய்கிறார்கள்.

•பிராந்தியத்தில் வங்கதேசம் அதிக சிறார் திருமண வீதத்தை கொண்டது(52%), அடுத்து இந்தியா(47%), நேபாளம்(37%), ஆப்கான்(33%).

•இலங்கையில் 2 வீதத்தினர் 15 வயதிலும், 12 வீதத்தினர் 18 வயதிலும் திருமணம் செய்கிறார்கள்.

•உலகமட்டத்தில் 6 நாடுகள் தவிர்ந்த ஏனையவை குறைந்தபட்ச திருமண வயதுக்கான எல்லையை கொண்டிருக்கின்றன. ஆனால், பல நாடுகள் மத மற்றும் ஏனைய சில அடிப்படைகளில் விதி விலக்குகளை வைத்திருக்கின்றன. சில நாடுகளில் சட்டங்கள் பொருட்படுத்தப்படுவதில்லை.

ஆதாரம்: கேர்ள்ஸ், நாட் பிரைட்ஸ்; ப்யூஆய்வு மையம்

முஸ்லிம் பெண் செயற்பாட்டாளர்கள் மிரட்டப்படுகிறார்கள்?
இலங்கை தனது அரசியலமைப்பை திருத்த திட்டமிட்டுள்ளது. ஆகவே தாம் செயற்பட இதுவே தருணம் என்று செயற்பாட்டாளர்கள் கருதுகிறார்கள்.

முஸ்லிம் திருமணச் சட்டம் மற்றும் ஏனைய பாரபட்சமான சட்டங்களை திருத்துமாறு ஐநாவும், ஐரோப்பிய ஒன்றியமும் கூட அண்மையில் இலங்கை அரசை கேட்டிருந்தன.

ஆனால், எதிர்பார்ப்பு பெரிதாக இல்லை. ஏனென்றால் பத்து ஆண்டுகளுக்கு முன்னதாக முஸ்லிம் திருமண மற்ரும் விவாகரத்து சட்டத்தை ஆராய நியமிக்கப்பட்ட குழு இதுவரை ஆக்கபூர்வமாக பரிந்துரைகளை செய்யவில்லை.

மாற்றத்துக்கான கோரிக்கைகளை முஸ்லிம் குழுக்களான ஜமயத்துல் உலமா மற்றும் தவ்ஹீத் ஜமாத் ஆகியவை நீண்டகாலமாக எதிர்த்துவருகின்றன.

பரிந்துரைகள் சமூகத்துக்குள் இருந்து வரும் பட்சத்தில் முஸ்லிம் திருமண மற்றும் விவாகரத்துச் சட்டத்தில் திருத்தம் செய்ய தமது அமைப்பு தயார் என்று கூறும் தவ்ஹீத் ஜமாத்தின் தலைவரான பி.எம்.அர்சாத், ஆனால், திருமணத்துக்கான குறைந்த வயதை நிர்ணயிக்க தாம் தயாரில்லை என்றும் குறிப்பிடுகிறார்.

இஸ்லாமோ தவ்ஹீத் ஜமாத்தோ சிறார் திருமணத்தை ஆதரிக்கவில்லை என்று கூறும் அவர் ஆனால், திருமணத்துக்கு குறைந்த வயதை நிர்ணயிப்பதை தமது அமைப்பு ஏற்காது என்கிறார்.

பெண்ணுக்கு திருமணம் தேவையா என்பதுதான் திருமணத்துக்கான நிர்ணயமாக இருக்க வேண்டும் என்று கூறும் அவர், சில பெண்கள் 18 வயதுக்கு பிறகும் திருமணம் செய்ய விரும்பமாட்டார்கள் என்றும், ஒருவர் எப்போது திருமணம் செய்ய விரும்புகிறார் என்பதை அவரே முடிவு செய்ய வேண்டும் என்றும் கூறுகிறார்.

முஸ்லிம் பெண் செயற்பாட்டாளர்களை தமது அமைப்பு மிரட்டுவதாக கூறப்படுவதையும் அவர் மறுக்கிறார்.

சஃபா உதவி பெறும் உதவி நிறுவனத்தின் பணியாளர்களும் தமது அடையாளத்தை மறைக்க வேண்டியுள்ளது
சாஃபாவும் அவரது தாயும் போன அந்த நிலையம், கடந்த 3 ஆண்டுகளில் 3000 முஸ்லிம் பெண்களின் பல்வேறு விவகாரங்களை கையாண்டுள்ளது. அதில் 250 திருமண பிணக்குகளும் அடங்கும்.

'ஆண்களின் மிரட்டல்களால் தான் வீட்டில் இருந்து விலகி இருக்க வேண்டியுள்ளதாக அங்குள்ள சமூகப் பணியாளர் கூறுகிறார்.

''எனது பிள்ளைகளை பள்ளிக்கூடத்துக்கு அனுப்ப பயம்'', என்றார் அவர்.
''எனது அலுவலகத்திலேயே நான் தங்கவேண்டியுள்ளது. ஒரு ஆட்டோவில் போகவும் பயம்.'' என்கிறார் அவர்.

தனது முக அடையாளத்தை வெளிக்காட்ட பயப்படாத சில முஸ்லிம் செயற்பாட்டாளர்களில் பெண்கள் செயற்பாட்டு வலையமைப்பின் ஷரீன் அப்துல் சரூர் ஒருவர்.

சிறார் திருமணத்தை ஒரு சட்டரீதியான பாலியல் பலாத்காரம் என்று கூறும் அவர், இன, மத, தேச வேறுபாடின்றி அனைவருக்கும் 18 வயதே சட்டபூர்வ திருமண வயதாக இருக்க வேண்டும் என்று அவர் கூறுகிறார்.

உறுதியுடன் இருக்கும்சாஃபா
இன்னுமொரு குழந்தையை பெற்றெடுக்க ஒரு சிறுமி உடல் ரீதியாக பக்குவத்தை பெற்றிருக்கமாட்டாள் என்றும், அதனால், அவளது கல்வியும் பாதிக்கப்படும் என்றும் அவர் கூறுகிறார்.

இந்த சிறுமிகள் திருமணம் செய்வது அனைத்து சமூகத்தையும் பாதிக்கிறது என்றும் மொத்த சமூகமே இதனால் பின் தங்குகிறது என்றும் அவர் குறிப்பிடுகிறார்.

இந்த சிறார்களின் குழந்தை பிராயத்தை நிர்மூலம் செய்யாதீர்கள் என்பதுதான், முஸ்லிம் சமூகத்துக்கும், மத தலைவர்களுக்குமான எனது செய்தி என்கிறார் ஷரீன் சரூர்.

தான் சந்தித்த இந்தச் சோகமான அனுபவத்துக்கு மத்தியிலும் சாஃபா ஒரு சிறந்த மாணவி. கல்வியை மீண்டும் தொடங்க அவர் விடாப்பிடியாக இருக்கிறார்.

அவருக்கு நல்ல வேலை கிடைக்கும் என்று அவரது குடும்பம் எதிர்பார்க்கிறது. ஆனாலும், அவருக்கு இன்னமும் நிறைய சவால்கள் இருக்கின்றன.

''நான் டியூசன் வகுப்புக்கு போகும்போது வரும் பையன்கள் என்னிடம் வந்து விரசமான நகைச்சுவைகளை கூறுகிறார்கள். இது மோசமான சித்ரவதை. என்ன செய்வது என்று எனக்கு தெரியவில்லை'' என்கிறார் அவர்.

ஆனால், இதற்கெல்லாம் மசிந்துபோக அவர் தயாரில்லை. தான் ஒரு சட்டத்தரணியாக வரவேண்டும் என்கிறார்.

உன்னைப்போல் பாதிக்கப்பட்ட ஏனையவர்களுக்கு உதவ விரும்புகிறாயா என்று கேட்டதற்கு ''ஆம்'' என்கிறார்.

அவரது சிரித்த முகத்தில் அவரது உறுதி தெரிகிறது.
(*சாஃபா பெயர் மாற்றப்பட்டுள்ளது).

நன்றி - பி.பி.சி
...மேலும்

பெண்ணியம் vimeo சேனல்

பெண் நிலை - வீடியோக்கள்