/* up Facebook

May 28, 2017

வடக்கில் 58.121 பெண்களின் தலைமையில் குடும்பங்கள் - சுகந்தி


வடக்கு மாகாணத்தில் மாத்திரம் 58.121 பெண்கள் தமது வீடுகளில் தலைமைப் பாத்திரம் வகித்து குடும்பங்களை கவனித்து வருவதாக “வீட்டு வரவு செலவு பற்றிய ஆய்வறிக்கை” தகவல் வெளியிட்டுள்ளது. அரசாங்க புள்ளிவிபரவியல் திணைக்களத்தினால் வெளியிடப்பட்ட 2012-2013 க்கான அறிக்கை அதற்கடுத்ததடுத்த ஆண்டுகளிலேயே வெளியிடப்பட்டன. அப்படி வெளியான அறிக்கையிலேயே இந்த விபரங்கள் பல வெளியாகியுள்ளன. ஆனாலும் உத்தியோகபூர்வ தவல்களை விட மோசமாகவே இந்த நிலை இருக்கக் வாய்ப்பிருப்பதாக கருதப்படுகிறது.

யுத்தத்தின் காரணமாக வடக்கு கிழக்கு பகுதிகளில்  கணவரை இழந்தவர்களின் தொகை 90,000 என்று கருதப்படுகிறது. அதைவிட காணாமல் போனவர்கள், ஊடமுற்றவர்கள், நாட்டை விட்டு தப்பிச் சென்றவர்கள் என வீட்டின் பிரதான பாத்திரம் வகித்து வந்த ஆண்களின் துணை அல்லாத குடும்பங்களும் ஏராளம்.

யுத்தத்தில் கணவரை இழந்தவர்கள் அதிகமாக வாழும் மாவட்டமாக மட்டக்களப்பே இருந்து வருகிறது.

கணவரை இழந்தவர்கள்:
இலங்கையில் பெண்களின் பொறுப்பில்/தலைமையில் இருக்கும் வீடுகளில் 50% வீதமானோர் கவரை இழந்தவர்கள் ஆவர். இயற்கை மரணம், தற்கொலை, யுத்தத்தில் கொல்லப்பட்ட போன்ற காரணங்களால் ஆண்கள் அற்றுப்போன வீடுகளை அப்படிக் குறிப்பிடலாம்.

திருமணமானோர்
பெண் தலைமையில் உள்ள 30% பெண்கள் திருமணமானோராவர். ஆண்கள் உழைப்புக்காக நாடு கடந்து சென்றவர்கள், காணாமல் போன ஆண்கள், நோயுற்ற ஆண்கள், பொறுப்பற்ற ஆண்கள் ஆகியோரின் துணைவிகளால் இந்த 30 வீத தலைமை கொடுக்கப்படுகின்றது.

பிரிந்துவாழ்பவர்கள் / விவாகரத்து ஆனவர்கள்
இவர்கள் குடும்ப பெண் தலைமையில் 15% வீதத்தினராக உள்ளனர்.

திருமானவர்கள் / தனித்து வாழ்பவர்கள்
இவர்கள் குடும்ப பெண் தலைமையில் 4% வீதத்தினராக காணப்படுகின்றனர்.

இதில் கவலைகொள்ள வேண்டிய இன்னொரு பக்கம் என்னவென்றால் இவர்களில் 35% வீதத்தினர் மாத்திரமே ஏதோ ஒரு தொழிலில் ஈடுபட்டு வருகின்றனர் என்கிற அதிர்ச்சித் தகவல்.

மலையகப் பகுதிகளில் பெண் தலைமையில் உள்ள குடும்பங்களில் 52% வீதத்தினர் தொழிலில் ஈடுபடுபவர்களாக இருந்தபோதும் அவர்களின் வருமான நிலை ஆகக் கீழ் மட்டத்தில் இருப்பதையும் இந்த புள்ளிவிபரங்களில் இருந்து அறிய முடிகிறது.

இதைவிட பெண் தலைமை வகிக்கும் 22% வீதமானோர் தொழில் புரியும் வயதையும் தாண்டிய முதியோர் என்பதும் கவனிக்கப்பட வேண்டியது.

இந்த நிலைமையை கருத்திற்கொண்டு சீர் செய்வதற்காக ஐக்கிய நாடுகள் சபையின் அனுசரணையும் ஆதரவும் கிடைக்கவிருப்பதாக அறியக் கிடைக்கிற போதும் இது எந்தளவு உரியவர்களுக்கு போய் சேரப் போகிறது என்பது குறித்த விசனங்கள் ஏற்கெனவே எழ ஆரம்பித்துள்ளன. இதற்கு முன்னரான நிவாரணங்கள் இறுதியில் சென்றடைவதில் காணப்பட்ட அசமத்துவமும், பாரபட்சங்களும், கவனயீனங்களும் இந்த விடயத்திலும் நிகழ்ந்து விடக்கூடாது என்பதே சம்பந்தப்பட்டவர்களின் அவா.

நிவாரண நடவடிக்கைகளுக்கு அப்பால் இந்த நிலைமை இனித் தோன்றாது பார்த்துக்கொள்வதற்கான கொள்கைவகுப்பும், நடைமுறை செயற்திட்டங்களுமே அதிகம் அவசியப்படுகின்றன.

நன்றி - தினகரன்

0 comments:

Post a Comment

பெண்ணியம் vimeo சேனல்

பெண் நிலை - வீடியோக்கள்