/* up Facebook

Aug 25, 2016

என் கதை – கமலாதாஸ்


மலையாளத்தில் பிரபல்யமான எழுத்தாளரான கமலாதாஸின் என் கதை சுயசரிதை பெண் படைப்பாளிகளால் எழுதப்பட்ட சுயசரிதைகளில் மிக முக்கியமான சுய சரிதை நூல். காலச்சுவடு பதிப்பகத்தினரால் வெளியிடப்பட்டுள்ளது. முன்னர் குமுதம் இதழிலும் வெளிவந்ததாக தெரிகின்றது. குமுதம் பொதுவாகவே இது போன்ற சுயசரிதைகளை தங்களது வணிக லாபங்களுக்காக பாலியல் பண்டங்களாக மாற்றிவிடுவார்கள். 

குடும்பம் என்ற அமைப்பினுள் இருந்தவாறே தனது வாழ்க்கையின் உன்னதங்களை பதிவாக்கியுள்ளார். குடும்பம் என்ற அமைப்பை ஒரு அனுதாபத்துடனேயே பார்க்கின்றார். “நான் நோயுற்ற சமயத்தில் என் கணவருக்கும் எனக்குமிடையில் உடல் சார்ந்த நெருக்கம் உருவானது” “உடல் சார்ந்த அந்தப் பாசத்தை அன்புக்கு ஈடாக பெற்றுக் கொண்டேன்” என்கின்றார். குடும்ப முறையில் உள்ள ஆணாதிக்க வெளிப்பாட்டை பிறிதொரு இடத்தில் வெகு அழகாக வெளிப்படுத்துகின்றார் “ எளது உடலுக்கு மிதமிஞ்சிய சுதந்திரத்தை கொடுத்து அனுமதித்து விட்டு ரகசியமான முறையில் என் கணவர் என் ஆத்மாவைச் சிறைப்படுத்தினார்” “ வேறோர் ஆணின் விரல் அடையாளங்கள் பதிந்த கைகளுடன் வீட்டுக்குத் திரும்பி வரும்போது தாஸேட்டன் (கணவன்) என்னை மூர்க்கமாக கட்டியணைப்பார்”. தனது கணவனுடான முதல் உறவு மூர்;க்கமானது;, அந்த உடலுறவு எனக்கு அதிர்ச்சியையும், தொந்தரவையும் தந்தது என நினைவு கூறுகின்றார்.

தனது வாழ்க்கையில் சந்தித்த மனிதர்களுடான உறவையும் வெகு வெளிப்படையாகவும், இயல்பாகவும் அதே சமயம் எந்த வித குற்றயுணர்வுமின்றி வெளிப்படுத்தியுள்ளமை அவரது சிறப்பாகும். கார்லோவுடனான தனது உறவினை வெளிப்படுத்தும் விதமே தனித்துவமானது “ கார்லோவுடன் செலவழித்த நேரங்களில் நான் கமலாவாக இருக்கவில்லை. நான் வேறொருத்தியாக மாறினேன். எனது பிறப்பின் வேறோர் இதழாக மாறிவந்தது அந்த வாழ்க்கை 

தான் சிறிய வயதில் வாழ்ந்த வீட்டை “தொலை தூரத்திலிருக்கின்றபோதும் எனக்கு அன்பை அளித்தந்த வீடு” என கவிதை ஒன்றில் எழுதியுள்ளார். சுய சரிதையிலும் அவ் வீட்டிற்கு முக்கியத்துவமளித்துள்ளார்.

கமலதாசின் சுய சரிதை சர்ச்சைகளை ஏற்படுத்த காரணமாகவிருந்த முக்கிய விடயம் சமூக ஒழுக்கம். ஒழுக்கம் பற்றிய இவரது கருத்துக்கள் முக்கியமானவை. இன்றைய காலகட்டத்தில் இதன் கூறுகள் விவாதிக்கப்பட வேண்டும். பெண்கள் மீது ஏற்படுத்தப்பட்டுள்ள ஒழுக்க விதிகள் அனைத்தும் ஆணாதிக்க சமுதாயத்துக்கு சார்பானவை. கமலதாஸ் தனது சுயசரிதையில் பின்வருமாறு கூறுகின்றார் “அழியக்கூடிய மனித உடலே இந்த ஒழுக்கத்தின் அடிக்கல். அழிவற்ற மனித ஆத்மாவில் அல்லது அதைக் கண்டறியக்கூடிய உருவாக்கப்பட வேண்டியதுதான் உன்னதமும் வணங்கத்தக்கதுமான ஒழுக்கம் என்று நம்புகிறேன்” “ஒழுக்க நெறி என்ற பெயரில் நம்மிடையே விவாதிக்கப்படுவதைப் புறக்கணிக்கவும் ஏற்க மறுக்கவும் தீர்மானித்தற்கு காரணம் உண்டு. அழுகிப் போகும் உடலே அதனுடைய அடித்தளமாகவிருந்தது. மனிதனின் மனமே உண்மையான ஒழுக்க நெறிக்கு ஆதாரமாக விளங்குகின்றது”. கமலதாஸின் ஒழுக்க நெறி பற்றிய கருத்துக்கள் ஆணாதிக்க சமூகம் பெண் உடல் மீது சுமத்தும் அடிமைச் சாசனமாகவே உள்ளன என்பதனை தெளிவுபடுத்துகின்றன. உண்மையும் அதுவே.

இவரது சுயசரிதை ஆங்கிலத்தில் வெளிவந்த காலத்தில், சோபா டி என்ற பத்தி எழுத்தாளரின் நூல்களும் வெளிவந்தன. சோபா டி யும் கமலதாஸ் எழுதிய விடயங்களையே எழுதியிருந்தார். ஆனாலும் சோபா டி க்கு எதிரான விமர்சனங்கள் ஒன்றுமே வெளிவரவில்லை என்றே கூறலாம். கமலாதாஸின் சுயசரிதை சர்ச்சையை ஏற்படுத்தியது. ஒரு பேட்டியில் அவர் இது பற்றியளித்த பதிலிது.

Now Shobha De writes about sex and nobody criticises her. When you wrote about love...
Kamaladas: Shobha De is different. Shobha De writes what probably she enjoys. I may have written about love affairs, but I have not glorified lust. There was nothing obscene about love. My love was fashioned after the love of Radha and Krishna. There is something very beautiful about love. I cannot think of it as something horrible.

இவர் தனது கதையில் அன்பைத் தேடும் ஒரு ஜீவனாகவே தென்படுகின்றார். அவரது கவிதை வரிகளே அதற்கு சாட்சியாக உள்ளது
“நான் ஒரு ஆணைச் சந்தித்தேன்இ காதலித்தேன். அவனுக்கு என்ன பெயர் வேண்டுமானாலும் வைத்துக் கொள்ளுங்கள்.

எல்லா ஆண்களையும் போல் அவன் விரும்பியது ஒரு பெண். எல்லாப் பெண்களையும் போல் நான் விரும்பியது காதல்.

அவனுக்குள் நதிகளின் தீராத தாகம்.
எனக்குள் சமுத்திரங்களின் ஓயாத ஏக்கம்”

O sea, i am fed up 
I want to be simple 
I want to be loved 
And 
If love is not to be had, 
I want to be dead, just dead - (The Suicide)

இளம் வயதில் திருமணமாகி குழந்தைகளைப் பெற்றுக் கொண்ட கமலதாஸ், தான் குழந்தைகளுடன் இணைந்து தானும் வளர்ச்சி பெற்றதாக குறிப்பிடுகின்றார். மாதவிக் குட்டி பின்னர் கமலதாசாகி பின்னாட்களில் முஸ்லீம் மதத்திற்கு மாறிய பின்னர் சுரையா என பெயரெடுக்கின்றார். மதம் இவரது வாழ்க்கையில் முக்கிய பங்களிக்கின்றது. கிருஸ்ணனின் அறிமுகத்துடன் மதம் மீதான நம்பிக்கைகளை பின்பற்றுகின்றார். இறைவனை தோழானாக பார்க்கின்றேன் என்று குறிப்பிடும் கமலதாஸ் “நாம் மூன்று உண்மைகளை மட்டுமே புரிந்து கொள்ளவேண்டியுள்ளது. கடந்த காலத்தில் பிறப்பு, நிகழ்காலத்தில் வாழ்க்கை, எதிர்காலத்தில் மரணம்” என்கின்றார். “மதமெல்லாம் எனக்கு அலுத்துப் போச்சு. இப்ப எந்த மதத்திலும் எனக்கு நம்பிக்கை இல்லை. அன்பு வைக்க சுதந்திரம் இல்லாத எந்த மதமும் எனக்கு வேணாம். மதத்தை எல்லாம் விட்டுட்டுஇ இப்போ கடவுள் மேலே முழு நம்பிக்கை வந்திருக்கு” இவரது வாழ்க்கையில் ஏற்பட்ட வலிகள் இவர் மதத்தின் மீதான பார்வையில் மாற்றங்களை ஏற்படுத்துகின்றன.

ஒரு மேலாதிக்க சமூகத்தின் மதிப்பீடுகளுடன் வாழ்ந்த கமலதாஸ் அதன் முக்கிய கூறான மதத்தை விட்டு வெளியேறவில்லை. கலாச்சார கூறுகளை உடைத்து பெண் உடலை ஆணாதிக்க சமூகம் ஒரு பண்டமாக பார்க்கும் நிலையை வெளிப்படுத்தும் கமலதாஸ், கலாச்சாரத்தின் தோற்றத்தில் பங்களிக்கும் விடயங்களையும் கவனத்திலெடுத்திருக்கலாம். 

இவரது சுயசரிதையைப் போன்றே, இவரது சிறு கதைகளும், கவிதைகளும் மிக முக்கியமானவை. இவரது எழுத்துக்கள் நிச்சயம் ஆணாதிக்க சமூகத்தில் ஆண்களின் சிந்தையை சற்றாவாது மாற்றும். பெண் எழுத்துக்களின் வலிமையை மேலும் வலுவாக்கும். 

பிற்குறிப்பு
ஜெயமோகன் இவரையும் விட்டு வைக்கவில்லை.
“கமலாவின் பிரச்சனைகளின் ஊற்றுக்கண் ஒன்றுதான். அவர் அழகி அல்ல. கறுப்பானஇ குண்டான கிட்டத்தட்ட அவலட்சணமான பெண். அழகிகளின் குடும்பத்தில் பிறக்கவும் நேரிட்டது. இந்தத் தாழ்வுணர்ச்சியில் இருந்து உருவான திரிபுபட்ட ஆளுமை அவருடையது.”
ஜெயமோகன் மேலும் சொல்கிறார்…

“தாழ்வுணர்ச்சியால் விளைந்த அணையாத காம இச்சை கொண்டிருந்தார் என அவரது சுயசரிதை மற்றும் குறிப்புகள் காட்டுகின்றன. தோற்றம் காரணமாகப் புறக்கணிக்கப்படும் பெண்ணின் ஏமாற்றப்பட்ட காமம் அது. அந்த இச்சையையே அவர் விதவிதமாக வெளிப்படுத்தினார். அல்லது அது ஒருவகை வன்மம்.”

ஜெயமோகன் போன்ற ஆணாதிக்கவாதிகளின் ஆதிக்கத்தை இவரது கருத்துக்கள் உடைக்கின்றன. கமலதாஸின் சுயசரிதை ஜெயமோகன் போன்றோரின் முகத்திரையை கிழித்துவிட்டன. அதனை தாங்க முடியாமல் கூறிய கருத்துக்களே மேலே உள்ளவை. பாவம் அந்த ஜெயமோகன்.
சுமார் 33 வருடங்களுக்கு முன்னர் நடைபெற்ற இலங்கையில் நடைபெற்ற இனக்கலவரத்தைப் பற்றிய இவரது கவிதை இங்கே பதிவாகின்றது. இதனை சுகுமாரன் மொழி பெயர்;த்துள்ளார்.
.”
ஜூலைக்குப் பிறகு ...
அந்த ஜூலைக்குப் பிறகு
கொழும்பு நகரத்தில்
தமிழர்களை வெளியில் பார்க்கவில்லை
மண்டபங்களில்
அரங்கேற்றங்கள் இருக்கவில்லை
பெண்களின் கூந்தலுக்கு வாசனை பகிர
முல்லைச்சரங்களுடன்
ஒரு பூக்காரியும் வாசலில் வரவுமில்லை.
வெருண்ட எலிகள்போல
அவர்கள் பொந்துகளில் ஒளிந்தனர்
அவர்களது உடல்களில்
எலியின் நாற்றமிருந்தது.
சாணமும் செம்பும் வெடிமருந்தும் கலந்த நாற்றம்
அவர்கள் வேட்டையாடப்பட்டவர்களாக இருந்தனர்
அவர்களது அறைகளின் . . . மாலை ஒளியில்
கதவுக்குப் பின்னால் பயந்து அரண்டு
அவர்கள் நின்றார்கள்
அவர்களது விழிவெண்மைகள்
முத்துக்கள்போல மின்னின.
இறந்தவர்களிலிருந்து
ஹிட்லர் எழுந்து வந்தான்
மீண்டும் ஒரு கைத்தட்டல்
தேவைப்படுகிறது அவனுக்கு.
வலிமையான ஆரிய ரத்தத்தைப்
புகழ்ந்து பேசுகிறான் அவன்.
அவனது
முன்னாள் நண்பர்களைக் கொல்ல
உரிமைதரும் அந்த ரத்தம்
ஒரு போதையூட்டும் பானம்.
கறுத்த திராவிடன்
மகளை அணைத்து
மடியில் கிடத்திச் சொல்கிறான்:
“கண்ணுறங்குஇ மகளே,
கண்ணுறங்கு.”

- கமலாதாஸ்
தமிழில்: சுகுமாரன்

ரதன் ரகு தனது முகநூலில் எழுதிய  குறிப்பை நன்றியுடன்  பகிர்கிறோம்

0 comments:

Post a Comment

பெண்ணியம் vimeo சேனல்

பெண் நிலை - வீடியோக்கள்