/* up Facebook

Dec 29, 2015

தமிழ் மக்கள் (ஆண்கள்) பேரவை - நளினி ரட்ணறாஜா


நாட்டின் மொத்த சனத்தொகையில் 52% பெண்களையும் மொத்த வாக்காளார்களில் 58% பெண் வாக்காளர்களையும் கொண்டுள்ள இலங்கையில், அரசியலில் பெண்கள் வகிக்க வேண்டிய பங்கின் முக்கியத்துவத்தை இன்னும்கூட ஆண் அரசியல்வாதிகளும், ஆண் அரசியல் தலைமைகளும் புரிந்து கொண்டதாகத் தெரியவில்லை. புரியாமல் இருக்கிறார்களா அல்லது புரியாத மாதிரி நடிக்கிறார்களா என்பது எனக்கு இன்னும் புதிராகவே இருக்கிறது.

தொடர்ந்து ஆறு தசாப்தங்களாக பெண்கள் வகிக்க வேண்டிய அரசியல் பாத்திரம் ஆண்களால் மறுக்கப்பட்டேதான் வந்திருக்கிறது. அத்துடன், சிறுபான்மை மக்களுக்கு சிறு நன்மையேனும் ஆண் அரசியல் தலைமையால் கிடைக்கவில்லை . இன்று பிரச்சனை தீரும், நாளை விடிவு வரும் என்று கூவிக் கூவி வாக்கு வேட்டை நடத்துவது மட்டுமே நாம் காலம் காலமாகக் காணும் யதார்த்தம்.

மாற்றுக் கட்சிகள், பேரவைகள் எனத் தினம் தினம் அரசியல் அமைப்புக்கள் உருப்பெறுகின்றன. அதற்கான காரணம் என்னவென்று அவர்களைக் கேட்டால், மக்களுடைய பிரச்சனைகளுக்குத் தாமே – இதுநாள் வரை தாம் அங்கம் வகித்த அமைப்புக்கள் அல்ல – விடிவைப் பெற்றுத் தரப்போகிறோம் என்கிறார்கள்.

அரசியல் கட்சிகள் தமது வேட்பு மனுக்களில் கூட பெண்களைச் சேர்த்து கொள்ளத் தயங்குகிறார்கள். அப்படிச் சேர்த்தாலும் கூட, ஓரிருவரை எவ்வித முக்கியத்துவமும் வழங்காமல் வெறுமனே பேருக்காக மட்டுமேதான் பட்டியலில் சேர்க்கின்றனர். இதுவே இலங்கைத்தீவில் இன்றுவரை நிலவி வரும் அரசியலாகவுள்ளது .

அண்மையில், தேசிய இனப் பிரச்சனைக்குத் தீர்வு காண்பதைப் பிரதான நோக்கமாகக் கொண்டு ஆரம்பிக்கபட்டதாகக் கூறப்படும் தமிழ் மக்கள் பேரவையில் மருந்துக்குக் கூடப் பெண்களின் பங்களிப்பு இல்லை. இந்த அமைப்பை உருவாக்கியதன் பின்னணியில் நடந்திருக்கக் கூடிய கலந்தாலோசனைகள், கருத்தாடல்களில் கூட பெண்களின் பங்களிப்பு இருந்ததாகத் தெரியவில்லை.

இந்தப் பேரவையில் ஏன் பெண்களுக்கு இடமில்லை என்று முகபுத்தகத்தில் கேட்டதற்கு அவ்வமைப்பில் அங்கத்தவராக உள்ள ஒருவர் கூறுகின்றார், ”பெண்களின் பங்களிப்புத் தேவை என்ற கோஷம் தொடக்கத்திலிருந்தே பலராலும் சுட்டிக் காட்டப்பட்டது, ஆகவே, எதிர்வரும் காலங்களில் பெண்களைச் சேர்த்துக் கொள்வோம். அதற்காக தகமையான ஆளுமைகளை, துறைசார் நிபுணர்களை தேடிக் கொண்டிருகிறோம். ஆனால், எமக்குச் செயல்பாட்டளர்கள் தேவையில்லை” என்கிறார் அவர். ஆமாம், பெண் சட்டத்தரணிகள், பீடாதிபதிகள், விரிவுரையாளர்கள் போன்றவர்களைத் தேடுங்கள். அரசியல் பதவிகளை அலங்கரிக்க அவர்களைக் கொண்டு வாருங்கள். மக்கள் மத்தியில் பணி செய்யும் செயற்பாட்டாளர்களையோ, பெண்ணியவாதிகளையோ மற்றும் மனித உரிமை ஆர்வலர்களையோ, முன்னாள் போராளிகளையோ அரசியலுக்குள் கொண்டு வந்தால் உங்களையும் உங்கள் செயற்பாடுகள், திட்டங்களைக் கேள்வி கேட்பார்கள், கண்காணிப்பார்கள், உங்கள் நடவடிக்கைகளை விமர்சனம் செய்வார்கள், நீங்கள் செய்யும் அனைத்து காரியங்களுக்கும் சலாம் போட மாட்டார்கள் என்று அஞ்சுகிறீர்களா?

உங்களுடைய பெண்களுக்கு சம சந்தர்ப்பமும், சம வாய்ப்பும், தீர்மானம் எடுக்கும் சுதந்திரமும் சமூகத்தின் சகல மட்டங்களிலும், அரசியலிலும் கொடுக்க முடியாதவர்கள் சிங்களத் தலைமைகளிடம் இருந்து தமிழ் மக்களுக்கு சமத்துவதத்தை பெற்றுத் தர முடியுமா? உங்களுக்கு அரசியலில்​பெண்களின் பங்களிப்பு பற்றிய தேவை உள்ளதெனத் தெரியாதபோது சிங்களத் தலைமைகளுக்கு எவ்வாறு தமிழ் மக்களின் பங்களிப்பு புரியப்போகிறது ?

சரியான பெண்களைத் தேடுகிறோம் என்ற கூற்று வேடிக்கையாகவும், விநோதமாகவும் உள்ளது. முப்பது வருடங்களுக்கு மேற்பட்ட போராட்ட வரலாற்றில், சகல துறைகளிலும், சகல மட்டங்களிலும், யுத்த களத்திலும், கடற்படையணியிலும், அரசியல் துறையிலும், ஆணுக்கு சமமாகப் பெண் நின்று போராடிய பூமியில் அரசியலில் என்றவுடன் மட்டும் தமக்குத் தோதான பெண்களைத் தேடுகிறார்களாம்.

துணிச்சலுடன் எதிரிக்கு முன்னின்று ஆயுதமேந்திப் போராடவும், தற்கொலை குண்டுதாரியாக தாம் கொண்ட இலட்சியத்திற்காகத் தமது உயிரை மாய்த்துக் கொள்ளவும் துணிந்து வந்த பெண்கள், அரசியல் என்றதும் உங்கள் கண்களுக்குக் காணாமல் போய் விட்டதுதான் அதிசயம்.

வெளிநாட்டுப் பயணங்கள், குளிரூட்டப்பட்ட கார்கள், செல்வாக்கு எல்லாம் கொட்டிக் கிடக்கும் சுகபோக அரசியலுக்குப் பெண்கள் தேவை இல்லை, ஆண்கள் மட்டுமே உரித்தானவர்கள் என்பதை அனைத்து அரசியல் கட்சிகளும், தமிழ் மக்கள் பிரச்சினையை முன்வைத்து ஆரம்பிக்கப்படுவதாகப் பறைசாற்றிக் கொள்ளும் அமைப்புக்களும் தெளிவாகவே வெளிப்படுத்துகின்றனர் .

போரால் உருக்குலைந்து, அனைத்து கொடுமைகளுக்கும் முகம்கொடுத்த வண்ணம், கண்ணீருடன் தம் உறவுகளைத் தேடி அலைவதெல்லாம் பெண்கள். பாலியல் தொழிலாளியாகவும், கூலித் தொழிலாளியாகவும், சுயகௌரவம் இழந்து உண்ண உணவின்றி, இருக்க இடமின்றி அன்றாடம் செத்துப் பிழைக்கிறார்கள் பெண்கள்.

தீர்மானம் எடுக்கும் சகல மட்டங்களிலும் அதற்கான அதிகாரத்தைக் கொண்டிருப்பது ஆண்களே. சமூக நலன் தொடர்பான எந்த நடவடிக்கைகளிலும், பெண்களின் பங்களிப்பின்றி தீர்வும் விடிவும் சமூகத்திற்கு எப்போதும் வராது.

கடைசியாக ஒன்றைக் கேட்கிறேன், “தமிழ் மக்கள் பேரவை“ என்ற பெயரில் உள்ள “மக்கள்” யார்? ஆண்கள் மட்டுமா? அமைப்பின் பெயரைத் “தமிழ் ஆண்கள் பேரவை” என்று மாற்றினால் மிகப் பொருத்தமாக இருக்குமன்றோ?

ஆணோ பெண்ணோ ஜனநாயக விழுமியங்களையும் நல்லாட்சியின் குணாதிசயங்களையும் மனித உரிமைகளையும், பெண் உரிமையையும் மதித்து நடக்காத, கருத்தில் கொள்ளாத எந்தக் கட்சியும் அல்லது எந்த அமைப்பும் தமிழ் மக்களின் பிரச்னைக்குத் தீர்வை பெற்றுத் தரும் என்பது தண்ணீரில் எழுதிய எழுத்தாகும்.
...மேலும்

Dec 25, 2015

போராட்டம் எதற்கானதாக இருக்க வேண்டும்?



நிர்பயாவை (ஜோதி சிங் ) தெரியாதவர்கள் இந்தியாவில் மிகக் குறைவு. நமக்கு எத்தனை பேருக்கு  சூசெட் ஜார்டனை தெரியும். இப்படி சொன்னால் ஞாபகத்திற்கு வரலாம் பார்க் ஸ்ட்ரீட் சர்வைவர்.

சூசெட் ஜார்டன், சமீபத்தில் மூளை காய்ச்சலால் பாதிக்கப்பட்டு இறந்து போன பின், அவருக்கு பாலியல் கொடுமைகள் இழைத்த குற்றவாளிகளுக்கு தண்டனை கிடைத்துள்ளது. 

தன் பெயரை மறைக்க முயன்ற ஊடகங்களுக்கும், அரசு அதிகாரிகளுக்கும் ஆணித்தரமாக ஒரு கருத்தை பதிவு செய்தார். தன் பெயர் சூசெட் என்றும், பாதிக்கப்பட்ட தான் எப்போதும் தன்னை மறைத்து வாழ விரும்பவில்லை என்றும் கூறினார். பாலியல் கொடுமை செய்பவர்கள் தான் வெட்கித் தலை குனிந்து மறைவாக வாழ வேண்டும்.

இன்றும் பாலியல் தொந்தரவுக்கு ஆளாகும் நபரை மறைத்து அவரை அமைதிப்படுத்தவே முயல்கிறது சுற்றமும் நட்பும். இது ஆண்பாலாக இருந்தாலும் சரி பெண்பாலாக இருந்தாலும் சரி. பொய்யான வரதட்சணை வழக்குகளில் சிக்கி உயிரை மாய்க்கும் ஆண்களை பற்றி நம்மில் எத்தனை பேருக்கு தெரியும். அவர்களை ஒரு புள்ளி விவரமாக கடந்து செல்வதே நம் இயல்பு.  பெயர்களை மறைப்பது பாதிக்கப்பட்டவர்களை பாதுகாக்கின்றன என்பதில் ஐயமில்லை. ஆனால் அது தவறு செய்பவர்களுக்கு கொடுக்கும் தைரியம் அதிகம்.

நிர்பயாவிற்கோ சூசெட்டுக்கோ கிடைத்திருக்கும் ஊடக வெளிச்சம் வாய்க்கபெறாத எத்தனையோ ஆயிரம் பேர் இருக்கின்றனர். அவர்களது வழக்குகள் பாதி வீட்டிலேயும், காவல் நிலையத்திலேயுமே 'முடிக்கப்பட்டு' விடுகின்றன. நீதிமன்றம் வரை செல்லும் வழக்குகள் கூட,  எந்த மாதர் சங்கத்தின் போர்க் கொடியுமில்லாமல் அமைதியாக வாய்தா வாங்கி கொண்டே இருக்கின்றன.

இவர்களை மறைத்து ஒதுக்குவது சட்டமோ அரசாங்கமோ இல்லை, சமூகம்தான். சூசெட் ஜார்டன்  ஒரு முறை உணவகத்திற்கு  சென்றபோது,  அவர் பாலியல் வன்கொடுமைக்கு ஆளாக்கப்பட்ட ஒரே காரணத்தால் அனுமதி மறுத்தனர். சூசெட் இதனால் துவண்டு விடவில்லை. அதுதான் அவரை பாலியல் கொடுமைகளால் பாதிக்கப்பட்ட அனைவருக்கும் குரல் கொடுக்க களத்திற்கு அழைத்துவந்தது.

“ நான் இரண்டு குழந்தைகளும் தாய், எனக்கு நிகழ்ந்த  வன்முறையால் நான்  அழுது கொண்டு இருந்தால் என் மகள்களை யார் பார்த்து கொள்வார்கள்?” என்றார். 'நிஜமாகவே பாதிக்கப்பட்ட பெண் எப்படி இப்படி பேச முடியும்' என அப்போதும் சமூகம் குறை கண்டுபிடிக்கதான் முனைந்தது.

சூசெட்டை போன்று தைரியமும் தன்னம்பிக்கையும் அனைவருக்கும் வந்துவிடுவது இல்லையே. அது அல்லாமல் அந்த துயரமான நிகழ்வுகளிலேயே வாழும் பலரும் உண்டு நம் சமூகத்தில். சூசெட் போராடியது தன் போன்ற பாதிக்கப்பட்டவர்களுக்கான மறுவாழ்வுக்காகதான். தான் பொறுப்பேற்க முடியாத ஒரு தவறுக்கு சமூகமும், அதிகாரிகளும் தன்னை குற்றவாளிபோல நடத்தப்படும் நிலைதான் பலருக்கும்.

சட்டங்களால் தாமதமான நியாயத்தை மட்டுமே பெற்றுத் தர முடியும். அந்த 10-15 வருடங்களுக்கு பின்,  அந்த நபரால் இழந்த வாழ்க்கையையும் சந்தோஷத்தையும் பெறுவது கடினம். இங்கேதான் சுற்றம் நட்பின் பங்கு அதிகம். அவர்களை ஒதுக்காமல் வேறுபடுத்தி பார்க்காமல் இருந்தால்தான் அவர்களால் இயல்பு வாழ்க்கைக்கு திரும்ப முடியும்.

சமீபத்தில் எடுத்த ஒரு கணக்கெடுப்பில், 'பாலியல் கொடுமைகளால் பாதிக்கப்பட்ட பெண்ணை திருமணம் செய்துகொள்வீர்களா?' என்று கேட்ட போது, முக்கால்வாசி பேரின் பதில் இல்லை என்பது வருத்தம்தான். சமூக வலைத்தளங்களில் காரசாரமான ஸ்டேட்டஸ்களை தட்டி விட்டு அடுத்த வேலையை பார்க்க செல்வது மட்டும் போதாது என்பதை உணரும்போதுதான்,  அவர்களின் மறுவாழ்வுக்கு வழி வகுக்க முடியும்.

பாலியல் வன்முறைகளில் பாதிக்கப்பட்டோருக்கும் நியாயம் கிடைக்க போராடும் நாம்,  உண்மையில் எவற்றுக்காக போராட வேண்டும்..? சமூக மாற்றத்திற்கும்,  பாதிக்கப்பட்டவர்களின் மறுவாழ்விற்கும்தானே...?! 

- ஐ.மா.கிருத்திகா 
(மாணவப்பத்திரிக்கையாளர்)

நன்றி - விகடன்



...மேலும்

மித்திரனில் இருந்து யாழ்ப்பாண இணையத்தளம் வரையான ஊடகப்பொறுக்கிகள் - விஜயகுமாரன்


தேசத்தின் முதன்மையான தமிழ்ப்பத்திரிகை என்று சொல்லிக் கொண்டு வரும் வீரகேசரி நாளிதழின் வாலான மித்திரன் தொடங்கி யாழ்ப்பாணத்தின் "பண்பாட்டை" காப்பாற்ற அவதாரம் எடுத்திருப்பதாக ஊளையிடும் இந்தப் பொறுக்கி இணையத்தளங்கள் நியூஜப்னா (New Jaffna) வரையான வரலாறு ஊடக வரலாறு அல்ல. இலங்கையின் மஞ்சள் பத்திரிகைகளின் வரலாறு. பெண்களை இழிவு செய்து பத்திரிகை விற்று பணம் சம்பாதிக்கும் வியாபாரிகளின் வரலாறு. உள்ளாடைகளை தேடி அலையும் ஊனம் பிடித்த ஆபாசப் பொறுக்கிகளின் வரலாறு.

மேற்படி வருத்தம் அல்லது கோளாறு உலக அளவில் புதிதானது அல்ல. இந்த நோய், மேற்கு நாடுகளில் அமெரிக்காவில், வலதுசாரியம் சார்ந்த கிறீஸ்தவ கொன்சர்வேட்டிசம், ஜேர்மன் அடிப்படைவாதம், அமெரிக்க கிறீஸ்தவ அடிப்படைவாதம், கத்தோலிக்க பிற்போக்குவாதம் என்ற பெயர்களால் அழைக்கப்படுவதைக் கவனித்து இருப்பீர்கள். மேற்கூறிய இந்த பழமைவாத சக்திகள் அந்தந்த நாடுகளின் சமூகத் தன்மைகேற்ப, அவரவர் சமூகத்தில், அரசியலில் ஆதிக்கத்தை செலுத்தி வருகின்றனர். இக்கும்பல்களை உள்ளார்ந்து கவனித்தால் இவர்கள், எல்லாவகையான அடிப்படை மனித உணர்வுகளுக்கும், உரிமைகளுக்கும், நியாயமான சந்தோசங்களுக்கும் எதிரானவர்களாக இருப்பதை அவதானிக்கலாம்.

உதாரணமாக, மேற்குநாடுகளில் பெண்கள் சார்ந்த அனைத்து உரிமைகளையும் மறுப்பவர்களாகவும், பெண்ணடிமைத்தனத்தை ஆதரிப்பவர்களாகவும் இவர்கள் இருப்பதைக் காணலாம். கருக்கலைப்பு, ஆடை அணிகலன் எதிர்ப்பு, சமப்பாலுறவு எதிர்ப்பு, பெண்களுக்கு அரசியல் மற்றும் தொழில்சார் நிறுவனங்களில் அதிகார மறுப்பு என இவர்களில் எதிர்ப்புகளை அடுக்கிக் கொண்டே போகலாம் என மணலை மைந்தன் முகப்புத்தகத்தில் தூயவாதிகள் என்று சொல்லிக்கொண்டு பிற்போக்கு பழமைவாதம் பேசுபவர்களைக் குறிப்பிடுவது இந்த ஊடகப்பொறுக்கிகளிற்கும் அப்படியே பொருந்துகிறது.

மிகச் சிறு வயதிலேயே சாதிவெறியர்களாலும், காவல்துறையினராலும் பாலியல் வல்லுறவுக் கொடுமைக்கு உள்ளாக்கப்பட்ட பூலான்தேவி என்ற வட இந்தியாவின் உத்தரப்பிரதேசத்தை சேர்ந்த ஏழைப்பெண்ணின் கதை மித்திரனில் தொடராக வந்தது. பூலான்தேவி மல்லா எனப்படும் படகோட்டிகளான கடற்தொழிலாளர் சமுகத்தை சேர்ந்தவர். சிறு வயதில் மணம் செய்து வைக்கப்பட்டவர். அவரது கணவரால் உடலாலும், உள்ளத்தாலும் வன்முறைக்கு உள்ளாக்கப்பட்டவர். அவரது ஊரின் ஒடுக்கும் சாதியான தாக்குர் எனப்படும் சாதிவெறியர்களின் பாலியல், சாதிக் கொடுமைகளில் இருந்து தப்புவதற்காக ஊரை விட்டு ஓடிய போது சம்பல் பள்ளத்தாக்கு கொள்ளைக்காரர்களிடம் சிக்கி அவர்களாலும் பாலியல் வன்முறைக்கு உள்ளாக்கப்பட்டார்.

இந்தப் பரிதாபத்திற்குரிய பெண்ணின் கதை மித்திரனில் வந்தது என்றதும் பூலான் தேவியின் வறுமை, பாலியல் வன்கொடுமையினல் சிதைந்து போன வாழ்க்கை என்பவற்றை எழுதினார்கள் என்று எண்ணி விடாதீர்கள். அவர்கள் பூலான் தேவிக்கு நேர்ந்த பாலியல் வன்முறையை வருணித்து எழுதினார்கள். கொள்ளைக்காரர்களிடம் சிக்கிய போது அவரிடம் பரிவு காட்டிய ஒருவனிடம் அவரிற்கு வந்த காதலை காமசூத்திரமாக எழுதினார்கள்.

தமிழ்ப்பண்பாடு அழிகிறது, தமிழரின் மானம் போகிறது என்று சொல்லிக் கொண்டு தமிழ்ப் பெண்களை இழிவுபடுத்தி இந்த இணையத்தளங்கள் கதைகள் எழுதுகின்றன. இப்போது புகைப்படத்தை போட்டு ஒரு பெண்ணின் வாழ்வை அழிக்கிறார்கள். இங்கு கவனிக்க வேண்டிய விடயம் என்னவெனில் இந்தப் பரிசுத்தமானவர்களைப் பொறுத்தவரை தமிழ்ப்பண்பாடு பெண்களால் தான் அழிக்கப்படுகிறது. பெண்களால் தான் தமிழரின் மானம் போகிறது. எந்தவொரு தார்மீக உணர்வோ, ஊடக தர்மமோ அற்ற இந்த மஞ்சள் பத்திரிகை பொறுக்கிகள் தமிழரின் வாழ்வைப் பற்றிக் கவலைப்படுகிறார்களாம்.

"இலங்கை வரலாற்றில் இப்படி ஒரு ஜனாதிபதியா" என்று மைத்திரி சிறிசேனா யாழ்ப்பாணம் போய் இடம்பெயர்ந்த மக்களை சந்தித்தது குறித்து புல்லரிச்சுப் போய் புராணம் பாடும் இந்த புல்லுருவிக் கூட்டம் தான், தமிழ் மக்களைப் பற்றிக் கவலைப்படுகுதாம். தமிழ் மக்களைக் கொன்ற, தமிழரின் வாழ்வை அழித்த, தமிழ்மக்களை சிறை வைத்திருக்கும் இலங்கை அரசை போற்றிப் பாடும் இந்தப் பொறுக்கிகளிற்கு தமிழரின் வாழ்வைப் பற்றி பேச என்ன அருகதை இருக்கிறது?

எல்லாவற்றையும் வியாபாரமாக, எல்லாவற்றையும் பணமாக பார்க்கும் வலதுசாரிகளின், முதலாளித்துவவாதிகளின் ஊடகங்கள் இப்படித்தான் இருக்கும். குமுதம், ஆனந்தவிகடன் போன்று இந்திய நாட்டுப்பற்று, இந்து மதப்பெருமை பேசிக் கொண்டு பெண்களின் படங்களை போட்டு பணம் பார்க்கும். தமிழ்த்தேசியம் பேசிக் கொண்டு, ஈழதேசம் பற்றிப் பேசிக் கொண்டு கிசுகிசு.கொம் நடத்தி சினிமா பெண்களின் ஆடை குறைந்த படங்களை (hot photos) என்ற தலைப்பில் தந்து காசு சேர்க்கும்.

"வித்தியா என்ற புதுமலர் கசங்கிய போது"…. என்ற தலைப்பில் "பூசைக்கு போகும் முன்னே வித்தியா என்ற புதுமலர் சில காமுகர்களின் காம இச்சை ஆசைக்கு பலியாகி, புங்கை மண்ணில் கசக்கி வீசப்பட்ட பொழுது" என்று தமிழ்த் தேசியத்திற்காக அவதாரம் எடுத்த (JVP News) என்னும் இணையத்தளம் வித்தியா கொலை குறித்து 25.12.15 வெளியிட்ட செய்தி இது. புதுமலர், பூசைக்கு போகும் முன்னே என்று அருவருப்பான பாலியல் அர்த்தம் தரும் சொற்களை வைத்து பாலியல் வன்முறை செய்யப்பட்டு படுகொலை செய்யப்பட்ட வித்தியாவின் கொலையை வியாபாரம் செய்கிறார்கள். ஒரு பெண்ணின் அவலத்தை எழுதும் போது இவ்வளவு வக்கிரமாக எழுதுபவர்கள் தம்மை தமிழ்த்தேசியத்தின் குரல் என்று சொல்வதைப் போல் கேவலம் எதுவுமில்லை.

பெண்களை இப்படி பொதுவெளியில் கேவலப்படுத்துவதற்கான அடிப்படையை எவை கொடுக்கின்றன? கணவனை இழந்த பெண்கள் மொட்டை அடிக்க வேண்டும்; வெள்ளைச்சேலை உடுக்க வேண்டும்; சதி என்று சொல்லி சிதையில் எரிக்க வேண்டும் என்ற இந்து மதம் கொடுக்கிறது. கர்ப்பகாலத்தில் பெண் இறக்கும் நிலை வந்தாலும் கருச்சிதைவு செய்யக்கூடாது; பெண் மதகுருவாகவே வர முடியாது என்ற கிறிஸ்தவ மதம் கொடுக்கிறது. கண்ணைத் தவிர வேறே ஒன்றும் வெளியே தெரிய உடை உடுத்தக்கூடாது; பள்ளிவாசலில் ஆணிற்கு பக்கத்திலும் வரக்கூடாது என்ற இஸ்லாமிய மதம் கொடுக்கிறது. இந்த பெண்ண்டிமைத்தனங்களை வளர்க்கும் மதங்களை விடுத்து பெண்ணும், ஆணும் சரிநிகர்சமானம் என்னும் புதிய பண்பாட்டை கட்டி எழுப்ப முற்போக்கு சிந்தனை கொண்ட பெண்களும், ஆண்களும் சேர்ந்து உழைத்திடுவோம். பொருளாதாரம், பண்பாடு, குடும்பம் எங்கும் சமத்துவம் பேணும் பொதுவுடமைத் தத்துவத்தின் புரட்சிக்கொடியை தூக்கிப் பிடிப்போம்.
நன்றி - NDPTFRONT
...மேலும்

Dec 20, 2015

பெண்களை அவதூறு செய்யும் இந்த அயோக்கியர்களை கண்டியுங்கள், தண்டியுங்கள்


பெண் மீதான வன்முறைகளுக்கெதிராக என்ன தான் காலம் காலமாக போராட்டங்கள் தொடர்ந்துகொண்டிருக்கின்ற போதிலும் வன்முறைகளின் வடிவங்களும் தளங்களும் தான் மாற்றமடைகின்றனவே தவிர அவை தொடர்ந்த வண்ணம்தானிருக்கின்றன. தற்போது அத்தகையதொரு தளத்தினை “சமூக ஊடகங்களும் இணையங்களும்” அமைத்துக் கொடுத்துக்கொண்டிருப்பது ஒன்றும் நமக்குத் தெரியாததுமல்ல புதியதுமல்ல. முகநூல் மற்றும் இணையங்களில் “நகைச்சுவை துணுக்குகள் முதல் சமுதாயத்தினை சீர்திருத்துகின்றோம் என்ற பெயரில் பெண்கள் மீதான வன்முறைகளை தொடர்வது வரை தொழில்நுட்பமும் அதன் பின்னிருக்கும் மனித வலுக்கலும் வெற்றி கண்டுகொண்டுதானிருக்கின்றன. 

ஒரு வன்முறையின் பின்னர் கூட பாதிக்கப்பட்ட பெண்ணின் உடைகளும் சம்பவ நேரத்தினையும் அவள் குறித்த சுயத்தினையும் அலசுகின்ற சமுதாயத்தில் எப்போதும் “பாதிக்கப்பட்டவள்” தான் கருத்துகளுக்கான கருவாகின்றாளே தவிர பாதிப்பினை ஏற்படுத்தியவர்களது நிழல் கூட திரைச்சீலைகளால் போர்த்தப்பட்டுவிடுகின்றது. 

இதைவிட கொடுமை என்ன நடந்து என்பதே தெரியாமல் “அவள்’ எப்படி ஊடகங்களில் பேசுபொருளாகின்றாள் “அவள்’ சுயம்; பகிரப்படுகின்றது. பேனை எடுத்தவரெல்லாம் ஊடகவியலாளராகவும் தொழில்நுட்பம் தெரிந்தவரெல்லாம் இணையதள நடத்துநர்களாகவும் இருக்கும் போது மேற்கூறியவை சாத்தியப்படுவதில் ஒன்றும் ஆச்சரியமில்லை தான்.



கடந்த வாரத்தில் இருந்து நியூ ஜப்னா (www.newjaffna) நியூ டமில் (http://newtamils.com/) மற்றும் அதிர்வு http://www.athirvu.com) போன்ற இணையங்களில் பரவலாக ஒரு பெண் குறித்த செய்திகள் பிரசுரிக்கப்பட்டிருந்தன. அதைவிடவும் பல நூறு பேர் அதனை பகிர்ந்திருந்தனர். இந்நிலையில் எந்தப் பெண் குறித்து பதிவிட்டிருந்தார்களோ அந்த பெண் என்னை அனுகி “ நான் பிழை செய்யவில்லை அதனால் இதற்கு மறுப்பு தெரிவித்து என்னுடைய ஒளிப்பதிவினை வெளியிட்டு உதவமுடியுமா? என்று கேட்டிருந்தார். நாமும் மேற்குறிப்பிட்ட நாலாந்தர இணையங்களைப் போன்று ஆதாரங்கள் இன்றியோ அல்லது ஊடக தர்மங்களை மீறியோ செயற்பட்டுவிட கூடாது என்பதால் ஒருவார காலத்தின் பின்னர் பல்வேறுபட்ட விவாதங்கள் மற்றும் சர்ச்சைகளின் பின்னர் இவ் ஒளிப்பதிவை பதிவிடுகின்றேன்.

தமது பக்கங்களுக்கு வருகை தருவோரின் எண்ணிக்கையை அதிகரிப்பதற்காக பாலியல் சார் செய்திகளை வரையறையின்றி, எந்த ஊடக தர்மமும் இன்றி, எந்த சமூகப் பொறுப்புமின்றி வெளியிடும் இந்த அயோக்கியர்கள் ஊடக விபச்சாரன்களே. ஊடக பொறுக்கிகளே...

இது முதல் தடவையல்ல. பெண்களை அவதூறு செய்கின்ற இத்தகைய பல செய்திகளை இதற்கு முன்னரும் வெளியிட்டே வந்திருக்கிறது. இதற்க்கான சட்ட நடவடிக்கைகள் குறித்து ஆராய்ந்து வருகிறோம். இதுபோன்ற  இந்த இணையத்தளங்களுக்கு சென்று நாங்கள் கூறும் விடயத்தை வாசகர்களாகிய நீங்களே உறுதிபடுத்திக்கொள்ளலாம். இந்த இணையத்தளங்களை, அம்பலப்படுத்தி, கண்டித்து, தண்டிக்குமாறு அனைவரையும் கேட்டுக்கொள்கிறோம். குறிப்பாக சமூக ஊடகங்களை பயன்படுத்துபவர்கள் இயலுமானவரை இதனை செய்யுங்கள். இப்படி இயங்குகின்ற இனிவரும் ஏனைய ஊடகங்களுக்கும் இது ஒரு பாடமாக அமைய வேண்டும்.

தன்னைப்பற்றி அவதூறான செய்தி வந்தவுடன் நம் சமுதாய பெண்களைப் போல் முடங்கிவிடாமல்,  ஒளிந்துகொள்ளாமல் தானாக முன்வந்து அனைத்து விடயங்களையும் பகிர்ந்துகொண்ட இப்பெண்ணை போல் இனிவரும் காலங்களிலும் ஏனையவர்கள் முன்வரவேண்டும் என்கின்ற கோரிக்கையை முன்வைப்பதுடன். இது குறித்த தகவல்கள் அறிந்தவர்கள், இவ் இணைய தளங்களுடன் தொடர்புடையவர்களை தெரிந்தவர்கள், முக்கியமாக பாதிக்கப்பட்டவர்கள் இருப்பின் என்னை பின்வரும் மின்னஞ்சல் முகவரியில் தொடர்புகொள்ளவும்.

பாரதீ -  bharathee16@yahoo.com
...மேலும்

Dec 18, 2015

“நீங்கள் என்ன விரும்பினீர்களோ அதுதானே கிடைத்திருக்கிறது?” கவிஞர் தாமரை


நடிகர் சிம்பு- அனிருத் இசையமைப்பில் உருவான பீப் பாடல் குறித்து கவிஞர் தாமரை கருத்து தெரிவித்துள்ளார். தனது முகநூல் பதிவில் இதுகுறித்து எழுதியிருக்கிறார். அதில்,

“கடந்த நான்கு நாட்களாக மாற்றி மாற்றித் தொலைபேசி அழைப்புகள். சிம்பு-அனிருத் தொடர்புள்ள பாடல் குறித்து என் கருத்து வேண்டும் என்று ஊடகவியலாளர்கள் கேட்டுக் கொண்டேயிருக்கிறார்கள். உண்மையில் எனக்கு ஒருவாரமாக இரவு பகல் பாராத வேலை. வீட்டுக்கும், பணியிடத்துக்குமாக ஓடிக்கொண்டே இருக்கிறேன். இதில் எங்கே போய் இதுபோன்ற பாடல்களையெல்லாம் கேட்பது ?

ஆனால் ஊடகங்கள் துரத்த ஆரம்பித்த பின்பு கேட்டு வைத்தேன். அப்புறம்தான் தோன்றியது, இதில் நான் கருத்துச் சொல்ல என்ன இருக்கிறது என்று. இப்படியெல்லாம் எழுதலாமா, பெண்களை இழிவுபடுத்தலாமா, சமூக சீரழிவு இத்யாதி இத்யாதி…அடப்பாவிகளா, நானும் இதைத்தானே இருபது ஆண்டுகளாகச் சொல்லிக் கொண்டிருக்கிறேன், இப்போதுதான் ஏதோ புதிதாகக் கண்டுபிடித்தது போல பொங்குகிறார்களே என்று…..

நான் சொன்னது மட்டுமல்ல , செய்தே காட்டியிருக்கிறேன். வெறும் வாய்ப்பேச்சில்லை, உதார் விடவில்லை, வாயால் வடை சுடவில்லை, செயலால் காட்டியிருக்கிறேன்.
நீண்ட நெடிய 18 ஆண்டுகள். ஆபாசமாக எழுதமாட்டேன், அருவருக்கத்தக்க வரிகள் தரமாட்டேன், சமூகத்தைக் கெடுக்கும் பாடல் எழுத மாட்டேன்…. பாடல்கள் மட்டுமல்ல , காட்சிகள், வசனங்கள், நடிகர்களின் உடல்மொழி எதிலும் ஆபாசம் கூடாது என்று வலியுறுத்தி வந்திருக்கிறேன். இதற்காகத் தனிப்பட்ட முறையில் எனக்குப் பல இழப்புகள் இருந்திருக்கலாம், ஆனால் என் ‘ கலை, கலைஞர்களின் பொறுப்புணர்வு ‘ தொடர்பான நிலைப்பாட்டில் எந்த சமரசமுமில்லை. நேற்று இப்படித்தான், இன்று இப்படித்தான் , நாளையும் இப்படித்தான்… எனவே, நானே கருத்தாக இருக்கும்போது, தனியாக இது குறித்துக் கருத்து வேறு சொல்ல வேண்டுமா ?…

சரி போகட்டும், நீங்கள் என்ன விரும்பினீர்களோ அதுதானே கிடைத்திருக்கிறது ?? அப்புறம் ஏன் இந்தப் ‘பொங்கல்’?
நல்ல பாடல்கள் வரவேண்டும் என்று இந்த சமூகம் விரும்பியிருந்தால், தாமரை போல் இத்தனை நேரம் ஒரு பத்துப்பேராவது வந்திருக்க வேண்டாமா ? ‘ தாமரை சமூகத்தைச் சீரழிக்காத, ஆபாசமற்ற நல்ல பாடல்களை எழுதி வெற்றி பெற்றிருக்கிறார், நானும் அவரைப் பின்பற்றி எழுதப் போகிறேன் ‘ என்று ஊரிலிருந்து புறப்பட்டு வந்தவர்கள் எத்தனை பேர்? கை தூக்குங்கள் பார்க்கலாம்…

இல்லையல்லவா, ஒருவர்கூட இல்லையல்லவா ?? அப்புறமென்ன, ‘ ஐயோ திரைப்படப் பாடல்கள் சீரழிக்கின்றன ? ‘ என்ற ஒப்பாரி ??
உண்மை என்னவெனில் தாமரைகள் இந்த சமூகத்திற்குத் தேவையில்லை. தாமரைகள் ‘ பிழைக்கத் தெரியாதவர்கள், காலாவதியாகிப் போனவர்கள், Museum pieces’…
நல்லனவற்றைக் கொண்டாடத் தெரியாத, பாதுகாத்து வைத்துக் கொள்ளாத சமூகத்திற்கு அல்லன தானே கிடைக்கும் ??
U asked for it, U got it, அப்புறம் ஏன் புலம்ப வேண்டும் ?

அரசியல், ஆன்மிகம், இலக்கியம், குடும்பம், கல்வித்துறை, நீதித்துறை, ஊடகங்கள்….. என சமூகத்தின் எல்லாத்தரப்பிலும் சீரழிவு, சீரழிவு, சீரழிவு… சினிமா மட்டும் சீலத்தோடு இருக்க வேண்டுமெனில் எப்படி ? சிம்புவும் அனிருத்தும் எங்கே இருந்து வந்தார்கள் ? வானத்திலிருந்து குதித்தார்களா ? வேற்றுக்கோள் வாசிகளா? இந்த சமூகத்திலிருந்துதானே அவர்களும் வந்தார்கள் ??
இணையத்தில் ஒருவர் எழுதியிருந்தார், குழந்தைகள் கெட்ட வார்த்தை பேசுவதில்லை, கேட்ட வார்த்தையைத்தான் பேசுகிறார்கள் என்று ! எவ்வளவு உண்மை !! குழந்தைகள் பட்டதைச் செய்வதில்லை, பார்த்ததைத்தான் செய்கிறார்கள். நாம் ‘பின்நவீனத்துவவாதி’களாக இருந்து கொண்டு அவர்களை மட்டும் ‘முன்நவீனத்துவத்திற்கு’ப் போகச்சொன்னால் எப்படி ஐயா ??? க்க்குறும்பு…….!!!

தாமரை போன்றவர்கள் விதிவிலக்குகள், உதிரிகள். தனிமரம் தோப்பாகாது. தனிமரங்கள் தடையாகக் கருதப்படும் , வெட்டப்படும் , வீழ்த்தப்படும். நினைவில் கொள்ளவும் : அறம், விழுமியங்கள் அழிந்த சமூகத்திற்கு அறம், விழுமியங்கள் அற்ற படைப்புகள்தாம் கிடைக்கும்” என்று தெரிவித்துள்ளார்.

இதனிடையே பீப் பாடலுக்கு கண்டனம் தெரிவித்து கவிஞர்கள் புலமை பித்தன், முத்துலிங்கம், சினேகன், பா. விஜய், யுகபாரதி உள்ளிட்ட கவிஞர்கள் 38 பேர் கூட்டாக அறிக்கை வெளியிட்டுள்ளனர்.

இந்த பாடல், பெண்களை இழிவுபடுத்தும் நோக்கிலும், ஒழுக்கமற்றவர்களின் ஓலக்குரலாகவும் ஒலிப்பதாக கூட்டறிக்கையில் அவர்கள் தெரிவித்துள்ளனர். இப்படிப்பட்ட பாடல், சிறு பிள்ளைகள் மத்தியில் பரவிவிட்டால் ஒரு நாகரீகம் இழந்த தொற்று நோய் அவர்கள் மனதில் பதிந்து விடும் என கவிஞர்கள் குறிப்பிட்டுள்ளனர்.

இதுபோல் சமூகத்தைச் சீரழிக்கும் பாட்டுக்கள், படைப்புகள் வெளிவராது செய்ய அனைத்து படைப்பாளிகளும், ஊடகங்களும் ஒன்றுபட வேண்டும் என அவர்கள் கேட்டுக்கொண்டுள்ளனர். தமிழ்த் திரைப்படத்துறை என்ற மிகப்பெரிய ஊடகத்தில் இருந்து வெளியாகும் படைப்புகள், சமூக அக்கறையோடும், பொறுப்போடும் இருக்க வேண்டும் என கவிஞர்கள் தெரிவித்துள்ளனர்.

மக்களால் அங்கீகரிக்கப்பட்டு மிகப் பிரபலமாக இருக்கும் படைப்பாளிகள், கலைஞர்கள் தங்கள் பொறுப்பினை உணர்ந்து செயல்பட வேண்டும் என கவிஞர்கள் தங்கள் கூட்டறிக்கையில் வலியுறுத்தியுள்ளனர்.

...மேலும்

பெண்ணியத்தில் வெளிவந்த நிர்மலா கொற்றவையின் கட்டுரை தொடர்பாக - (விஜி - பிரான்ஸ்)



நிர்மலா கொற்றவை தனது சாவின் உதடுகள் இணையத்தளத்தில் வெளியிட்டிருந்த “உஷா, லக்ஷ்மி ரவிச்சந்தர், இலக்கியா, வைஷ்ணவி மற்றும் உங்களது உறவுகளுக்கு ஒரு திறந்த மடல்” எனும் கட்டுரையை பெண்ணியம் இணையத்தளம் கடந்த 14 அன்று நன்றியுடன் மீள வெளியிட்டிருந்தது.
இந்தக் கட்டுரையை பெண்ணியம் பிரசுரித்திருக்கக் கூடாது என்கிற வாதத்தை முன்வைத்து விஜி (பிரான்ஸ்) அவர்கள் குறிப்பொன்றை அனுப்பியிருந்தார். அதில் அந்த பெண்களின் பெயர்கள் பயன்படுத்தப்பட்டிருக்கக் கூடாது என்பதே அவரது கருத்தின் சாரமாக இருந்தது. அந்த ஒரு காரணம் அக்கட்டுரையை நிராகரிக்க போதுமானது அல்ல என்று பதிலளித்திருந்தோம். அக்கட்டுரையின் முக்கியத்துவத்தையும் எடுத்தியம்பினோம். மேலும் பெயர்கள் குறிப்பிடப்பட்ட விடயம் குறித்து விஜி ஒரு குறிப்பை பகிரங்கமாக எழுதினால் அதனை வெளியிடுவதில் எந்த தடையும் இருக்காது என்பதைத் தெரிவித்ததுடன் அப்படி ஒரு உரையாடல் தொடங்கப்பட்டால் ஒரு நிலைப்பாடு எடுக்கவும் பலருக்கும் வாய்ப்பாக இருக்கும் என்பதையும் தெரிவித்தோம். அதற்கிணங்க அவர் அனுப்பியுள்ள குறிப்பு இது.

பெண்ணியம் இணையத்தளத்தில் பதிவாகியிருக்கும் நிர்மலா கொற்றவையின் கட்டுரையை வாசிக்கும் போது எனக்கு இரட்டிப்பான அதிர்வைத் தந்தது. ஒன்று எமது தமிழ் சமூகத்தின்  பிரசைகளான சிம்பு, அனிருத்   போன்ற இரு ஆண்களினது பெண் வெறுப்பு சொல்லாடல்களுக்கு எதிர்வினையாக சிம்புவின் இழிசெயலுக்கு  எவ்வித சம்பந்தமுமற்ற  அவரது குடும்ப  பெண்களின் பெயர்களை இணைத்து  பெண்களையே  மீண்டும் இக்கட்டுரையும்  நிந்தித்திருப்பது, இரண்டாவது அந்தவகையில் அக்கட்டுரை கொண்டிருக்கும் ஊடக தர்ம மீறலை   கருத்தில் எடுத்துக்கொள்ளாமல் பெண்ணிய இணையத்தளம் அதை பிரசுரித்ததன் ஊடாக கருத்துச் சுதந்திரம் எனும் பெயரில் ஊடக தர்மத்தை மீறியிருப்பது..

எம்முடைய இந்த ஆணாதிக்க சமூகத்தில்  பெண்ணுறுப்புகளை பெண்களை அவமதிக்கும் நோக்கில் பாவிப்பது ஒன்றும் புதிதல்ல.  இதுபோன்ற வார்த்தைகள் எமது ஆண்களின் வாயில் இருந்து மிக மிகச் சாதாரணமாகவே வெளிப்படுத்தப்படுகின்றது . பெண்களை வசைவதற்கு மட்டுமல்ல ஒரு நண்பனையோ, எதிரியையோ தாழ்வாக சொல்வதற்கும் இதைத்தான் சொல்கிறார்கள். பொது போக்குவரத்துசாதனங்களை பயன்படுத்தும் வேளைகளிலும்,  ரெலிபோன் உரையாடல்களிலும், விளையாடிக்கொண்டு இருக்கும்போதும், ஏன் யுத்தகளத்திலும் கூட ஆணைகள் வழங்கப்படும்போதும் கூட  அடைமொழியாக இவ்வித சொல்லாடல்கள் மிக சாதாரணமாக அள்ளி வீசப்பட்டன.

  இது இவ்வாறிருக்க நாங்கள் யாரும் இதை இதற்கு முதல் கேட்காதது போலவும். ஏதோ இப்போதான் எல்லோருக்கும் தெரியவந்திருப்பது போலவும், இனித்தான் இதைப்பாவிக்கப்போகிறார்கள் போலவும் பதறியடிப்பதுதான் பெரும் ஆச்சரியமாக உள்ளது. இந்த நிலையை மாற்றுவதென்பது சிம்புவை திருப்பி வசைபாடுவதால் மட்டும் சாத்தியப்படாது. மாறாக எமது ஆணாதிக்க சமுகத்தை நோக்கிய எமது தொடர் போராட்டங்களே அதனை சாத்தியமாக்கும். எது எப்படி இருந்தாலும் இந்த சிம்பு போன்றவர்களை கண்டிக்க பெண்களை மனிதர்களாக மதிக்கும் எல்லோருக்கும் உரிமை இருக்கிறது. ஆகவே இதை கண்டிக்கவோ, எதிர்த்து எழுதவோ கூடாது என்பது அல்ல எனது கருத்து.

ஆனால் இக்கண்டனங்களை வெளிப்படுத்துபவர்கள் எமது சமூகத்தில் ஏலவே இருக்கும் குழந்தைகள் செய்யும் குற்றங்களுக்கெல்லாம் பெற்று வளர்த்த தாய்மார்தான் காரணம் எனும் மிக மோசமான கருத்தை  கொண்டிருக்க முடியாது. பொதுவாக ஆண்கள் கெடுவதே பெண்களால்தான் என்கின்ற கருத்து அன்று தொட்டு இன்றுவரை நிலவிவருகிறது. "இந்திரன் கெட்டதும் பெண்ணாலே? சந்திரன் கெட்டதும் பெண்ணாலே".   "ஆதாம் கெட்டதும் ஏவாளால்தான்" ........ இவற்றை எல்லாம் ஒப்புக்கொள்வதுபோல் இருக்கிறது கொற்றவையின் கட்டுரை.   கொற்றவையின் கோபம் நியாயமானது மட்டுமல்ல அவசியமானதும்கூட. ஆனால் அந்த கோபம் குறித்த  நபர்களை தாண்டி அவர்கள் சார்ந்த பெண்கள் மீது பாய்வது ஒருபோதும் ஏற்புடையதல்ல. அந்தவகையில் காலாகாலமாக கடைப்பிடித்துவரும் "பெண்கள்தான் ஆண்கள் செய்யும் தவறுகளுக்கெல்லாம் காரணம்" என்கின்ற ஆணாதிக்க கருத்தியலுக்கே கொற்றவையின் எழுத்துக்கள் நியாயம் வழங்க முற்படுகின்றன. இந்த அவசரமும் சிம்பு சார்ந்த தனிநபர்கள் மீதான சுட்டுதல்களும்  சிம்புவின் செயலுக்கு நிகரான வன்மம் பொருந்தியது.

கொற்றவை  எவ்வாறு சிம்புவின் தாய்மார் மீதும், சகோதரிகள் மீதும் இதற்கான குற்றத்தை சுமத்த முடியும். அவர்களும் இச்சமூகத்தில் எம்போன்ற ஒரு பெண்கள்தானே?  அவர்கள் மட்டும் இதற்கு எவ்வாறு குற்றவாளி ஆக்கப்பட முடியும்? என்னைப்பொறுத்தவரை அப்பெண்களும் எம்மைப்போன்று ஆத்திரமும், வேதனையும் ஆக்கிரமிக்கப்பட்டவர்களாகவே இருப்பார்கள். அதிலும் கொற்றவை  எழுதிய பெண்களின் பெயர்கள் குறிப்பிடப்பட்ட  இந்தக்கட்டுரை அவர்களை மிக மோசமான முறையில் கூனி குறுக வைத்திருக்கும். அந்தவகையில் ஆணாதிக்க சமூகத்தின் தேவையை நீங்கள் நிறைவேற்றியிருக்கின்றீர்கள். இன்னொருபுறம் இந்த ஆண்களின் செயற்பாட்டுக்கான குற்றவாளிகளாக தாய்மாரையும், சகோதரிகளையும் நிறுத்தியிருப்பதினூடாக இந்த ஆணாதிக்க சமூகத்தை காப்பாற்ற முனைகிறீர்கள். அதிலும் இந்த வயது வந்த இளைஞர்களது செயற்பாட்டுக்கு எவ்வாறு அந்தப்பெண்கள் பொறுப்பேற்க முடியும்?  இவ்வாறான பெண்களை அசிங்கப்படுத்தும், வன்முறைகளுக்கு எமது கேடுகெட்ட சமூகம்தான் முற்றுமுழுதான காரணம். நாம் இப்போதும் கடைப்பிடித்துக்கொண்டிருக்கும் எமது மொழியும் சமயங்களும், சாதிப்படிமுறைகளும், பெண்ணடிமைத்தன கலாச்சார பண்பாடுகளுமே காரணமாகும். இவைகளை போட்டுடைக்காதவரைக்கும் பெண்களுக்கு விமோசனம் இல்லை. 

...மேலும்

Dec 17, 2015

பாலியல் நிந்தனைச்சொற்களும் ஆணாதிக்கமும் - சிவசேகரம்


மனிதர் மனிதரை நிந்திக்கப் பயன்படும் சொல் பல வகையின. ஒருவரை இழிவாகப் பேச அவரைத் தாழ்த்தும் வகையிலான சொற்களும் சொற்தொடர்களும் பாவிக்கப்படுவது வழமை. எனவே நிந்தனைச் சொற்கள் நேரடியாகவோ மறைமுகமாகவோ அவற்றுக்குரிய சமுதாய விழுமியங்களை பிரதிபலிப்பன. பல்வேறு மனித சமுதாயங்களிலும் பன்படுத்தப்படும் நிந்தனைச் சொற்களில் கணிசமான ஒற்றுமை உள்ளது.

இது சமுதாய விழுமியங்களிடையே உள்ள பரவலான ஒருமையின் காரணமானது. அதேவேளை சமுதாய வேறுபாடுகளும் மொழி விருத்தியின் வேறுபாடும் நிந்தனைச் சொற்களிலும் வேறுபாட்டுக்கு காரணமாகின்றன. நமக்குப் பரிச்சயமான மொழியிலுள்ள நிந்தனைச் சொற்கள் பற்றியும் குறிப்பாக பாலியல் தொடர்பான சொற்கள் பற்றியும் கவனிப்போமாயின் பல ஆயிரம் வருடப் பெண்ணடிமை இழிசொற்களிலும் ஆழமாக வேரூன்றி இருப்பதை காணலாம்.

ஒருவரது தோற்றம் உடல்வலிமை செயற்திறமை அறிவு பண்பாடு ஒழுக்கம் ஆடை அலங்காரம் தொடர்பான நிந்தனைச் சொற்கள் பல உண்டு. இதற்கு உதாரணம் தந்து விளக்க வேண்டிய அவசியம் இல்லை. எனினும் இவ்வாறான நிந்தனைச்சொற்கள் ஒருவரது குறைபாடுகளை மிகைப்படுத்தும் வகையில் பயன்படுவதுண்டு. சிலசமயம் ஒருவரது செயல்களின் மதிப்பீடாகவும் இவை பயன்படுவதுண்டு. சாதிப் பேராலும் பகையானதாகக் கருதும் ஒரு சமுதாயத்தின் பேராலும் ஒருவரை அயலார் என்று குறிப்பிடுவதாலும் மனிதரை இழிவுபடுத்தலாம். குறிப்பிட்ட ஒரு தாழ்த்தப்பட்ட சாதியைச் சேராதவரை அச்சாதிப் பெயரால் அழைத்து நிந்திப்பதை அறிவோம். இவ்வாறே சில அயல் இன, அயல் நாட்டுப் பெயர்க்குறிப்புகள் பயன்படுவதை அறிவோம். இதைவிட மிலேச்சன், பரதேசி ( சிங்களத்தில் பரதெமிலா அதாவது அந்நியத் தமிழன்) போன்ற சொற்கள்  அயலார் மீது நமது சமுதாயம் காட்டும் தயவின்மையையும் வெளிப்படுத்துவன.

இவ்வாறே பெண்மையச் சார்ந்த சொற்களும் (முக்கியமாகப் பேடி) ஒரு ஆணை பெண்மையுடையவன் எனக் குறிப்பிடும் சொற்களும் நிந்தனையாகப் பயன்படுவன. கடுமையான நிந்தனை பெருமளவும் பேய்பிசாசுகள் துர்த்தேவதைகள் விலங்குகள் போன்றவற்றின் பெயரால் மனிதரை அழைப்பதாகவோ அல்லது பாலுறுப்புக்களையும் பாலுறவையும் குறிக்கும் சொற்களாகவோ அல்லது இவற்றினதும் பிறநிந்தனைச் சொற்களதும் சேர்க்கையாகவோ அமைவதைப் பலரும் அறிவார்கள்.

எருமை, கழுதை, பன்றி, நாய் தேவாங்கு போன்றவை சனியன், மூதேவி, பிடாரி போன்று துரதிர்ஷ்டம் அல்லது துர்க்குணங்களுடன் இணைத்துக் காணப்படும். தேவுகளுடன் ஒப்பிடக் கூடிய அளவிற்கு மனிதரை நிந்திக்கும் குறியீடுகளாகின்றன.ய யானை,பசு, பூனை எனும் சொற்கள் பொதுவாக நிந்தனைக்குப் பயன்படுவதில்லை. அவ்வாறு பயன்படும்போது அடைமொழியுடன் (கள்ளப்பூனை என்பதுபோல) வருவதையே அறிகின்றோம். இவை யாவும் குறிப்பிட்ட விலங்குகளையும் தேவுகளையும் பெண்களையும் பற்றி நமது சமுதாய வழக்கில் இருந்து வரும் கருத்துக்களையும் அவை தொடர்பான சமுதாய விழுமியங்களையும்  குறிப்பன. எவ்வாறாயினும் மிகுந்த சினமும் மிகையான அவமதிக்கும் நோக்கமும் கொண்ட சொற்கள் பாலியற் தன்மையுடையன. அது மட்டுமன்றி நடத்தை, பிறப்பு தொடர்பான சில சொற்களை விட்டால் மற்றவை ஏற்றுக் கொள்ளப்பட்ட மொழி வழக்கிற்குப் புறம்பான சொற்களே.

பாலுறுப்புக்களையும், பாலுறவையும் குறிக்கும் நிந்தனைச் சொற்கள் தமிழ் எழுத்து வழக்கில் ஏற்கப்படாதவை என்பது குறிப்பிடத் தக்கது. இவ்வாறே சிங்களம், ஆங்கிலம் போன்ற மொழிகளிலும், எழுத்து வழக்கும் விஞ்ஞான மருத்துவ நடைமுறையும் பயன்படுத்தும் சொற்கள் நிந்தனையாகப்  பயன்படும் சொற்களினின்றும் வித்தியாசமானவையாக இருப்பதை காணலாம். 
ஒருவரை விபச்சாரியின் பிள்ளை என்றோ, திருமணமாகாத பெற்றோருக்குப் பிறந்தவரென்றோ ஏசுவதற்குப் பாவிக்கும் சொற்கள் எல்லா முக்கிய மொழிகளிலும் உள்ளன என்றே கூறலாம். இவ்வாறு ஒருவரை ஏசும்போது அது அவரைத் திருடர், ஒழுக்கம் கெட்டவர் என்று ஏசுவது போலில்லாது 
வெறும் அவதூறான நிந்தனையாகவே இருக்கும்.

இவ்வாறே ஒரு பெண்ணை ஒழுக்கங் கெட்டவள் என்று பொருட்படுமாறு சொல்லும் வார்த்தைகள் அவரது ஒழுக்கத்தை கேள்விக்குட்படுத்துவதை விட அவரை அவமதிப்பதையே நோக்கமாகக் கொண்டவை. எவ்வாறு நோக்கினும் இவ்வாறான வசைச் சொற்கள் ஒரு ஆணை அவமதிக்கும் போது கூட அவரது தாயை விபச்சாரி, அல்லது ஒழுக்கங் கெட்டவர் என்று அழைப்பதாகவே அமைகின்றன. அனைத்தினும் மோசமாகத் தாயுடன் 
பாலுறவு கொண்டவன் என்ற சொல்லால் அதிகம் அவமதிக்கப்படுவதும் அவமதிப்புக்கு உட்பட்டவனுடைய தாயேதான். ஒருவனைக் காமுகன் என்றோ ஸ்திரிலோலன் என்றோ குறிப்பிடுவோமாயின் அது வெறும் வசையாக இல்லாது குற்றச்சாட்டான முறையிலேயே சொன்னதாகக் கருதுவதற்கு இடமுண்டு. இந்த நிந்தனைக்குரிய சொற்கள் ஆணின் ஒழுக்கத்தை விட பெண்ணின் ஒழுக்கத்தையே கேள்விக்குட்படுத்தும் நியாயம் என்ன? இதற்கு விரிவான விளக்கம் இங்கு அவசியமில்லையென்று நினைக்கின்றேன். 

ஒருவரை பாலுறுப்புக்களின் பெயர்களால் அல்லது அவற்றை அடிப்படையாகக் கொண்ட சொற்களால் இழிவுபடுத்தும்போதும் பாலுறவைக் குறிக்கும் சொற்களால் இழிவு படுத்தும் போதும், ஒருவரை விலங்குகளின் பெயரால் நிந்திப்பதைவிடக் கடுமையான உணர்வே தென்படுகின்றது 
மலம், அழுகல், துர்நாற்றம் போன்றவற்றுக்கு ஈடானவையாகவே பாலுறுப்புக்களை குறிக்கும் சொற்கள் பயன்படுகின்றன. இங்கும் பெண்களின் பாலுறுப்புக்களைக் குறிக்கும் சொற்களே நிந்தனைச் சொற்களில் அதிகமாக இருப்பதும் அவை ஆணுறுப்புக்களைக் குறிக்கும் சொற்களை விட 
அதிகமாகப் பாவிக்கப்படுவதும் தற்செயலானதல்ல. பாலுறவைக் குறிக்கும் நிந்தனைச் சொல் ஏற்றுக்கொள்ளப்பட்ட மொழி வழக்கில் புணர்ச்சி என்ற சொல்லைப் போலன்றி, ஆணால் பெண்ணுக்கு செய்யப்படும் காரியமாக இருப்பதும் நம் கவனத்திற்குரியது. 

இவை வெறுமனே ஆணாதிக்கத்தின் வெளிப்பாடுகள் மட்டுமா அல்லது நமது சமுதாயங்களுட் பாலுறவு பற்றியும் பாலுணர்வு பற்றியும் இருக்கின்ற  வக்கிர உணர்வுகள், போலி அருவருப்பு, பாசாங்குகள் என்பவற்றின் வெளிபாடுகளுமா என்பது சிந்தனைக்குரியது. ஆபாசமான எழுத்து, பேச்சு, படங்கள் என்பவற்றை எதிர்ப்போர் கூட ஆத்திரம் வரும்போது பாலியல் நிந்தனச் சொற்களைக் கூசாது பாவிப்பதுண்டு.  மொழி வழக்கில் உள்ள துர்ப்பிரயோகங்களைப் போல நிந்தனச் சொற்கள் அதிகம் சிந்தனை இல்லாமலேயே பாவிக்கப்படுகின்றன. சாதிப் பெயராலோ 
பிரதேச, இனப்பெயராலோ  எவரையும் நிந்திப்பதை இன்று உலகின் சமுதாயங்கள் தவறென்று ஏற்கின்றன. அடிப்படையிலான மனித உணர்வான பாலுணர்வையும் அதைவிட முக்கியமாக மனித இனத்தின் ஒரு பாதியினரை அவமதிக்கும் சொற்பிரயோகங்கள் பற்றி நாம் கூடிய கவனம் காட்ட வவேண்டாமா?

நன்றி
சக்தி 
மார்ச் 1992 
...மேலும்

Dec 16, 2015

அல்குல் - வசுமித்ர


அல்குல் ; பெண்ணின் இடுப்பு என்பார் பாதிரியார் கால்டுவெல் ( திராவிட மொழிகளின் ஒப்பியல் 1856) இடுப்பு வேறு, இதுவேறு எனத் தெரியாதா அவருக்கு ?

அல்= இல்லாமல் போதல். அல்குல் =(அல்கு) குறுகுதல்.
(அல்குல் இல்லாதாரே அலி ( அல்+இ) எனப்பெயர் பெற்றிருக்கலாம். பலவகை அலிகள். அதில் ஒன்று இவ்வகை.)அல் குல் இல்லாள் ஆகியன உறவுடைய சொற்கள்.

கூதி ; அல்குலுக்கு வழக்குச் சொல், கூர்மை, ஆழம் என்று பொருள், அது கூர்து ஆழச்செல்வதால் அவ்வாறாம்.

புண்டை;  பட்டிதொட்டியெங்கும் வழங்கும் சொல். அல்குலில் மாத ருது காலங்களில் இழியும் புண் காயங்களின் ரத்தக்கசிவு போல் தோன்றுவதால் இவ்வழக்கு.

புண் –பெண், பெண்டு, பொண்டாட்டி உறவுடைய சொற்கள்.

அல்குல், வ்ல்வா ( vulva) இரண்டு ஒலி உறவுள்ளவை. வல்வா லத்தீனியச் சொல், அது உல்வா எனும் சமஸ்கிருதச் சொல்லுக்கு உறவுடையது( வெப்ஸ்டர்) அல்குள், உல்வா வல்வா ஒரே வேரின் இலைகள்.

பழம் ஆங்கிலத்தில் கருப்பை( womb) cwithe எனப்பட்டது. அதன் வேர்ச்சொல் Cu(கூ cwe) அது பெண் உறுப்பைக் குறிக்கும். அச்சொல் மத்தியத்தரைக்கடல் சொல்லாக இருக்கலாம் என்பர். ( Dictionary of slang..vol 2)

Cu V e the என்பதன் பொருள் ஏற்கனவே இருக்கும் அகழியில் தோண்டப்படும் மற்ருமொரு பள்ளம். இச்சொற்கள் கூதிக்கு ஒலி உறவும், பொருள் உறவும் உடையன, அல்குலைத் தாண்டி ழ்ழப்படும் யோனியைக் குறிப்பதாம் அது.

அல்குலுக்கு எகிப்திய மொழி கா-ட் kat. ஆங்கிலத்தில் கன்ட், ஜெர்மன் குண்டே டச்சுக்குண்டே பழம் பிரசியன் குண்டே, பழம் நார்ஸ் குண்டே எகிப்திய சொல்லுக்கு அம்மா பெண் பெண் உறுப்பு என்று பல பொருள். இந்த ka-t, cunt ஆகி இருக்கலாம்.

ஜெர்மன் மற்றும் வட அய்ரோப்பிய மொழிகளில் வழங்கும் குண்டே, குண்டா ஆகியவை புண்டை என்னும் சொல்லாக இருக்கலாம்.. அதைவிடவும் அதற்கு இன்னும் நெருக்கமான மேலைச் சொல் தற்கால ஆங்கிலத்தின் புடெண்டா( pundenta) பன்மை புடெண்டம்.
( pudendum)

இந்தச் சொற்கள் பொதுவாய் அல்குலைக் குறிப்பன என்றாலும் அதை வெளிப்படுத்துவதில் தனித்தனிப்பொருள் தருவன.

அல்குல் இது புலவர் கையாள்வது.

கூதி யோனி – vegina இவை அல்குலின் ஆழத்தை விளக்குவதாம். அதற்கு உறை என்றும் பெயர். யோனியும் வெஜைனாவும் yoni- vegina) ஒலி உறவுடையன.

இப்படி 58 பக்கங்களில் நீள்கிறது ஆராய்ச்சி.
படிக்க;  
அல்குல்-  தமிழ்நாடன். காவ்யா பதிப்பகம்.
அதற்கு கி.ரா. ஒரு முன்னுரையும் வழங்கியிருக்கிறார்.
சிற்றுரையில் நடிகன் எஸ் .எம் ராஜா. அப்புத்தகத்தை என் இல்லத்தார் படிக்கச் செய்வேன், தேவைப்படும் எனில் விளக்குவேன்.  என்று நேர்மையாகவும்  பதிந்துள்ளார்.

கொற்றவையின் கட்டுரை குறித்து வந்த விமர்சனங்களில் எனக்கு சில எனக்கு உயர் முற்போக்கு அறிவைத் தந்தன. முற்போக்குப் பெண்ணியம் என்பதில் தொடங்கி புண்டைப் பெண்ணியம் வரை அது நீண்டது. வாழ்த்துக்கள். இப்படித்தான் பல பெண்ணியங்கள் உள்ளது. ஆனால் சகலரும் சொன்னது குடும்பப் பெண்கள் அவர்களை எப்படி இழுக்கலாம் என்று,,

இந்த இடத்தில்தான் குடும்ப ஆண்கள், தங்கள் கொடியை ஏற்றியிருக்கிறார்கள். முற்போக்குப் பெண்ணியத்தில் குடும்ப ஆண்கள் என்ற சொல் நான் கேட்டறியாதது. இதுவரை படித்தறியாது. ஒரு வேளை ஆணாதிக்கத்தில் குடும்ப ஆணாதிக்கமும் சேர்த்தியா எனத் தெரியவில்லை அறிந்தோர் விளக்கவும்.

நீ பேசினால் உன் குடும்பத்தை இழுப்பதா என்ற கேள்விகள் அதிகமும் புழங்கின. மிக்க மகிழ்ச்சி. தனது மகன் குறித்தும் அவரின் இசை கடவுளால் அனுகிரக்கிக்கப் பட்டது நினைத்தே பார்க்கமுடியாது என சான்றோன் எனக் கேட்ட தந்தையாய் அனிருத்தின் தந்தை புளங்காங்கிதம் அடைந்திருந்தார். அவரை இப்பாடலைக் கேட்பாரா என்று கேட்டால் அது குடும்ப ஆணை இழுப்பதாகுமா என்று தெரியவில்லை.

எனக்கு மறுபடியும் சிக்கல் வரும் சொல்லாக இந்தக் குடும்ப பெண்கள் பதம். ஏன் குடும்ப ஆண்களை இழுத்தது தவறா எனத் தெரியவில்லை.

குடும்பப் பெண்கள் என்றால் என்ன.. ?
1 சம்பந்தப்பட்டவரின் குடும்பத்தில் உள்ள பெண்கள்.

2 ஆணாதிக்க சமூகத்தில், அனைத்து கேடுகளையும் வீட்டுக்கு வெளியே விதைத்து விட்டு வீட்டுக்குள் குடும்ப ஆணாய் வரும் அவனுக்கு புருஷ சிருட்ஷை செய்வதா…இல்லை, நவீனத்தில் புருஷன் காலணிகளைத் துடைத்து புள்ளைகளை ஸ்கூலுக்கு அனுப்பி இன்முகத்தோடு டாட்டா காட்டி கதவோரம் நின்று கணவனைப் பார்த்து சிரித்து வழியனுப்பி வைப்பதா..இல்லை அவனின் சொத்துடைமயா… ஆணாதிக்கப் பார்வையில் நல்லொழுக்கமான பெண்கள் என்ற அர்த்தமும் சேர்ந்தே வருகிறது. இதையும் முற்போக்கு குடும்ப ஆண்கள் உணரத்தலைப்படலாம்.

குடும்பப் பெண்ணாக இல்லாமல் தனியாக இருக்கும் தனிப்பெண்களை அழைக்க என்ன பதம். அறிஞர்கள் உதவுவார்களா.

இச்சமயத்தில் சிறுகூற்றாக,

புண்டைக்கு வரலாறு, அறிவியல், புவியியல் மட்டுமல்ல இதிகாசமே உள்ளது. என்ன பிரச்சினை என்றால் அனைத்தும் ஆண்கள் எழுதியது. அதனால் அப்படித்தான் இருக்கும்.

அதேசமயம் ஆண்களின் வசை சொல்லான புண்டை என்ற ஒரு சொல், ஒட்டு மொத்தமாய் ஒரு பெண்ணின் முழு உடலையே முன் வைப்பதோடு, சம்பந்தப்பட்ட உறுப்பில்தான் இனவாதம் மதவாதம் மொழி வாதம் என எந்த வாதமாக இருந்தாலும் பெண்களுக்கு எதிராய் யுகங்கள் தோறும், யுத்தங்கள் தோறும் ஆண்கள் அவ்வுறுப்பில் கத்தியைச் சொறுகுவதும், துவக்குகளைச் சொறுகுவதும், மின்சாரம் பாய்ச்சுவதாகவும் இருக்கிறார்கள் என்ன செய்ய.  

இப்பொழுது அதை துணிந்து, அதன் இளி தொனி மாறாமல் அப்படியே இருவர் பாடுவதை எதிர்ப்பதை விடவும், புண்டை என நீ எப்படிச் சொல்லலாம் என்ற கேள்விகளே நீண்டது. இடக்கரடக்கலும், வித்தியாசப்படுத்தலின் அரசியலும், பெண்ணியமும், வர்க்க அரசியலும் தெரியாது, கருத்துச் சொல்லியாய் இருப்பதும், தன் குறி ஒன்றே பிரதானம் என்ற நினைப்பே போதுமானது என நினைத்து தட்டத்துச் செய்பவர்களுக்கு நான் என்ன சொல்ல.

உதாரணமாக

டி ஆர் எழுதிய பாடலான….

ங்கொப்பன் மவனே
ங்கொப்பன் மகனே
டண்டணக்க
என்ற பாடலை 

புண்டை மவனே
புண்டை மவனே
-       எனப் பாடினால் அசிங்கமும் ஆபாசமுமாகத்தான் இருக்கும்.

கவிதைகளில் புண்டை எனக் குறிக்கப்பெறாமல் போன காரணம், அது வசவுச் சொல்லாக மாறியதானாலேயே தவிர. குறிக்கக் கூடாதென்பதற்காக அல்ல. இடக்கரடக்கல். (மலத்தை நெருப்பென்று கரந்தழைக்கும் பழக்கம் பார்ப்பனர்களிடத்தில் உண்டு. பீயை பீ என்று கூறாது மலம் என்ற பொதுவழக்கும் உண்டு.)

இன்னும் ஈழத்தில் எத்தனையோ கவிதைகள் போருக்கு எதிராய் துவக்குக்கு எதிராய் நீண்டிருக்கின்றன. கவிஞர் வைரமுத்து கூட தினந்தந்தியில் யோனிக்கு மானக்குழி என பெயர் ஒன்றை இட்டு எழுதியிருந்தார்.

இடம் பொருள் ஏவல்,  இத்தோடு தொனியையும் சேர்த்து அறியாத அறிஞர் பெருமக்கள் தமிழ் கூறும் நல்லுலகில் முற்போக்கு நிலைய வித்துவான்களாய் இருப்பது நான் அறியாததொன்றல்ல..

யோனி, ஆனந்ததம், அல்குல், திதலையகம், மாண்வரியகம் என இலக்கியமும், சங்கப்பாடல்களும் சொல்வது, அதன் தொனியில் பெண்ணை நோக்கிய நேரடி வசைக்கான அர்த்தத்தை சேர்காததானாலேயே. இன்னும் சொல்ல வேண்டுமென்றால் அல்குல் யோனி இவ்விரண்டும் வசைச்சொல்லாக உருமாறியிருந்தால் அதை எழுத மாட்டார்கள்.

( இன்னும் சில விலக்கமாய் தமிழில் நிர்வாணத்துக்கு சொல்லே கிடையாது. அப்படியென்றால் தமிழில் யாரும் அம்மணமாக இருந்ததில்லையா என்ற ஆய்வும் தேவையே.)

இடக்கரடக்கலுக்கு
எடுத்துக்காட்டாக;

தாயாகப் போகிறவளே
உன் யோனியைப் பிளப்பேன்
உன் யோனியை விரிப்பேன்
தாயையும் சேயையும் பிரிப்பேன்
சூல் பையிலிருந்து குழந்தையைத் தனியே தனிப்படுத்துவேன்
சூல்பை கீழிறங்கட்டும்

-       இது அதர்வ வேதத்தில் வருகிற மகப்பேற்றின் போது வரும் பாட்டு.
இதை யோனி என்று மொழி பெயர்த்தவர்..நேரடியாக

தாயாகப் போகிறவளே
உன் புண்டையைப் பிளப்பேன்
உன் புண்டையை விரிப்பேன்

என்ற ரீதியில் மொழி பெயர்த்தால் தொனியும் அர்த்தமும் இணைந்து தரும் விளக்கம் என்னவென வியாக்யானிகள் பொருத்திப் பார்க்கலாம். மடல் வாழைத் துடை இருக்க என்று எழுதிய வாலி சமூகத்தில் கவிஞராகவும், எப்படி.. எப்படி.. சமைஞ்சது எப்படி.. என்று எழுதியபோது ஆணாதிக்க வக்ரப் பேர்வழியாகவும் மாறியது இந்த இடம் பொருள் ஏவல் சாந்த புரிதல்களினாலேயே.

இப்படி இழுத்து வைத்து இலக்கியம், எழுதுமுறை, கூறு முறை என்ற எந்த வித்தியாசமும் இல்லாமல் நிறுத்தி வைத்து அவ்வுறுப்பைச் சுட்டினால் அவர்களை சவுக்கால்தான் அடிக்க வேண்டுமென்றால் தமிழ் கூறும் நல்லுலகில் சங்கப் புலவர்கள் தொடங்கி பிட்டுக்கு வாங்கிய அடியோடு இறையனார் இன்னும் பல கோடுகள் தாங்கி வரிப்புலியாய்த் திரிதல் வேண்டும்.

மற்றபடி குடும்ப பெண்கள் என்று சொல்லி கட்டுரையின் பொருளை இரண்டிரண்டு வரியாக பிரித்தெடுத்தால் தொனியும் அர்த்தமும் மாறத்தான் செய்யும். குழந்தைகளுக்கு அதைச் சொல்லிக்கொடுக்காதீர்கள் இதைச் சொல்லிக்கொடுக்காதீர்கள் என்று நானறிந்து அறிவுரை மழைகளை குழந்தை செல்வங்களுக்கு வாரி வழங்கிக்கொண்டிருக்கும் குடும்ப ஆண்கள், என் மகள் அப்படிப் பேசினால் என் மகன் இப்படிப் பேசினான் அய்யோ அழகு எனக் கொஞ்சும் குடும்பப் பெண்கள்… உங்கள் மகன் இப்படி அறுவெறுப்பாக பேசுகிறானே என்ன செய்ய என்று கேட்பது ஒரு சமூகக் குற்றம். அழகாக பேசுகிறானே என்றபோது உங்கள் தாய் தந்தையர்க்கான முகம் குமிழ் பூத்து நெக்கு விடும்போது உன் மகன் இப்படியா என சுட்டிக் காட்டினால் குடும்பப் பெண்கள் கருத்துரிமை.

இத்தனைக்கும் சுட்டிக்காட்டப்பட்ட அப்பெண்கள் உங்கள் குழந்தைகள் போல் எத்தனையோ குழந்தைகளுக்கு கற்றுக்கொடுக்கும் பள்ளிக்கூடம் வைத்து நடத்துபவர்கள்.


சம்பந்தப்பட்ட அனிருத் சிம்பு இவர்களின் பாடல்களை கலைஞர்களாக இருக்கும் அவர்கள் வீட்டுப் பெண்கள் இதை எப்படி புரிந்து கொள்வார்கள் செயலாற்றப் போகிறார்கள் என்று கொற்றவை கேட்டதுமே குடும்ப ஆண்கள் கொந்தளிப்பது மிகச்சரியாக இருக்கிறது. புண்டைப் பெண்ணியம், பொம்பளை என்ற ரீதியில். மகிழ்ச்சி. நிற்க.

உங்கள் மழலைகள் தூங்கும் நேரம் தவிர அவர்களை வளர்ப்பது சமூகம். வீட்டுக்கு வெளியே விட்டுவிட்டுப் போனால் சாலை மதில் சுவர்களில் தொங்கும் போஸ்ட்டர்களிலிருந்து அவர்களுக்கு சமுகம் கற்றுத்தரும் சித்திரங்கள் ஏராளம். வாழ்க தமிழ்ச் சமூகம். என் மகன் இசையமைத்து ஹிட்டான பாடல் என அவர்கள் பள்ளி விழாக்களில் ஆடச் சொல்லி உறுப்பின் பெயர் தெரியாது உங்கள் செல்ல மகள் இடுப்பை அசைத்து ஆடும் போது என்ன செய்வீர்கள். பள்ளியைக் குற்றம் சாட்டுவீர்களா. அல்லது படித்தவரைக் குற்றம் சாட்டுவீர்களா.

சிறு விளக்கம்.

சிம்புவுக்குப் பதிலாக அவர் குடும்ப ஆணான டி ஆர் முதலில் களத்தில் இறங்கி மைந்தனைக் காப்பாற்ற துடித்திருக்கிறார்.

மேலும் சிம்பு டி ஆர் அனிருத் அவரது குடும்பப் பெண்களுக்காகப் பேசிய குடும்ப ஆண்களை மதிக்கிறேன். இனியாவது அவர்கள் பொதுவெளியில் எப்படி  செயல்படுகிறார்கள் என்று பார்க்க ஆவலாக உள்ளேன்.

காதலியின் சுண்டு விரல் போட்டோ போட்டு இன்னைக்கு இவகூட, அடுத்த நாள் இன்னொரு பெண்ணின் நகத்தைப் போட்டு இன்று இரவு இவளோடு என்று குலாவும் போதும்..எனக்கு ஒருத்தி கிடைச்சிட்டா என்பதும், அதற்கு விருப்பக் குறிகளை அள்ளி வழங்கியதோடு, அடே நண்பா நானு நானு,… என நாக்கைத் தொங்கப் போடுவதும், அக்குடும்ப ஆண்கள் அக்காதலிகளின் புகைப்படங்களைக் கூடப் போட துணிவில்லாது இருப்பதும் கூட புண்டை ஆராய்ச்சிக்கு இடமளிக்கக் கூடும் என்ற பயத்தாலேயா.. அவ்வகை மாதிரிகளான குடும்ப ஆண்களையும் மதிக்கிறேன்

தங்கள் தோழிகளின் தோளில் சாய்ந்து தோழி எனக் கூடச் சொல்ல வராது அக்கா என்று பாத்திரவார்ப்பை மாற்றுவது, அதே சமயம் இன்னொருவரின் அக்காவை அடியே உன்னை லவ் பண்றேண்டி எனச் சொல்லுவதும் குடும்ப ஆண்களின் வழக்கம்தான்.

மீச்சிறு குறிப்பு.

1 இரு ஆண்கள் புண்டையைப் பற்றி பாடியது இருக்கட்டும். ஒரு பெண் அதை எப்படி எழுதலாம் என்ற கேள்வியை மறைத்துக்கொண்டு குடும்பப் பெண்கள் குடும்பப் பெண்கள் என்று குடும்ப ஆண்கள் கூவியது மகிழ்ச்சியைத் தந்தது. ஏனெனில் முகநூலில் குடும்பமில்லாமல்தான் குடும்பப் பெண்களை அவர்கள் வாழ்த்துவதும் வரவேற்பதும்.

2 கோவன் நேரடியாக முதலமைச்சர் ஜெயலலிதாவை உத்தமி உல்லாசி என்று பாடி, படம் போட்டுக் காட்டியதையும் மகிழ்வுடன் கேட்டு, புரட்சி வாயை இழுத்து மூடி, பேசாமல் அமைதி காத்த முற்போக்கு குடும்ப ஆண்களுக்கும் முற்போக்கு பெண்ணிய குடும்பப் பெண்களுக்கும் என் அன்பு. புரட்சியாளர்கள் பேசினால் அது சாலத்தகும்.கெட்டாலும் மேன் மக்கள் மேன் மக்களே.

ம.க.இ.க கோவன் பிரச்சினையில் உளவியலாய் நான் கற்ற கூறுகள் நான்கு.

1 அப்பாடலின் பாடபேதத்தை எதிர்த்தால் வீட்டுக்கு வந்து சம்பந்தப்பட்ட அமைப்பினர் பேசக் கூடும்.

2 அவர்கள் நேரடியாக உங்கள் குடும்பப் பெண்களை பெயர் சொல்லி சந்திக்குக் இழுக்கக் கூடும்.

3 முற்போக்கு புரட்சிகர முகமூடிகள் கிழிந்து தொங்கும்.

4 மெய்நிகர் உலகத்தில் நீங்கள் சக ஆண்களுக்கு, அல்லது சக பெண்களுக்கு விட்ட தூதுக்களை கணிணி அறிவோடு பிறாய்ந்து உங்கள் இல்லத்தில் வீசக் கூடும்.

இவ்வளவே.

இதில் நனிகூர் அறிவுடையோர் கூறும் கூற்றாகச் சொன்னது அவர்களாவது ஒரு தடவை சொன்னான் இந்தம்மா எத்தனை தடவை சொல்லுது… இணையத்தின் கொற்றவையின் புழங்கு வெளி சிறிது. அவர் எழுதிய எதிர்வினை எத்தனை பேரை அண்டப் போகிறது. ஆண்சொல்லாடலில் கரைக்கப்பட்ட சிறு பெருங்காயம் அது.

முகப் புத்தகத்தில் உங்கள் நாலு வயசுக் குழந்தை இயங்கத் தொடங்கி அவர் கொற்றவையை அறிந்திருந்தால் இது குற்றமே.  கணிணியே காணாத மக்களையும் அவர் தம் குழந்தைகளையும் சிம்பு அனிருத் வகையறாக்கள் அண்டும் விதம் அவர்களின் திரைத் துறை ஒலிப்பெருக்கிகள் அவர்கள் இல்லத்தில் ஒலிக்கும்போது முக நூலோ அல்லது வாட்ஸ் அப்போ அறியாத அக்குழந்தைகள் எழுந்து பாடி ஆடினால் என்ன செய்வீர்கள். விளக்குங்கள் தகைமையுள்ளோரே.

ஒரு பாடலின் இயங்கு வெளி குறித்து சிற்றறிவும், ஊடக விளம்பர மோகத்தின் பாய்ச்சலும் அறியாத உங்களை எண்ணி பெருமிதம் அடைகிறேன்.

4 அனிருத்தின் தந்தையும் குடும்ப ஆணாகவும் உள்ள ராகவேந்தர் தன் மைந்தனின் இசை குறித்தும் கடவுள் கடாஷத்தைக் குறித்தும் முன்னொரு சமயம் விதந்தோதிய சுட்டி.


வாழ்த்துக்கள்.
 வசுமித்ர

நன்றி - வசுமித்ர
...மேலும்

Dec 15, 2015

இந்த காவாலிகளின் பாட்டு மட்டும் தான் பெண்களை இழிவுபடுத்துகிறதா? - விஜயகுமாரன்


தமிழ்ச்சினிமா கழிசடைகள் காலங்காலமாக தமிழனின் மானத்தை விற்று வருகிறார்கள். தமிழ்ப் பெண்களை ஆணாதிக்க சொல்லாடல்களாலும், காட்சிப் படிமங்களாலும் பாலியல் வல்லுறவு செய்து வருகிறார்கள். அதன் தொடர்ச்சியாக இந்த இரண்டு காவாலிகளும் தங்களது மன விகாரங்களை, வக்கிரங்களை, அழுக்குகளை கொட்டி பெண்களை கேவலப்படுத்துகிறார்கள். மனிதர்கள் என்று சொல்லவே கூசும் இப்படிப்பட்ட பிறவிகள் தான் தமிழருக்கு கலைஞர்கள் என்னும் போது தமிழ்ச்சினிமா என்றைக்குமே சேறு நிறைந்த சாக்கடையாகவே இருப்பதில் வியப்பேதும் இல்லை.

"சாரயத்தை விற்காதே" என்று ஏழைமக்கள் குடிக்கு அடிமையாவதை எதிர்த்து மக்கள் கலை இலக்கியக் கழகத்தின் தோழர் கோவன் பாடியதற்காக அவரை தமிழ்நாட்டின் பேயரசு கைது செய்தது. ஆனால் இந்த இரண்டு காவாலிகளையும் தமிழக அரசு தொடவில்லை. தமிழ்நாட்டு அரசின் தேசிய வியாபாரம் சாராயம் காய்ச்சி விற்பது என்னும் போது "சாராயத்தை விற்காதே" என்பது தேசத்துரோகம் தானே. இப்படிப்பட்ட அரசிற்கு பெண்ணின் உடல் உறுப்பை பாலியல் வசைச்சொல்லாக வைத்து பெண்களை கேவலப்படுத்தும் பாடல் தேசியகீதமாகத் தான் இருக்கும்.

வெளிநாடுகளில் தமிழர்களுடன் பழகும் பெரும்பாலான வெளிநாட்டவர்கள் இந்த தமிழ் வசைச்சொல்லை தெரிந்து வைத்திருக்கிறார்கள். ஆனால் மற்ற நாட்டவர்கள் தமது வசைச் சொல்களை இந்த அளவு வெளியில் சொல்வதில்லை. கல் தோன்றி, மண் தோன்றா காலத்தே தோன்றி விட்டோம் என்று புளுகித் திரியும் இந்த பண்பாடு இல்லாத, பகுத்தறிவு அற்ற மடையர் கூட்டம் தமது தாய்மாரை, மனைவிமாரை, மகள்மாரை, சகோதரிகளை பாலியல் நிந்தனை செய்ய வெளிநாட்டவருக்கு சொல்லிக் கொடுக்கிறோம் என்று மண்டையில் மயிரளவு கூட அறிவு இல்லாத ஆணாதிக்க கூட்டமாகத் தான் இருந்து வருகிறது.

இந்தக் பொறுக்கிகளின் பாடலைக் கேட்டு விட்டு தமிழ்ப்பெண்களை அவமானப்படுத்துகிறார்கள் என்று பொதுவெளியில் எதிர்ப்பு எழுகிறது. நல்லது, ஆனால் எம்பெண்களின் வாழ்வை இந்தப்பாட்டு மட்டுமா சீரழிக்கிறது?; அவமானப்படுத்துகிறது?. பாலியல் தொழிலாளிகளை, அந்த பரிதாபத்திற்குரிய பெண்களை வேசை என்று இந்த மூடர்கூட்டம் ஏளனம் செய்வது கடைந்தெடுத்த அயோக்கியத்தனம் இல்லையா? இந்தப் பன்றிகளின் கருத்துப்படியே பாலியல் தொழில் தவறு என்றே வைத்துக் கொள்வோம். அந்த ஏழைப்பெண் குற்றவாளி என்றால் அந்த குற்றத்தை சேர்ந்து செய்த ஆண் குற்றவாளி இல்லையா? அந்த அபலைப்பெண்ணை வேசை என்று சொல்லுபவர்களின் மொழியில் ஆணைச் சொல்ல சொல் எதுவும் இல்லை என்பது கடைந்தெடுத்த அயோக்கியத்தனம் இல்லையா?

இந்த இருபத்தியோராம் நூற்றாண்டில் கூட ஆணும், பெண்ணும் அன்புடன் கூடி குலாவி மகிழ வேண்டிய திருமண வாழ்க்கைக்கு முதலாவது விதியாக தமிழ்ச்சமுதாயத்தில் சீதனம் என்னும் பெருங்கொடுமை இருக்கிறது. குறுந்தொகையின் பாடல் சொல்லும் "செம்மண்ணில் மழை நீர் கலந்தது போல அன்புடை நெஞ்சங்கள் தாம் கலந்தனவே" என்று ஆனால் இன்று வீடும், நகையும், இலட்சக்கணக்கில் பணமும் கலந்தால் தான் அண்ணல் அவளை நோக்குவான். சீதனப்பணம் இல்லாமையால் இல்வாழ்க்கை என்ற ஒன்றே இல்லாமல் எத்தனை பெண்களை கொடுமைப்படுத்துகிறது எம் தமிழ்ச்சமுதாயம்.

இலங்கைத் தமிழ்மக்களின் போராட்ட நெருப்பில் தம் வாழ்வை எரித்த எமது பெண் போராளிகள் இன்று வறுமை சூழ்ந்த தனிமை வாழ்வு வாழ்கிறார்கள். எந்தச் சமுதாயத்திற்காக போராடப் போனார்களோ அந்த தமிழ்ச்சமுதாயமே கேலியும், கிண்டலும் செய்து ஒதுக்குகிறதே! பொது வாழ்க்கைக்கு சென்றதையே ஒரு குறையாக, அவர்களின் மேல் விழுந்த கறையாக இந்த ஆணாதிக்க சமுதாயம் சொல்கிறதே!. இந்த முட்டாள்தனம், பெண்களை இழிவுபடுத்தும் ஆணாதிக்க வெறியின் உச்சம் இல்லையா?

வன்னியில் பற்றைக்காடுகளை எரித்துக் சென்ற போர் மரணத்தையும், வறுமையையும் வழியெங்கும் வீசி எறிந்து சென்றது. வாழ்வு தந்த வயல் எங்கும் இராணுவத்தின் முள்வேலிகள். இலங்கை அரசு தமிழ்மக்களின் வறுமையைப் பயன்படுத்தி இராணுவத்திற்கு ஆள் சேர்த்தது. ஆண்களும், பெண்களும் வயிற்றுப்பசி தீர்க்க வேறு வழியின்றி தம் சக மனிதைரைக் கொன்ற இலங்கை இராணுவத்தில், தம்மைக் கொல்ல முனைந்த இலங்கை இராணுவத்தில் சேர்ந்தனர். ஆண்கள் சேர்ந்ததைப் பற்றி எதுவும் சொல்லாத இந்த கேடுகெட்ட சமுதாயம் இராணுவத்தில் சேர்ந்த பெண்களைப் பற்றி கதைகள் கட்டியது. இராணுவத்தால் அந்தப் பெண்கள் பாலியல் வல்லுறவு செய்யப்பட்டார்கள் என்று பொதுவெளியில் மட்டுமல்ல புலம்பெயர் தேசங்களில் முற்போக்கு மயிர் புடுங்குகிறோம் என்று சொல்லிக் கொள்பவர்களும் சேர்ந்து அந்த ஏழைப்பெண்களை அவமதித்தார்கள்.

இன்றைக்கு இந்தப் பொறுக்கிகளின் பாட்டு வந்தவுடன் கல்லைத் தூக்கிக் கொண்டு வருபவர்களே; சீதனம் கேட்பவர்களின் மீதும் இந்தக் கற்களை எறியுங்கள். வறுமையில் வாழும் பெண்களை கேவலப்படுத்துபவர்களின் மீதும் இந்தக் கற்களை எறியுங்கள். எமது பெண்போராளிகளை சமுதாயத்தில் இருந்து ஒதுக்குபவர்களின் மீதும் கற்களை எறியுங்கள். "பெண்ணாகி வந்ததொரு மாயப்பிசாசம்" என்று பெண்களை அவமானப்படுத்தும் மதவாதிகளின் மீது கற்களை எறியுங்கள்.

நன்றி - http://www.ndpfront.com/
...மேலும்

Dec 14, 2015

அது 'பீப்' பாடல் இல்லை; 'ஹேட்' பாடல்! - குட்டி ரேவதி


பீப் பாடலுக்கு எதிர்ப்பு வலுக்கிறது. அது வெறுமனே ஒரு பாடலில் அல்லது சினிமாவில் 'கெட்ட வார்த்தையைப்'பயன்படுத்துதல் குறித்த உரிமை, கருத்துரிமை என்பதாகத் திசைதிருப்பப்படுகிறது. அநியாயம்.

அந்த 'பீப்'பாடல் ஒரு hate song. பெண் வெறுப்புப்பாடல். இலக்கியம், சினிமா, ஊடகம் என எல்லா துறைகளிலும் வியாபித்திருக்கும் பெண் வெறுப்பின் சீழ் தான் இப்படி அதிகாரத்துடன், மறைமுக இச்சையுடன், நமுட்டுச்சிரிப்புடன் வெளிப்பட்டிருக்கிறது.

இதையெல்லாம் கலையாகவும் கலையுரிமையுடனும் ஒப்பிட்டு முழக்கமிடுவது என்பது செய்வதையும் செய்துவிட்டு அப்படிச் செய்யவில்லை என்பதான தப்பித்தல் தந்திரம் தான்.

இன்றைய சமூக ஆண்களிடம், தாய்ப்பாசம், அண்ணன் - தங்கைப்பாசம், தோழி, காதலியர் என்பதெல்லாம் அர்த்தமற்ற, உணர்வுகளற்ற வெற்று வார்த்தைகள். எல்லாமே Use & Throw.

காலங்காலமாக, கலை ஊடகங்களால் விதைக்கப்பட்டுவந்த 'ஆணாதிக்க' (அரதப்பழசான வார்த்தை தான்) பழக்கங்கள் தாம் இன்று அனிருத்தாகவும் சிம்புவாகவும் வெடித்திருக்கிறது.

பெண்கள் மீது குருட்டாம்போக்கில் அமிலத்தை வீசும் ஆண்களாய் இன்றைய தலைமுறை மாறிவிட்டதற்கு, அதிலும் எந்தக்குற்றவுணர்வுமில்லாமல் பொதுவெளியில் வெளிப்படுத்த வாய்ப்பு உண்டாக்கித் தந்ததற்கு, நம்முன் உள்ள எல்லா ஊடகங்களும் பொறுப்பு ஏற்கவேண்டும்.

நம்மைச் சுற்றியுள்ள எந்த ஆணுக்கும் குறைந்தபட்ச அளவில் கூட பெண்கள் மீது மரியாதையோ அல்லது அது இல்லாதது குறித்த அவமானமோ இல்லை.

எங்கேயாவது அப்படி ஒன்றிரண்டு ஆண்கள், பெண்கள் மீது நன்னடத்தையுடன் நடந்துகொள்வதைப் பார்க்க நேர்ந்தால் வேறு கிரகம் வந்துவிட்ட உணர்வு எழுகிறது.

நண்பர்கள் எல்லோரும் சமீபத்திய பயணத்தில், டி.ராஜேந்திரரின் அண்ணன் - தங்கை பாசப்பாடல்களைக்கேட்டு சிலாகித்துக் கொண்டு வந்தோம்.

அப்படியான உறுதிப்பாடான பாடல்கள் இன்றைய வாழ்க்கையில் மிகவும் பொருத்தமற்றவையாகவும் தொடர்பற்றவையாகவும் ஆகிவிட்டதன் நவீன விடங்கள் தான் 'அனிருத் - சிம்பு'

உண்மையில், இதை எதிர்த்துப் போராடவேண்டியவர்கள் மற்ற ஆண்கள் தாம். இப்படியான பெண் வெறுப்புப் பாடல்கள் சமூகத்தில் மற்ற ஆண்களுக்கும் இழிவைச் சம்பாதித்துத் தருகிறது என்று நம்பினால், எல்லா பெண்களையும் அவமதிக்கிறது என்று நம்பினால் உண்மையில் 'ஆண்கள்' தாம் தெருவிறங்கிப் போராடவேண்டும்.

திரைத்துறையில், 'அனிருத் - சிம்பு' தொடர்ந்து இயங்குவதைத் தடைசெய்யவேண்டும். சமூகத்தின் ஒட்டுமொத்த பெண்களையும் அவமதித்ததற்கு உரிய தண்டனை தரப்படவேண்டும். மற்ற ஆண்களுக்கும் அவமானம் கொண்டு சேர்ப்பதால், ஆண்களிடம் மன்னிப்பு கேட்கவேண்டும்.

இப்படியான 'பெண் வெறுப்பு' ஆண்கள் திருந்துவதற்கு இருக்கும் ஒரே வாய்ப்பு, அவர்களுக்குப் பிறக்கும் மகள் மீது, இந்தச் சமூகம் செலுத்தும் வன்முறையைக் காண நேர்வது தான் என்பது எனது என்றென்றைக்குமான நம்பிக்கை.

ஆனால், அப்படியெல்லாம் நிகழ்வதற்குள் மற்றவர்களின் மகள்கள் மீதெல்லாம் கடுமையான வன்முறையை இவர்களே ஏவிவிட்டுவிடுவார்கள் போல. அதுவரை, நாம் காத்திருக்கவா போகிறோம்.

அது 'பீப்' பாடல் இல்லை; 'ஹேட்' பாடல். பெண்களை நேசிக்கத்தெரியாதவர்களின், நேசிக்கமுடியாதவர்களின் பாடல்.

குட்டி ரேவதியின் முகநூல் குறிப்பிலிருந்து நன்றியுடன்
...மேலும்

உஷா, லக்ஷ்மி ரவிச்சந்தர், இலக்கியா, வைஷ்ணவி மற்றும் உங்களது உறவுகளுக்கு ஒரு திறந்த மடல் - நிர்மலா கொற்றவை



ஆக்கப்பூர்வமாக வேலை செய்வதை விட்டுவிட்டு பயனற்ற, அதாவது உருப்படாத காரியங்களைச் செய்பவர்களைப் பார்த்து கிராமப்புற பகுதிகளில் “ஏலேய் உருப்படுற வழியப்பாருலே “பு..டை” நாயம் பேசிட்டு திரியுறவ” என்று சொல்வார்கள். ஓர் உயிரை பிறப்பிக்கும் பெண்ணின் உடல் உறுப்பிற்கு இந்த ஆணாதிக்க சமூகத்தில் இவ்வளவுதான் மரியாதை என்றோ அல்லது பெண் பித்து பிடித்து அலையாமல் வாழ்க்கையில் உருப்படும் வழியைப் பார் என்றோ சொல்வதாகவும் நாம் அதைப் புரிந்து கொள்ளலாம். ஆனால், இன்று ஒட்டுமொத்த தமிழகத்தையும் “பு..டை” நியாயம் பேச வைத்த பெருமை உங்கள் மகன்கள் மற்றும் சகோதரர்களாகிய அனிருத்துக்கும், சிம்புவுக்கும் போய்ச் சேரும்.

இதை எண்ணி உண்மையில் நீங்கள் பெருமைப்பட வேண்டும். ஏனென்றால் ஒட்டுமொத்த தமிழகமும் மழை வெள்ளத்தில் தத்தளித்துக்கொண்டும், உயிரையும் உடைமையையும் இழந்தும் துன்புருகையில் இவர்கள் “பு..டை” ஆராய்ச்சி செய்திருப்பதோடு, ஒட்டுமொத்த தமிழகத்தையும் அவ்வாராய்ச்சியில், அதாவது அந்தச் சொல் உண்மையில் எதைக் குறிக்கிறது எனும் ஆராய்ச்சியில் ஈடுபட வைத்துள்ளார்கள். அடடா! ஆண் சமூகத்திற்கு அவர்கள் ஆற்றியிருக்கும் இம்மாபெரும் தொண்டைநினைத்து நீங்கள் நிச்சயம் பெருமைப்பட வேண்டும்.

மாண்புமிகு அம்மாக்களே, சகோதரிகளே,

உங்கள் மகண்களும், சகோதரர்களும் பாடி இசையமைத்து ‘லீக்’ ஆகிவிட்டதாகச் சொல்லப்படும் பீப் பாடலை நீங்களும் கேட்டிருப்பீர்கள் என்று நினைக்கிறேன். நாடும் நாட்டு மக்கள் உணவுக்கும், உயிருக்கும், இருப்பிடத்திற்கும் செத்துப் பிழைக்கும் வேளையில் உங்கள் மகன்கள் மற்றும் சகோதரர்களாகிய அனிருத்துக்கும், சிம்புவுக்கும் தலை போகும் பிரச்சினையாக எது இருக்கிறது? “என்னா பு..டைக்கு லவ் பண்ணுகிறோம்” என்பதுதான். இதைத் தெளிவு படுத்தும் கடமை பு..டையோடு பிறந்த அனைத்துப் பெண்களுக்கும், குறிப்பாக பு..டையின் வழியாக அவர்கள் இருவரையும் ஈன்ற தாய்மார்களாகிய உங்களுக்கும் இருப்பதாக நான் எண்ணுகிறேன்.

அதன் முதல் பகுதியாக, பு…டை என்று பொறுக்கிகள் உடைத்து சொல்லியிருக்கும் அந்தச் சொல்லின் எழுத்தாக்கம் புண்டை என்பதாகும். அச்சொல்லின் பொருளை அவ்வுறுப்பைக் கொண்டவர்களாகிய நீங்கள் நிச்சயம் அறிந்திருப்பீர்கள். பெண்ணின் பிறப்புறுப்பான புண்டை க்கு  தமிழில் அல்குல்*, யோனி, பாலுறுப்பு என்று பல்வேறு சொற்கள் உள்ளன. ஆனால் இந்த புண்டை என்ற சொல்லானது ஒரு வசைச் சொல்லாக, அதிலும் குறிப்பாக பெண்களை இழிவுபடுத்தும் விதமாகத்தான் பயன்படுத்தப்படுகிறது என்பதை நீங்கள் ஏற்றுக்கொள்வீர்கள், இல்லையா? ஆங்கிலத்தில் இச்சொல்லை  cunt என்பார்கள், உலகளாவிய அளவில் அச்சொல் வசைச்சொல்லாகத்தன் பயன்படுத்தப்படுகிறது. ஆணாதிக்க சமூகம் அதை அப்படித்தான் பயன்படுத்தும், ஆனால் ஒரு பெண்ணாக அந்த அல்குலின் மகத்துவத்தை நீங்கள் அறிவீர்கள்தானே. அறிந்து என்ன பயன், பிள்ளைகளுக்கு அதைச் சரியாக சொல்லிக் கொடுத்து வளர்க்கத்  தவறிவிட்டீர்கள் போலும், ஆகவே இப்போது உங்களுக்கும் சேர்ந்த புண்டையுள்ள அனைத்து தமிழ்நாட்டுப் பெண்களும் பாடம் எடுக்கும் நிலை வந்துவிட்டது.

முதலில்,

உஷா, அப்பாடல் குறித்து உங்கள் மகனாகிய சிம்பு என்ன சொல்லியிருக்கிறார் தெரியுமா? (படிக்க: http://tinyurl.com/hbl8b8p) நாங்கள் தனிப்பட்ட முறையில் இசையமைத்து வைத்திருந்தோம் அது லீக் ஆகிவிட்டது என்றெல்லாம் சொல்லி இருக்கிறார். உங்கள் மகனுக்கு பண்பு இருக்கிறதோ இல்லையோ நல்ல சாதுரியம் இருக்கிறது. (ஆனால் அதுவும் அரைகுறை என்பதைப் பின்னர் பார்ப்போம்). போகட்டும்! அவர் சொன்னது போல் அது அவரது படுக்கையறைக்குள் மட்டுமே ஒலித்திருந்தால் இன்று தமிழகம் புண்டை நியாயம் பேச வேண்டி வந்திருக்காது. ஆனால், இப்போது (திட்டமிட்டோ, திட்டமிடாமலோ) அவரது படுக்கையறையில் அவரும் அனிருத்தும் சேர்ந்து சுய-மைதுனம் செய்த முனகல்கள் தெருவுக்கு வந்துவிட்டது. சுய-மைதுனம் தவறில்லை என்றாலும், அச்செயலினால் வெளிவந்த விந்துவை அவர்கள் ஒரு குப்பியில் பிடித்து ஜன்னலுக்கு வெளியே கசியும்படி வைத்ததன் விளைவாக, அதிலிருந்து தெரிக்கும் அமில விந்துவானது இன்று விசம் போல் பரவி ஏற்கணவே ஆணாதிக்க சிந்தனைகளால் செல்லறித்துப் போயிருக்கும் பல ஆண்களின் மூளையை மேலும் விஷமாக்கிவிட்டதுஇனி தெருவில் நடக்கும் ஒவ்வொரு பெண்களையும் பார்த்து ஆண்கள் அந்த அமிலத்தைக் கக்குவார்கள் என்பதாலும் நாங்கள் பேச வேண்டியுள்ளது.


சிம்பு வேறொன்றும் கேட்டிருக்கிறார், “என்னைக் கேள்வி கேட்பவர்கள் வீடுகளில் நான் கேமராவை வைத்து அவர்கள் பண்ணும் விஷயங்களைப் பார்த்து நீங்கள் ஏன் இப்படி எல்லாம் பண்ணுகிறீர்கள்" என்று கேட்டால் என்னவாகும் என்று சிந்தித்துப் பார்க்க வேண்டும்.” முதலில், அவருடைய வீட்டுப் படுக்கையறையை யாரும் எட்டிப் பார்க்கவில்லை என்றும், அவராக ஜன்னலைத் திறந்து வைத்திருந்தாலே ஒழிய உள்ளே நடப்பது வெளியே தெரியாது என்பதையும் அந்த மரமண்டைக்கு தெளிவுபடுத்துங்கள். மேலும், உங்கள் தவப்புதல்வனுக்கு மற்றொன்றையும் சொல்லிக் கொடுங்கள், ஒருவேளை அவர் சொல்வது போல் யாரோ எட்டிப் பார்த்து ‘கசிய’ விட்டுவிட்டார்கள் என்றே வைத்துக்கொண்டாலும், தனக்கு நேர்ந்த துன்பம் மற்றவருக்கு நேரக்கூடாது என்று எண்ணி, அப்படிச் செய்யாதீர்கள் என்று சொல்வதுமே பண்புள்ள செயலாக இருக்க முடியும்.  மேலும், உண்மையிலேயே அவர் கூற்றில் உண்மையிருக்கும் எனில், நாங்கள் தனிப்பட்ட முறையில் பாடலிசைத்துக் கொண்டிருந்தோம் அது எப்படியோ கசிந்து விட்டது, பெண்களை இழிவுபடுத்தும் எண்ணம் எங்களுக்கு இல்லை, இது ஒரு தனிப்பட்ட உணர்ச்சிக் கொந்தளிப்பு இப்படி ஏதேனும் சொல்லி இருப்பார், ஆனால் திட்டமிட்டு வெளியிட்டு, இதுபோன்ற எதிர்வினைகள் வந்தால் என்ன பதில் சொல்ல வேண்டும் என்று முன்பே பதிலையும் தயாரித்து வைத்திருந்தாரோ  என்றுதான் இப்போது எண்ணத்தோன்றுகிறது. அதிலும், இதுபோன்ற ஆடியோக்களை ‘லீக்’ செய்வதில் உங்கள் மகன் கை தேர்ந்தவர் என்பதை நீங்களே அறிவீர்கள், இல்லையா.

பெண்களைத் தொட்டு நடிப்பது கூட தவறு என்று கருதும் திரு. டி.ராஜேந்தர் அவர்களே, இந்தப் புண்டை பாடல் பற்றியும், தொடர்ந்து உங்கள் மகன் பெண்களை இழிவுபடுத்தும் விதமான வசனங்களையும், பாடல்களையும் கொடுப்பது பற்றி உங்களுக்கு ஏதேனும் கருத்துள்ளதா?

லக்‌ஷ்மி, ராகவேந்தர் நீங்கள் இருவரும் கலைஞர்கள். (அனிருத் யார் என்று ஆராயும் துர்பாக்கிய நிலைக்கு இன்று உள்ளானேன்). அனிருத் தொடர்ந்து இதுபோல் பொறுக்கித்தனமான பாடல்களைப் படைப்பது பற்றி உங்கள் இருவரது கருத்து என்ன? அதிலும் கலை என்பது சரஸ்வதி கடாட்சம், கலை என்பது தெய்வீகமானது என்றெல்லாம் சொல்லும் பார்ப்பனக் குடும்பத்தில் பிறந்தவர்கள் நீங்கள், சொல்லுங்கள் அனிருத் இசையமைக்கும் கொல வெறி, புண்டை பாடல்களும் சரஸ்வதிதேவியின் கடாட்சத்தினால் பிறந்ததுதானா? இதுவும் இசைதான், கலைதான் என்றால் தியாகராயர் தொடங்கி பாலமுரளி கிருஷ்ணா போன்றோர் வரை எவரேனும் இப்படி புண்டைப் பாடல்களை பாடியிருந்தால் சொல்லவும்.  நீங்கள் வணங்கிப் பின்பற்றும் நாட்டிய சாஸ்திரத்தில் இப்படிப்பட்ட பாடல்களும் கலையென எங்கேனும் குறிப்பிடப்பட்டுள்ளதா? இல்லையென்றால், உங்கள் முன்னோர்கள் கலையென்று ஒன்றை வரையறுத்திருக்க, நீங்களும் உங்களது வாரிசுகளும் ஆச்சார அனுஷ்டானங்களை மீறி வேறு ஏதோ ஒன்றை கலை என்று வியாபாரம் செய்கிறீர்கள் என்று நாங்கள் புரிந்துகொள்ளலாமா? உங்கள் மத நம்பிக்கைப்படி இது பாவத்தில் சேர்த்தியா அல்லது புண்ணியத்திலா?

அதேபோல், ராகவேந்தர் ஒரு பேட்டியில் அனிருத்தின் திறமை அந்த கடவுளர்கள் அருள் பாலியது என்றெல்லாம் காலாட்டிக்கொண்டே பெருமை பேசியிருக்கிறார். சொல்லுங்கள், உங்கள் கடவுளர்களும் இப்படி சதா சர்வ காலமும் புண்டை ஆராய்ச்சியில் ஈடுபடுபவர்கள்தானா? யார் அந்தக் கடவுளர்கள், அவர்கள் இசையமைத்த மற்றும் அவர்களது பத்தினிகள் நடனமாடிய புண்டைப் பாடல்கள் இருந்தால் பகிரவும். பார்க்க, கேட்க ஆவலாக உள்ளோம். இருபிள்ளைகளில் எவர் முதலில் பு..டையை வெல்வது எனும் போட்டிகள் நடந்த புராணங்கள் ஏதேனும் இருக்கிறதா?

இத்தருணத்தில் எனக்கொரு வேண்டுகோள் உள்ளது, இப்போது டிசம்பர் மாதம், மன்னிக்கவும், தமிழ்நாட்டுக்கு மட்டும் அது பார்ப்பன ஆதிக்க மாதம். அது எம் தலையெழுத்து, போகட்டும். இந்த மார்கழி மாத குளிருக்கு இதமாக நான் ஒரு கலை நிகழ்ச்சி ஏற்பாடு செய்யவிருக்கிறேன். அதில் ஒப்பனிங் சாங் இந்தப் புண்டை பாடல்தான் இதற்கு லக்‌ஷ்மி நீங்கள் நடனமாட வேண்டும். அதற்கு சம்பளம் எவ்வளவு என்று தெரிவிக்குமாறு கேட்டுக்கொள்கிறேன்.   அதற்கு முன்னர் எனக்கொரு சந்தேகம், இந்தப் புண்டை எனும் சொல்லுக்கு நீங்கள் எப்படி முத்திரை பிடிப்பீர்கள் என்பதை ஒரு முன்னோட்டமாக உங்கள் அலைபேசியில் படம்பிடித்து வாட்ஸப்பில் அனுப்பினால், அது பொறுத்தமாக இருக்கிறதா இல்லையா என்பதைப் பார்த்து, தேவைப்பட்டால் சில இம்ப்ரூவ்மெண்டுகளை செய்துகொள்ளலாம். அதேபோல் “உண்ணை டார் டாரா கிழிச்சு ஓத்துட்டுப் போனவள” எனும் வரிக்கு நீங்கள் எப்படி அபினயம் பிடிப்பீர்கள் என்றும் ஒட்டுமொத்தமாக அந்தப் பாடலுக்கு எப்படி நடனம் அமைப்பீர்கள் என்றும் பார்க்க ஆவலாக உள்ளது. அதுமட்டுமின்றி “மூடிட்டு சும்மா இரு” என்பதில் எதை மூடச் சொல்கிறார்கள், எப்படி மூடச் சொல்கிறார்கள், ஏன் மூடச் சொல்கிறார்கள் என்பதும் ஐயமாக உள்ளது, இதையெல்லாம் உங்கள் நடனம் மூலம் தெளிவுப்டுத்துமாறும் கேட்டுக்கொள்கிறேன். முடிந்தால் இதனை ஒரு வீடியோ ஆல்பமாகவும் கொண்டு வருவோம்.

கச்சேரி நடக்கும் அரங்கத்தில் வைஷ்ணவிக்கும், இலக்கியாவிற்கும்தான் முதல் வரிசையில் இடம். விருப்பப்பட்டால் அவர்களும் மேடை ஏறி ஆடலாம். அவர்களுக்குப் பெண் குழந்தை இருப்பின், அல்லது இனி பிறப்பின் அவர்கள் சூப்பர் சிங்கர் போன்ற நிகழ்ச்சிகளில் இந்தப் பாடலை பாடுவதற்கு நான் வாய்ப்பு வாங்கித் தருகிறேன். ஆனால் அவர்கள் பீப் இன்றி என்னா புண்டைக்கு  லவ் பண்றோம் என்றும், டார் டாரா கிழிச்சு ஓத்துட்டுப் போனவள என்று முழு வார்த்தைகளையும் உடைக்காமல் பாட வேண்டும்.

லதா, நீங்கள் நடத்தும் பள்ளியில் இப்பாடலை தினம் தினம் காலையில் அசெம்ப்ளியில் ஒளிபரப்பி உங்கள் அண்ணன் மகனின் வளர்ச்சிக்கும், தமிழ் மொழியின் வளர்ச்சிக்கும் நீங்கள் உதவலாம்.  உங்களது பேத்திகளும் சூப்பர் சிங்கரில் இப்பாடலைப் பாடியோ அல்லது அவர்களை வைத்து இந்தப் பாடலை ஒரு வீடியோ ஆல்பம் செய்வது குறித்தும் நாம் யோசிக்கலாம்.

சிம்புவும், அனிருத்தும் செய்த ஒரு செயலுக்கு எங்களைப் பேசுவதில் என்ன நியாயம் இருக்கிறது? ஆண்கள் செய்யும் தவறுக்குப் பெண்களைப் பழிக்கும் வழக்கமான செயலை நான் செய்ததாக நீங்கள் குற்றம் சாட்டக் கூடும். மன்னிக்கவும், அது போன்ற அறம் சார் அனுகுமுறை உங்களது குடும்பங்களுக்குப் பொருந்தாது என்பதை இங்கு தெளிவுபடுத்த விரும்புகிறேன். சமூகத்தின் பெரும்பாலான குடும்பத்தில் உள்ள பெண்களின் நிலை போல் அல்ல உங்களது நிலை. ஏனென்றால், உங்கள் மகன்களின் ‘தெய்வீகத் திறன்கள்’ குறித்து கலைக் குடும்பமாக நீங்கள் அனைவரும் பெருமை பேசியுள்ளீர்கள், அவர்களின் படைப்பை கலை என்று நீங்கள் சத்தியம் செய்வதாலும் உங்களிடம் முறையிடுகிறோம்.

மேலும், உங்கள் அனைவருக்கும் திரைத்துறையோடு ஏதோ ஒரு வகையில் தொடர்புள்ளது எனும் அடிப்படையில், திரைத்துறையின் ஆணாதிக்க வக்கிரம் குறித்து உரையாட வேண்டியுள்ளது. ஏனென்றால் ஏற்கனவே ஒரு தலைமுறை செய்த ‘கலைச் சேவை’ பத்தாதென்று அடுத்த தலைமுறையாக சிம்புவும் அனிருத்தும் கலைச் சேவையை கொலை வெறியுடன் ஆற்ற வந்திருக்கிறார்கள். கண்டிப்பாக அடுத்த தலைமுறையையும் நீங்கள் தயார்படுத்தி விடுவீர்கள். அதற்குள்ளாகவாவது கடவுளர்கள் அருள் பாலித்திருக்கும் உங்கள் மூளைகளுக்கு கலையோடு கலையாக சிறிதேனும் சமூகப் பொறுப்புணர்வை ஊட்டிவிட முடியுமா எனும் ஒரு எளிய முயற்சியே இது.

ஆணாதிக்க சமூகத்தின் அனைத்து மட்டங்களும், படைப்புகளும் ஆணாதிக்க சிந்தனயோடே இருக்கும். ஆனால் அதையும் தாண்டி சமூகத்திற்கு விழிப்புணர்வும், அறிவும் ஊட்டும் படைப்புகளையே கலை என்று சொல்ல முடியும், அதுவல்லாத எது ஒன்றும் வியாபாரமே. அந்த வகையில் இந்த திரைத்துறை ஒரு தொழில் நிறுவனம் என்பது நிதர்சனம். அதில் கடைந்தெடுத்த அயோக்கியர்கள்தாம் சிம்பு, அனிருத், தனுஷ் உட்பட பெரும்பாலான கதாநாயகர்கள் மற்றும் இயக்குனர்கள், தயாரிப்பாளர்கள். இந்தப் பட்டியலில் தற்போதைய வரவு நீ எனக்குப் பிட்டுப் படம் என பாடிய ஜி.வி. பிரகாஷ் மற்றும் இயக்குனர் ஆதிக் ரவிச்சந்திரன். பெண்கள் எப்படி இருக்க வேண்டும் என்று இலக்கணம் படைப்பதில் தொடங்கி பெண்களை பழித்தும், இழிவு செய்தும், ஆதிக்கம் செலுத்தியும், ஆபாசப் பாடல்கள் வழியாக பாலியல் ரீதியாக சுரண்டியும்தான் திரைப்படங்கள்  வெளி வருகின்றன. இதையெல்லாம் பார்க்கும்பொது பெண்களாக நீங்கள் எப்படி உணர்கிறீர்கள்?  ஐஷ்வர்யா, சௌந்தர்யா என்று உங்கள் குடும்பத்தில் பெண் இயக்குனர்கள் வந்தார்கள் திரைத்துறையின் வக்கிரத்திற்கெதிராக புரட்சிகரப் படைப்புகள் கொடுப்பார்கள் என்று பார்த்தால் அவர்களின் இலட்சியமும் மிகத் தெளிவாக இருக்கிறது.

இப்படி உங்களது குடும்பங்களால் பாதிக்கப்பட்ட பெண்களாகிய எங்களுக்கும், எங்களது குடும்பத்தாருக்கும்  உங்கள் படைப்புகளை காசு கொடுத்துப் பார்க்கும் நுகர்வோர் என்ற உரிமையில் கேள்வி கேட்கும் உரிமை உண்டல்லவா?

ஓரளவுக்கு ‘அடக்கத்தோடு’ ஆடிக்கொண்டிருந்த ஆணாதிக்கத் தடித்தனத்தை  கொலைவெறிடி பாடல் மூலம் தறிகெட்டு ஓடும்படி கட்டவிழ்த்து விட்டு இந்த சீரழிவிற்கு பலமான உரம் போட்டவர் உங்கள் குடும்ப வாரிசான ஐஷ்வர்யா தனுஷ் அவரால் அறிமுகப்படுத்தப்பட்ட அனிருத்.  அவரைத் தொடர்ந்து அட்றா அவளை, வெட்றா அவளை என்று கொலை வெறியைத் தொடர்ந்தவர் அவரது கனவரான தனுஷ், அதற்கு இசையமைத்தவர் பிட்டுப் பட ஜி.வி. பெண்களைப் பழிக்கும் பாடல்கள் இல்லாத படங்களே இல்லை எனும் நிலை தற்போது வந்துவிட்டது. 

ஒரு பக்கம் ஆண்கள் ரவுடிகளாக, பொறுக்கிகளாக, அடியாட்களாக, சைக்கோக்களாக எப்படி இருந்தாலும், பெண்கள் அவர்களை காதலித்தே ஆக வேண்டும் என்று கட்டளையிடுகின்றன திரைப்படங்கள். அப்படி காதலிக்காத பெண் பேராசை பிடித்தவள், திமிர் பிடித்தவள். அல்லது காதலித்த பின்னர் அவனது செயல்கள் பிடிக்காமல் அவனை விட்டு நீங்க விரும்பினால், அவள் வேசி, இதுதான் திரைப்படங்கள் பெண்கள் மீது குத்தும் முத்திரை. ஆனால் அப்படி ஒழுக்கம் பேசும் ஆண்கள்தான் கதாநாயகியின், நடனப் பெண்களின் தொப்புளை நக்காத குறையாக பெண்களின் உடலை அங்குலம் அங்குலமாக தடவியபடி ஆடிப் பாடி மகிழ்ந்து, ஊரிலுள்ள பெண்கள் அனைவரையுமே ஒரு பாலியல் பண்டமாகக் காணும்படி கற்றுக்கொடுக்கிறார்கள். இதனால் ஏற்படும் பின்விளைவுகளை அறியாதவர்களா நீங்கள். பெண்கள் மீது திரைத்துறை நிகழ்த்தும் வன்முறை கண்டு உங்களுக்கெல்லாம் கோபமே வரவில்லையா? இரத்தம் கொதிக்கவில்லையா?

"அளவுக்கு அதிகமா ஆசைப்படுற ஆம்பளையும், அளவுக்கு அதிகமா கோபப்படுற பொம்பளையும் வாழ்க்கையில நல்லா வாழ்ந்ததா சரித்திரமே இல்ல" என்று உங்கள் குடும்பத் தலைவர் ரஜினிகாந்த் சொல்லிவிட்டதால் நீங்களெல்லாம் அடக்க ஒடுக்கமான பெண்களாக இருக்க முடிவு செய்துவிட்டீர்களா? ஆனால் மானமும், அறிவும் உள்ள பெண்களாகிய நாங்கள் அப்படி இருக்க முடியுமா என்ன? உங்களைப் போன்ற கலைக் குடும்பங்களுக்கு நாங்கள் கொடுக்கும் காசு மட்டும் வேண்டும் ஆனால், நாங்கள் எந்தக் கேள்வியும் கேட்கக்கூடாது, விமர்சிக்கக்கூடாது, கண்டிக்கக்கூடாது, அப்படித்தானே? இது பாசிசமாகத் தோன்றவில்லையா உங்களுக்கு.

எல்லா விஷயங்களிலும் ஒழுக்கம் பேசுபவர்களாகவும், விதிகளை உருவாக்குபவர்களாகவும் இருப்பது பார்ப்பனர்களே, அதேபோல் அதை உடைத்து, கலாச்சாரத்தை சீரழித்து, அதற்கும் கலை, சுதந்திரம் என்று பேசி நன்றாக காசு பார்ப்பவர்களாக இருப்பவர்களும் நீங்கள்தானே. பெண்களுக்கு கல்வி கூடாது, 9 வயதில் திருமணம் செய்து வையுங்கள், பெண்கள் வேலைக்குச் செல்லக்கூடாது என்றெல்லாம் மனு சாஸ்திரங்களை எழுதி வைத்துவிட்டு, கொல்லைப் புறம் வழியாக உங்கள் வீட்டுப் பெண்களை மட்டும் கல்வி கற்கவும், வேலைக்குச் செல்லவும் செய்தவர்கள் உங்கள் இனம்தானே? இப்படி நீங்களும், உங்களுக்கு ஆதரவாக இயங்கும் ஆதிக்க சாதியினரும் உருவாக்கும் அநீதிக்குறிய விதிகளையும், கேவலமான முன்மாதிரிகளையும் எதிர்ப்பதும், கண்டிப்பதும், முறியடிப்பதுமாகவே எங்கள் பொழுதுகள் கழிகின்றன. இப்போது திரைத்துறையிலும் உங்களது வாரிசுகள் அராஜகம் செய்து வருகின்றனர். அதை சரஸ்வதி கடாட்சம் என்று ஒரு பெண்ணின் பெயராலேயே நியாயப்படுத்துகிறீர்களே, வெட்கமாக இல்லை?

திரைத்துறையில், ‘கலைத்துறையில்’ பணிபுரிபவர்களான உங்களிடம் நான் ஒன்று கேட்கிறேன். பெரும்பாலான திரைப்படங்களில் (அநேகமாக எல்லாம்) ஆண்கள் மட்டுமே உண்மையாக காதலிப்பவர்களாக, காதலால் பாதிக்கப்படுபவர்களாக காட்டுகிறார்கள். அவர்களுக்கு மட்டுமே சோகப் பாடல்களும், சூப் சாங்குகளும் உள்ளன. தண்ணி அடித்துவிட்டு சாலைகளில் ‘பாலுறவுக்கான’ உடல் அசைவுகளை  காட்டி காட்டி ஆடுகிறார்கள். ஏன்? பெண்கள் யாருமே உண்மையாக காதலிப்பவர்கள் இல்லையா? அல்லது ஆண்களால் அவர்கள் பாதிக்கப்படுவதே இல்லையா? காதல் தோல்விகள் பெண்களுக்கு இல்லையா? என்ன இது? ஏன் இப்படி என்று எப்போதாவது சிந்தித்திருக்கிறீர்களா?
ஏதாவது கேள்வி கேட்டால் கருத்து சுதந்திரம்.

எது கருத்து சுதந்திரம்? சமூகத்தை சீரழிப்பதா?

அதிகாரத்திற்கு எதிராகக் குரல் கொடுப்பது கருத்து சுதந்திரம். அதிகாரத்தின் முகத்திரையைக் கிழிப்பது கருத்து சுதந்திரம். சமூகத்தை முன்னேற்றுவதற்காக முன்வைக்கும் கருத்துகள் விமர்சனங்கள் கருத்து சுந்தந்திரம். அவை முடக்கப்படும்போதும், விளிம்பு நிலை மக்களின் குரல்கள் நசுக்கப்படும்போதும் அதற்குக் குரல் கொடுப்பது கருத்து சுதந்திரம். மாறாக, நினைப்பதையெல்லாம் பேசுவதும், வக்கிரங்களைப் பரப்புவதும், இன,மத, சாதி, பால் அடையாளம், பாலியல் மற்றும் உடலியல் மாற்றங்களை இழிவு செய்வதுமா கருத்து சுதந்திரம்? நீங்களெல்லாம் ஆறறிவுள்ள மனிதர்கள்தானே? சிந்திக்கத் தெரியாதா உங்களுக்கு?

இல்லையேல் இன்னொரு பதில், மக்கள் ரசிக்கிறார்கள் என்பது. சிம்பு, அனிருத், தனுஷ், ஜி.வி மற்றும் திரைத்துரையின் இதர ஆண்களே, இந்த சமூகத்தின் ஆண்கள் உங்கள் வீட்டுப் பெண்களின் நிர்வாணப் புகைப்படங்களையும், அந்தரங்கக் காட்சிகளையும்  , ஆபாச நடனங்களையும் கூடத்தான் ரசிப்பார்கள் நீங்கள் ஏன் உங்கள் அம்மாக்களையும் சகோதிரகளையும் ஆடவைத்து பாடவைத்து அதுபோன்ற காட்சிகளை வெளியிடக்கூடாது. பிடித்தால் பாருங்கள், பிடிக்காவிட்டால் அணைத்துவிட்டு போங்கள் என்று சொல்லிக்கொள்ளலாம். செய்வீர்களா?

சிம்பு மற்றும் அனிருத் குடும்பத்துப் பெண்களே, இப்போதும் ஒன்றும் குறைந்துவிடவில்லை, திரைத்துறையில் உங்களது வாரிசுகளின் வக்கிரத்தைக் கண்டித்தும், பெண் உடல் சுய-மரியாதை மீட்பிற்கும் களமிறங்க உங்களுக்கு இப்போதும் வாய்ப்புள்ளது. அதை முதலில் உங்கள் வாரிசுகளுக்கெதிராக தொடங்குவோம்.  திரைப்படங்கள், ஊடகங்கள் இவற்றில் பெண் உடல் சித்தரிப்பு மற்றும் ஆபாச பாடல்வரிகளை எதிர்த்து ஓர் ஆர்பாட்டம் செய்ய விழைகிறோம், அதற்கு உஷாவாகிய நீங்களும், லக்‌ஷ்மியாகிய நீங்களும்தான் தலைமை தாங்க வேண்டும்.

இது குறித்துப் பேச நேரம் தருவீர்களா? 

...மேலும்

Dec 13, 2015

யானைகளின் தோழி - ஆசை


இந்தியாவில் ஆண்களின் கோட்டையாக இருந்த காட்டுயிரியல் துறைக்குள் டி.என்.சி வித்யா நுழைந்தபோது அந்தத் துறையில் கிட்டத்தட்ட பெண்களே இல்லாத காலம். அந்தத் துறையைச் சேர்ந்தவர்களில் சிலர் இவர் சாதிப்பாரா, தாக்குப்பிடிக்க முடியுமா என்ற சந்தேகத்துடன் இருந்தாலும் மற்றவர்கள் ஆதரவுடனும் நட்புணர்வுடனும் நடந்துகொண்டார்கள். பொதுவாகப் பெண்கள் எந்த சாதனையைச் செய்தாலும் ஆண்களை அளவீடாகக் கொண்டுதான் அந்தச் சாதனை மதிப்பிடப்படுகிறது. ஆனால், பெண்களோ தாங்கள் எந்தத் துறைக்குள் நுழைந்தாலும் அதில் தங்களுக்கென்றேயான அளவீடுகளை, மதிப்பீடுகளை உருவாக்கிக்கொள்கிறார்கள். அதன் மூலம் ஆண்கள் உருவாக்கிவைத்திருக்கும் மதிப்பீடுகளைத் தகர்த்தெறிவது மட்டுமல்லாமல் அவர்களை மறுபரிசீலனை செய்யவும் வைக்கிறார்கள். அப்படித்தான் வித்யாவும். தனது இதயத்தின் பாதையைத் தேர்ந்தெடுத்த பிறகு ஆணென்ன, பெண்ணென்ன?

சென்னையில் பிறந்த வித்யாவுக்குச் சிறு வயதிலிருந்தே இயற்கையின் மீது ஈடுபாடு அதிகம். பறவைகள், பாலூட்டிகள் குறித்து ஆராய்ச்சி செய்ய வேண்டும் என்ற ஆர்வம் அவருக்கு அப்போதே இருந்தது. எப்படிப்பட்ட ஆராய்ச்சி என்பதைப் பற்றி அவருக்கு அப்போது தெளிவாகத் தெரியவில்லை என்றாலும் காடுகள், மலைகளின் இயற்கையோடு இயற்கையாகத் திரிவது குறித்து ஈர்ப்பு இருந்திருக்கிறது. ‘ஏன்?’ என்று கேட்டால் ‘என்னவோ தெரியவில்லை, மனிதர்கள் என்னை அவ்வளவாக ஈர்க்கவில்லை’ என்பார் வித்யா, சிரித்துக்கொண்டே.

காட்டுயிர் தொடர்பான ஏதோவொரு துறையில் பணியாற்ற வேண்டும் என்ற ஆர்வம் சிறுவயதிலிருந்தே இருந்தாலும் பள்ளி இறுதியாண்டுகளின்போது ஒரு பயமும் அவருக்கு ஏற்பட்டிருக்கிறது. தனது காட்டுயிர் ஆர்வத்துக்கு இடையூறு தராத வேலை கிடைக்க வேண்டுமே என்பதுதான் அந்த பயம். இந்த பயத்தின் காரணமாக மாற்று யோசனைகளாக கால்நடை மருத்துவராவது, பத்திரிகையாளர், ஆங்கில விரிவுரையாளர், சிறுவர் புத்தகங்களுக்கு ஓவியம் வரைபவர், பிராணிகளைப் பதப்படுத்துபவராக ஆவது என்று பல்வேறு திட்டங்களும் அவர் மனதில் ஓடியிருக்கிறது.

இளங்கலையில் தாவரவியல், விலங்கியல், வேதியியல் ஆகியவற்றை முடித்த வித்யா பெங்களூருவில் உள்ள இந்திய அறிவியல் மையத்தில் ஒருங்கிணைந்த முனைவர் பட்டத்தில் சேர்ந்தார். அதில் அவரது முதல் பணி குளவிகளைப் பற்றியதுதான். அது ஆய்வகத்தில் நடத்தப்பட்ட ஆய்வு. காட்டுயிரியலில் அவருக்கு பாலபாடம் அங்கிருந்துதான் கிடைத்தது. ஆய்வகத்தைவிட வனங்களில் பணிபுரிவதுதான் அவருக்குப் பிடிக்கும் என்பதான் பேராசிரியர் சுகுமாரின் குழுவுடன் இணைந்துகொண்டு யானைகளைப் பற்றி ஆராய்ச்சி செய்தார்.

அதற்குப் பிறகு நியூயார்க்கின் கொலம்பியா பல்கலைக்கழகத்தில் டாக்டர் பிருது ஃபெர்னாண்டோ, பேராசிரியர் டான் மெல்னிக் ஆகியோரின் வழிகாட்டுதலில் பயின்றார். முனைவர் பட்டத்துக்குப் பிந்தைய ஆய்வுப் பணிக்காக விலங்குகள் குணவியல்புகளைத் தேர்ந்தெடுத்து ஸ்டெல்லென்பாஷ் பல்கலைக்கழகத்தின் பேராசிரியர் மைக் செர்ரியின் குழுவில் இணைந்துகொண்டார். பிறகு, இந்தியா திரும்பி வந்து யானைகளின் குணவியல்புகள் மீது முழுக் கவனமும் செலுத்த ஆரம்பித்தார்.

டாக்டர் சுகுமார் போன்ற முக்கியமான உயிரியலாளர்களுடன் சேர்ந்து குறிப்பிடத் தக்க ஆராய்ச்சிகளை வித்யா இதுவரை செய்திருக்கிறார். துறைசார்ந்த இதழ்களில் அவருடைய கட்டுரைகள் நிறைய வெளியாகியிருக்கின்றன. இந்த இளம் வயதிலேயே (வயது 39) குறிப்பிடத்தக்க அங்கீகாரங்களும் விருதுகளும் பெற்றிருக்கிறார் வித்யா. அரசின் அறிவியல் மற்றும் தொழில் நுட்பத்துறையிடமிருந்து ‘ராமானுஜன் ஃபெல்லோஷிப்’ பெற்றது, கொலம்பியா பல்கலைக்கழகத்தில் ‘விசிட்டிங் ஸ்காலர்ஷிப்’ பெற்றது, இந்திய அறிவியல் மையத்தில் ஏழு வருட ஆராய்ச்சிக்காக ‘ஃபெல்லோஷிப்’ பெற்றது, 2007-க்கான ‘இளம் அறிவியலாளர் விருது’ இந்திய தேசிய அறிவியல் அகாடமியால் வழங்கப்பெற்றது போன்றவை இவரது குறிப்பிடத் தக்க சாதனைகள்.

காட்டுயிரியலில் வித்யாவின் பணி என்பது யானைகளை ஆய்வுசெய்வது மட்டுமல்ல, வருடத்தின் கணிசமான பகுதியில் அவர் காட்டுயிரியல் குறித்து மாணவர்களுக்குப் பாடம் எடுக்கவும் செய்கிறார். ஆக, காட்டுயிர் களப்பணி, காட்டுயிர் கல்வி ஆகிய இரண்டுக்கும் போதுமான நேரத்தைப் பிரித்துக்கொள்கிறார்.

தற்போது பெங்களூருவில் இருக்கும் ‘உயர்நிலை அறிவியல் ஆராய்ச்சிக்கான ஜவாஹர்லால் நேரு மைய’த்தில் ‘பரிணாமவியல் மற்றும் உயிரமைப்பு உயிரியல் பிரி’வில் (Evolutionary and Organismal Biology Unit) பணிபுரிகிறார் வித்யா. பந்திப்பூர் தேசியப் பூங்காவில் 500-க்கும் மேற்பட்ட யானைகளைத் தனித்தனியாக அடையாளம் கண்டு அவற்றைக் கண்காணித்து ஆய்வு செய்யும் நீண்ட காலத் திட்டத்தை இந்தியாவிலேயே முதன்முறையாக மேற்கொண்டு வரும் குழுவுடன் இணைந்து செயலாற்றிக்கொண்டிருக்கிறா வித்யா. ஆசிய யானைகளின் சமூக முறையை வடிவமைப் பதில் சுற்றுச்சூழலின் பங்கையும், தனிப்பட்ட யானைகளுக்கிடையிலான உறவுகளின் பங்கையும் புரிந்துகொள்வது இந்தத் திட்டத்தின் நோக்கம். ஆப்பிரிக்க யானைகளைப் பற்றி நிறைய ஆய்வுகள் செய்யப்பட்டிருக்கின்றன.

அதனோடு ஒப்பிட்டால் இந்திய யானைகளைப் பற்றிய ஆய்வுகள் மிகவும் குறைவு. இந்தத் திட்டத்தின் மூலம் இந்திய யானைகளின் சமூக அமைப்புக்கும் ஆப்பிரிக்க யானைகளின் சமூக அமைப்புக்கும் இடையிலுள்ள ஒற்றுமைகளையும் வேற்றுமைகளையும் கண்டறிவதில் வித்யாவின் குழு முனைப்பு காட்டிவருகிறது. ஒன்றுக்கொன்று தொடர்பில்லாத தனிப்பட்ட யானைகளுடன் ஒப்பிட்டால் ஒன்றுக்கொன்று தொடர்புடைய யானைகள் தங்களை எப்படி ஒருங்கிணைத்துக்கொள்கின்றன என்பதையும் இந்தக் குழு ஆய்வு செய்துவருகிறது. ஆண்டின் வெவ்வேறு பருவங்களிலும் அல்லது வெவ்வேறு ஆண்டுகளிலும் உணவு எந்த அளவுக்குக் கிடைக்கிறது என்ற அடிப்படையில் யானைகளின் சமூகங்கள் எப்படி மாற்றமடைகின்றன என்பதையும் இந்த ஆய்வு உள்ளடக்குகிறது.

இந்தத் துறையில் தனக்குக் கிடைக்கும் மனநிறைவு அலாதியானது என்று அவர் கருதுகிறார். வழக்கமாக, ஆய்வுகள், தரவுகள் சேகரிப்பது என்பது சலிப்பூட்டும் தினசரி வேலைகள் போன்றவை. காட்டுயிரியலில் அப்படியில்லை. இங்கு தரவுகள் என்பவை எண்கள் இல்லை. நேரடியாக விலங்குகளைப் பார்த்து நீங்கள் பெறும் மனப்பதிவுகள்தான். ஆக, ஒவ்வொரு தரவுக்குப் பின்னாலும் எண்ணுக்குப் பின்னாலும் பரவசம் தந்த, பதற்றம் தந்த, அழகான நிமிடங்கள் இருக்கின்றன. அவை காட்டுயிரியலின் தரவுகள். எல்லாவற்றுக்கும் மேலாக இயற்கையை நேருக்கு நேர் எதிர்கொள்வதின் பரவசம்தான் காட்டுயிர் துறையை மேலும் அழகான தாகவும் அர்த்தபூர்வமாகவும் ஆக்குகிறது என்கிறார் வித்யா. தினமும் பார்க்கும் யானைதான் என்றாலும் ஒவ்வொரு நாளும் ஒரு புதுமையை அதனிடமிருந்து நாம் பெற்றுக்கொள்ள முடியும் என்கிறார்.

அவருடைய ஆதர்ச நாயகர் யாரென்று கேட்டால், ஒருவரில்லை பல பேர் இருக்கிறார்கள் என்பார். ஜெரால்டு டியூரல், சாலிம் அலி, ஜேன் கூடால், டேவிட் அட்டன்பரோ போன்றவர்கள்தான் அவருடைய ஆதர்ச நாயகர்கள். கூடவே, தனக்கு ஆதரவளித்துவரும் பெற்றோர்களும் சகோதரி, சகோதரரும் தனது ஆதர்ச நாயகர்கள்தான் என்கிறார்.

‘தி இந்து’ தீபாவளி மலரில் வெளியான கட்டுரை
...மேலும்

Dec 12, 2015

பெண் எனும் பகடைக்காய்: யாருக்கு வேண்டும் பிளாஸ்டிக் பூமாலைகள்? - பா.ஜீவசுந்தரி


ஊழிப் பெருவெள்ளமாய்க் கிளம்பி, ஊர் முழுவதும் சூழ வலம் வந்து கடலுக்குள் தஞ்சமடைந்தாலும், இன்னமும் விட்டுப் போக மனமில்லாமல் அகழியைப் போலச் சூழ்ந்துகொண்டு நிற்கிறது தண்ணீர். தேங்கி நிற்க அதுவே கழிவு நீராக, சாக்கடையாக உருமாறிக் கொசு உற்பத்திப் பண்ணைகளாகப் பயமுறுத்திக்கொண்டிருக்கிறது.

கடந்த சில மாதங்களாகவே டெங்கு, மூளைக் காய்ச்சலால் பாதிக்கப்பட்டு உயிரிழப்புகளும் ஏற்பட்டன. நீர் வடிந்த இடங்களில் எல்லாம் எங்கெங்கிருந்தோ அடித்துக்கொண்டு வந்து குவிக்கப்பட்டிருக்கும் குப்பைகள், புதிதாக வளர்ந்த மலைகளைப் போல அங்கங்கே வழி மறித்து நிற்பதைப் பார்க்கவே அச்சமாக இருக்கிறது. ஒவ்வொரு வினைக்கும் எதிர்வினை உண்டு என்பது மாறாத இயற்கை விதி. இப்போது அதைத்தான் பறைசாற்றிக்கொண்டு நிற்கின்றன அத்தனை அழுக்கும் கசடுகளும்.

கடல் அலைகளின் தாலாட்டில் இவ்வளவு காலமும் ஒரு சொகுசு நகரமாக மட்டுமே அறியப்பட்ட சென்னை மாநகரம், கழிமுகத் துவாரமும் இதுதான் என்பதை இன்று நினைவூட்டியிருக்கிறது. சுற்றுச்சூழலாளர்கள் கதறியபோதெல்லாம் கவனிக்காதவர்கள் இனியாகிலும் பசுமையையும் இயற்கையையும் பேண முன்வர வேண்டும். இது போன்றதொரு மழையை இந்தியாவின் எந்த நகரத்தாலும் தாங்கிக்கொள்ள முடியாது என்பதும் அவர்கள் சொல்லும் கருத்து. உரிய வடிகால் வசதிகளை நீர்வழிகளை எல்லாம் அடைத்துக்கொண்டிருக்கும் ஆக்கிரமிப்புகளை அகற்ற வேண்டிய பொறுப்பு அனைவருக்கும் இருக்கிறது. குறிப்பாக ஆக்கிரமிப்பாளர்களுக்கு.

உலகெங்கிலும் தொடரும் போர்ச் சூழலில் பெண்கள் படும் பாடுகளைப் படித்து அறிந்துகொண்டதை எல்லாம் அனுபவபூர்வமாகவும் ஓரளவுக்கு உணர வைத்தது இந்தப் பெருமழை. எல்லாக் காலங்களிலும் பிரச்சினைகளை அதிகம் எதிர்கொள்பவர்கள் பெண்கள். போர்க் காலங்கள், பேரிடர் காலங்களில் அதுவே இரட்டிப்பாகிறது. ஏறக்குறைய ஒரு போர்க் காலச் சூழலைத்தான் அனுபவித்தோம். பதுங்கு குழிகளுக்கு மாறாக, வீட்டுக்குள், முகாம்களுக்குள் அடைந்து கிடந்தது வாழ்க்கை. மின்சாரம், குடிநீர், பால், காய்கறி போன்ற அத்தியாவசியப் பொருள்கள் ஏதுமின்றி, ஊருக்குள் என்ன நடக்கிறது என்று செய்தி அறிய முடியாமல், ஒரு மெழுகுவர்த்தி வாங்கவும் வழியில்லாமல் பட்ட பாடுகள் அனைத்தையும் உணர வைத்தது. மேலிருந்து குண்டு விழாதது ஒன்றுதான் குறை. ஆனால், ஒவ்வொரு நாளும் மழை தொடர்ந்த போதெல்லாம் வானத்தைப் பார்த்து அதிர்ந்தோம்.

கிணறுகளை மூடி சீல் வைத்துவிட்டு, வீட்டுக்கு மேலே நீர்த் தொட்டிகளைக் கட்டி வைத்து, கீழிருந்து நீரை மின் மோட்டார் மூலம் மேலேற்றி, பின் குழாய்களின் வழி கீழிறக்கி செலவழித்த நமக்கு, அனைத்துத் தேவைகளுக்கும் மின்சாரத்தை மட்டுமே சார்ந்து வாழ்ந்துகொண்டிருக்கும் நமக்கு, எத்தனை பாடம் சொல்லிச் சென்றிருக்கின்றன இந்தப் பெருமழையும், வெள்ளமும். கழிவறைத் தேவைக்கும்கூடத் தண்ணீரின்றித் தவித்த ஐந்து நாட்கள் என்பது, போதி மரத்தடியில் புத்தனுக்கும் எட்டாத ஞானோதயமாக நமக்கு உறைத்திருக்கிறது. கிணறுகளின் தேவையை இதைவிட உணர வைக்க வேறு வழியிருக்கிறதா? தண்ணீர் சிக்கனத்தையும் சேர்த்தே சொல்லித் தந்திருக்கிறது. நீர் மேலாண்மை பற்றி தனியாகப் படிக்க வேண்டிய அவசியமே இல்லை.

நாம் வீசி எறிந்த ஞெகிழி என்ற பிளாஸ்டிக் குப்பைகள் – நாம் வீசிய குப்பைகள்தான் - இப்போது நம் முன்பாகப் பெரும் சவாலாக எழுந்து நிற்கின்றன. தண்ணீர் அடித்துக்கொண்டு வந்து ஆங்காங்கே அடையாளம் காட்டி வெளிச்சமிட்டுக் கொண்டிருக்கின்றன. கழிவுநீர்க் கால்வாய்களை அடைத்துக்கொண்டதில் பெரும் பங்கு இவற்றுக்கு இருக்கிறது. அதை வீசி எறிந்த நமக்கும் அதில் பங்கிருக்கிறது. இந்தக் குற்ற உணர்வு ஒவ்வொருவருக்குள்ளும் எழ வேண்டும். நிவாரணப் பொருள்களை அளிக்க இந்த பாலிதீன் பைகள், உணவு பாக்கெட்டுகள் என மீண்டும் இந்த பிளாஸ்டிக் சனியன் முன்னே நிற்கிறது. மேலும் மேலும் குப்பையாகச் சேர்வது அச்சமூட்டுகிறது. எடுத்துச் செல்ல எளிதாகவும், தூக்கி வீசிவிட அதை விட எளிதாகவும் இருப்பதால் பிளாஸ்டிக்கின் பயன்பாடு நிறுத்தப்பட முடியாமல் தொடர்ந்து கொண்டேயிருப்பது பேரவலம். இனியாகிலும் படிப்படியாக அதன் பயன்பாட்டைக் குறைப்பது பற்றிச் சிந்திக்க வேண்டும்.

‘மஞ்சப்பை’ என்று கேலி செய்யப்பட்ட துணிப்பைகள் இப்போது ஆபத்பாந்தவனாக நினைவில் நிழலாடுகின்றன. மழை வெள்ளத்துக்கு அனைத்தையும் பலி கொடுத்து வாழ்வாதாரம் ஏதுமின்றி நிற்பவர்களுக்கு, குறிப்பாகப் பெண்களுக்கு துணிப்பைகள் தயாரிக்கும் பணியை அரசு உருவாக்கிக் கொடுத்தால், அது ஒட்டுமொத்த சமூகத்துக்குமே பலனளிக்கும். பாலிதீன் பயன்பாட்டையும் குறைக்கும். தையல் பணியைத் தையல்களும் மனமுவந்து ஏற்பார்கள். இரே கல்லில் இரு மாங்காய் பாணியாகவும் இதை ஏற்றுக்கொள்ளலாம்.

தொழில் நுணுக்கம், அறிவியல் என்ற பெயரில் கொஞ்சம் கொஞ்சமாக நம்மால் சிதைக்கப்பட்ட இயற்கையை மீண்டும் கட்டமைக்க வேண்டிய சூழலில் நாம் இருக்கிறோம். இயற்கையைச் சீரழித்து, நாகரிக உலகை, தொழில்நுட்ப அறிவியலைக் கொண்டு பிளாஸ்டிக்கில் அரிசி படைத்து உண்ண முடியாது. நீராதாரமும் பசுமையாக விளைந்த காய்கனிகளும் மனித உயிர் வாழ்க்கைக்கு அடிப்படை. சோடியம் விளக்கைப் பால் நிலாவென்று காட்டி ஏமாற்றி நம் குழந்தைகளுக்கு சோறூட்ட நம் அம்மாக்கள் ஒப்புக் கொள்வார்களா? பிளாஸ்டிக் பூக்கள் ஒரு பெண்ணுக்கு எப்போது மனநிறைவைத் தருகிறதோ, அப்போது மறுபடியும் இயற்கையை நோக்கித் திரும்ப மனிதர்களுக்கு மனம் வராமல் போகலாம். ஆனால், அதைவிட கேலிக்கூத்து வேறேதும் இருக்காது. தற்கொலை முயற்சிக்கு ஈடானதுதான் அந்த மனநிலை. அந்த நிலையை நோக்கிப் போவதற்கு முன்பாக, இப்போதே தடம் மாறுவோம். அதற்கான நேரம் இதுதான். பெண்கள் நாமே அதற்கு முன்னுதாரணமாக முன் முயற்சியை எடுக்கலாம்.

இவ்வளவு இன்னல்களை, துன்பங்களை அனுபவித்தபோதும், அதிர்ச்சியான காட்சிகளும் அதிர வைத்தது உண்மை. அத்தியாவசியப் பொருட்களின் தட்டுப்பாடுகளுக்கு இடையிலும் ‘டாஸ்மாக்’ சரக்குகள் மட்டும் குறையில்லாமல் கிடைத்ததைப் பார்த்து மனம் நொந்துபோனது. வீதிகளில் நடமாடிய பலரும் ‘நறுமணம்’ கமழ போதையுடன் தள்ளாடியதையும், துள்ளியதையும் எந்த வார்த்தைகளில் எழுத?

கட்டுரையாளர், எழுத்தாளர்.தொடர்புக்கு: asixjeeko@gmail.com

நன்றி - தி ஹிந்து
...மேலும்

பெண்ணியம் vimeo சேனல்

பெண் நிலை - வீடியோக்கள்