/* up Facebook

Aug 26, 2010

அனியற்கைப் பூக்கள்..! -மயூ மனோ


நிர்தாட்சண்ய பார்வைகளால்
குமிக்கப்படுகின்றன
என் நாட்கள்
ஒரே விதமாக
அவை
அனியற்கையின் பூக்களை
என்னுடலில் பூக்கச் செய்கின்றன

தாலி நூல் இற்றுப் போயிருந்ததை
அவர்கள் தான் முதலில் கண்டார்கள்
நேற்று கழட்டும் போது
நானும்
என் குங்குமம்
அவன் உடலுள்
உறைந்திருந்தது

வெள்ளை நிறம் எனக்கு பிடித்திருக்கவில்லை
பொட்டில்லா நெற்றியும் தான்
இது குறித்து பிள்ளை தான் அதிகம் கேள்வி கேட்டான்
அவற்றைத் துறந்த போது
பின் தெருவும்

உனக்கான என் கற்பு எதனால் எழுதப்பட்டிருந்தது
என்பது எனக்கு நினைவிலில்லை
அவர்களால் அதை மீள எழுத முடிந்தது
துரோகமற்றதாதல் கற்பென்றால்
நான் மீளக் கற்பிருத்தல்
சாத்தியமில்லை என்கிறாயா?

நீ சாத்தியம் என்பாய்
எனக்குத் தெரியும்
நீ என்னைப் புரிந்தவன்
என்னை நானாக ஏற்றவன்
வாழ்ந்தவன்
தனிமையில் தான்
நான் மரணிப்பேன் என்பதும் அறிவாய்

ஆனால் நீ அறியாத ஒன்றும் இருக்கிறது
இன்னொன்றில் மீளக் காதலுறுதல்
அவர்களாலே வாசிக்கப்படுகிறது
கற்பின் அளவுகோல் நீளமாக நீளமாக

நிர்தாட்சண்யப் பார்வைகளால்
குமிக்கப்படுகின்றன
என் நாட்கள்
ஒரே விதமாக

அவை
ஒரு முத்தமிடலின்
ஒரு அணைப்பின்
ஒரு இயற்கையானதின் மீது
அனியற்கைப் பூக்களை
என்னுடலில் பூக்கச் செய்கின்றன..!

-மயூ மனோ-

0 comments:

Post a Comment

பெண்ணியம் vimeo சேனல்

பெண் நிலை - வீடியோக்கள்