/* up Facebook

Jul 26, 2010

ஈவ்டீசிங் - பெண்கள் பிரச்னை மட்டும் தானா - பா.ரஞ்சனி


1998- ஜுலை 25 சென்னையில் ஓர் இறுதி ஊர்வலம் நடைபெற்றது. ஆயிரக்கணக்கான மாணவர்களும; பொதுமக்களும, சமூக ஆர்வலர்களும், முற்போக்கு இயக்கங்கள் மற்றும் மாதர் அமைப்புகளைச் சேர்ந்தவர்களும் அதில் கலந்து கொண்டனர். தேசமே இறுதிஅஞ்சலி செலுத்திய அந்த நிகழ்வு - ஈவ்டீசிங் கொடுமையால் உயிழந்த கல்லுரி மாணவி சரிகாஷிவின் மரணம். ஜுலை 18ம் தேதி கல்லுரி முடிந்து வீடு திரும்பும் போது ஆட்டோவில் வந்த ஒரு கும்பலின் தாக்குதலுக்கு ஆளாகி தலையில் அடிபட்டு மருத்துவமனையில் தீவிர சிகிச்சைகள் பலனளிக்காமல் தனது பிறந்தநாளான 24ம் தேதி உயிரிழந்தார் சரிகாஷா. . தமிழகமெங்கும் இந்த சம்பவம் குறித்து கண்டனக் குரல்கள் எழுப்பப்பட்டன. சம்பந்தப்பட்ட குற்றவாளிகள் கைது செய்யப்பட்டதோடு நில்லாமல் தமிழக அரசு ஈவ்டீசிங் தடுப்புச் சட்டம் 1998 ஐ இயற்றியது. வழக்கு விசாரணை முடிவுக்கு வந்து 9 பேருக்கு விதிக்கப்பட்ட 5 ஆண்டு சிறைத்தண்டனையை சென்ற ஆண்டு சென்னை உயர்நீதிமன்றம் உறுதி செய்து தீர்ப்பளித்தது. நீதிபதி தனது தீர்ப்பில் “சரிகாஷா ஒரு பெண் என்பதாலேயே அவர் மீது வன்முறை நிகழ்த்தப்பட்டுள்ளது. பெண்களுக்கு தன்னம்பிக்கையையும் தற்காப்பையும் அளிப்பதற்கு கல்வி நிறுவனங்கள் சிறப்பு வகுப்புகளை நடத்த வேண்டும். சட்ட உரிமைகள் குறித்த வாராந்திர வகுப்புகளை நடத்த வேண்டும்”; என்றும் கூறியுள்ளார். தண்டனையை உறுதிப்படுத்தியதில் நமக்கு மாற்றுக் கருத்து எதுவும் இருக்க முடியாது. ஆனால் ஈவ்டீசிங் சம்பவங்கள் நடைபெறும் பொழுது அறிவுரைகளும் தற்காப்பு நடவடிக்கைகள் குறித்து பேசுவதும் பெண்களை விளித்தே இருப்பது நம் மனதில் சில கேள்விகளை ஏற்படுத்துகிறது.

எங்கெங்கு காணினும்
ஒரு பெண் வீட்டை விட்டு வெளியே வந்தால் அவள் சீண்டலுக்கு ஆளாகும் சந்தர்ப்பங்கள் கணக்கிலடங்காதவையேஸ தெருவில் நடந்து செல்லும் போது- பேருந்தில் பயணிக்கும் போது- பணிபுரியும் போது என்று எப்பொழுது வேண்டுமானாலும் முகமறியாத ஆண்களின் செய்கைகளினாலோ வார்த்தைகளினாலோ பெண் தாக்குதலுக்கு ஆளாகிறாள். வீட்டில் இருந்தாலும் கூட தொலைபேசி அழைப்புகளின் மூலம் ஈவ்டீசிங் க்கு ஆளாகும் வாய்ப்புகள் உள்ளன. இன்று செல்போன் ஈவ்டீசிங்கிற்கான கருவியாக பயன்படுவதை நாம் பார்க்கிறோம். பெண்கள் அறியாத வண்ணம் அவர்களுடைய நடவடிக்கைகளைஇ உடலை ஆபாசமான கோணங்களில் செல்போன் மூலம் படமெடுத்து ரசிப்பது என்பது பல விதங்களில் நடைபெற்று வருகிறது. குறிப்பாக மாணவிகள் படும் பாடு வார்த்தைகளில் வடிக்க முடியாதவையாக இருக்கிறது.

அப்பாவிப் பெண்களை மிரட்டி செல்போனில் ஆபாசமாகப் புகைப்படம் எடுப்பதுஇ பின்பு அதை வைத்து அந்தப் பெண்ணை மிரட்டி தங்களது ஆசைக்கு இணங்க வைப்பது என்பதும் ஏதோ திரைப்படங்களில் இடம் பெற்ற காட்சிகள் அல்ல. மாறாக பத்திரிகைச் செய்திகளில் இடம் பெற்றவையே.

கல்வி நிறுவனங்களில்
இது கல்லுரிகளில் முதலாமாண்டு வகுப்புகள் துவங்கும் நேரம்.. பேருந்துகளிலும் பொதுஇ;டங்களிலும் தன்னுடைய சக மாணவர்களாலும் மற்றவர்களாலும் கேலி கிண்டலுக்கும் ஆபாச செய்கைகளுக்கும் ஆளாகும் சம்பவங்கள் எண்ணிலடங்காதவையே. ஆனால் இது பெண்களுடைய பிரச்னையாக மட்டுமே பார்க்கப்படுகிறது. பெண்ணை எப்படி பாதுகாப்பது என்கிற பல்வேறு விதமான விவாதங்களுக்கு வழிவகுக்கிறது.

கல்லுரிகளோடு இந்த சம்பவம் நின்றுவிடுவதில்லை. இன்றைக்கு இருபாலர் பயிலும் பள்ளிகளிலே ஆசிரியைகளுக்கு பெரும் பிரச்னையாக இருப்பது இந்த ஈவ்டீசிங் பிரச்சினை தான். இரண்டாம் வகுப்பு மாணவன் தன் சக மாணவிக்கு லவ் லெட்டர் குடுப்பது- மூன்றாம் வகுப்பு மாணவன் சக மாணவியை வகுப்பறையில் முத்தமிட்டது என்று பல பள்ளிகளின் ஆசிரியைகள் நம்முடைய கற்பனைக்கு கூட எட்டாத நிகழ்வுகளை நம்மிடம் பகிர்ந்து கொள்கிறார்கள்.

சின்னஞ்சிறு மாணவர்களின் மனதிலே கூட மாணவிகளை தன்னுடைய சீண்டலுக்கு இரையாக பார்க்கும் மனோபாவத்தை நாம் வளர்த்திருக்கிறோம். என்பது தான் கசப்பான உண்மை. பத்திரிகைகளைப் புரட்டினால் தன் விருப்பத்துக்கு இணங்காத பெண்ணின் முகத்தில் ஆசிட் வீசிய சம்பவங்களின் எண்ணிக்கை அதிகரித்துக் கொண்டே இருக்கிறது. புகார்களாகப் பதிவான சம்பவங்கள் தவிர பதிவாகாத சம்பவங்கள் ஆயிரக்கணக்கில் நடைபெறுகிறது என்பது தான் நிதர்சனம்.

ஊடகங்களின் பங்கு
பெண்ணாய்ப் பிறந்ததனால் மட்டுமே அவள் தன்னுடைய சீண்டலுக்கும் வக்கிர உணர்வுகளுக்கு வடிகாலாக இருப்பாள் என்பதை ஆணின் மனதில் ஆழமாகப் பதிய வைத்ததில் ஊடகங்களுக்கு இருக்கும் பங்கை யாரும் மறுத்து விட முடியாது. குறிப்பாக திரைப்படங்கள் ஒவ்வொரு காலகட்டத்திலும் பல வடிவங்களில் நாயகி நாயகனின் சீண்டலுக்கு இலக்காவதும் அதன் பின் அதில் மயங்கி அவனைக் காதலிப்பதாகவுமே சித்தரிக்கப்படுகிறது. இதைப் பார்க்கும் இளையதலைமுறையினர் நாயகனின் செய்கைகளை தாங்களும் செய்ய முற்படுகினர்.

கல்வி நிறுவனங்கள் இதை பிரச்னையாக அணுகும் போது பெண்கள் மீது உடைக்கட்டுப்பாடு விதிப்பது ஆண்களும் பெண்களும் கல்லுரி வளாகத்தில் ஒருவருக்கொருவர் பேசக்கூடாது போன்ற விதிகளை உருவாக்கி பிரச்னையின் ஆணிவேரை அணுகாமல் திசைதிருப்பி விடுகின்றனர். பெண்ணுடைய உடை ஆணின் கவனத்தை திசை திருப்பும்- அதனால் அவன் ஈவ்டீசிங் செய்ய முற்படுகிறான் என்ற கூற்று ஆணாதிக்க சிந்தனையில் ஊறித்திளைத்த சிந்தனையேயன்றி வேறென்ன.

மனமாற்றம் தேவை
மாணவர்களிடம் பெண்ணை சக மனுஷியாக பார்க்கும் மனோபாவத்தை வளர்த்தெடுப்பதைப் பற்றிய சிந்தனைகளே இன்றைய சமூக அமைப்பில் இல்லை. அறிவுரைகளை பெண்களை நோக்கி அள்ளி வீசியபடியே இருக்கும் இந்த சமூகம் ஆணை நோக்கி “பெண் உன்னுடைய தோழமைக்கு உரியவள்.இந்த சமுதாயம் ஆணும் பெண்ணும் இணைந்து அன்பால் உருவாக்கியது. உன்னுடைய அத்துமீறிய செய்கைகள் பெண்ணின் உணர்வுகளை காயப்படுத்தும்” என்பதை எப்பொழுதாவது எந்த வடிவத்திலாவது சொன்னதுண்டா சின்னஞ்சிறு வயதில் சிறுவர் சிறுமியராக கலந்து விளையாடியதைத் தவிர பெண்ணின் தோழமையை ஒரு ஆண் உணர்வதற்கான வாய்ப்பே கிடைப்பதில்லை. பெண்ணை ஒரு நுகர்ச்சிப் பொருளாக காட்டுவதிலும் திருமண உறவுகள் குறித்த கேலிப் பேச்சுகளை உருவாக்குவதிலும் குடும்பங்கள் பெரும் பங்காற்றுகின்றன. ஆண் பெண் நட்பு என்பது இயல்பானதாக அமைவதற்கு நம்முடைய சமூக அமைப்பு இடம் கொடுப்பதில்லை.

பெண்ணை உடைமைப் பொருளாக பார்க்கும் மனோபாவம் குடும்பம் சமூகம் மற்றும் ஊடகங்களினால் ஆணின் மனதில் ஏற்பட்டு விடுகிறது. அலுவலகங்களிலோ கல்வி நிறுவனங்களிலோ பெண் தன்னுடைய திறமையின் காரணமாக ஆணை முந்துகின்ற சந்தர்ப்பங்களிலும் கூட “என்ன தான் இருந்தாலும் பொம்பள பொம்பள தான் “ என்று தமிழ்த்திரைப்பட நாயகர்களின் வசனம் பலருடைய மனதில் ஒலிக்க ஆரம்பிக்கிறது. பெண்ணாய் அவளை எப்படி காயப்படுத்தலாம் என்கிற திட்டமிடலை நோக்கி அவனுடைய மனம் நகர்ந்து விடுகிறது. அப்படி அவளை சீண்டும் போது பல பெண்கள் அதை எதிர்த்து நிற்காமல் முடங்கி விடுகிற சந்தர்ப்பங்கள் அனேகம். இதை எப்படி தவிர்ப்பது

சமூகப் பிரச்னையே
ஈவ்டீசிங் ஒரு சமூகப் பிரச்னை என்பது உணரப்பட வேண்டும். பாடத்திட்டங்களில் மனித மாண்புகளையும் சமூக ஒழுக்கங்களையும் பற்றிய பாடங்களை இணைக்க வேண்டும். பெண்ணிய சிந்தனையுடன் கூடிய பாடங்களை வடிவமைக்க வேண்டும். இந்த சமூகத்தில் எல்லா உரிமைகளும் உணர்வுகளும் உள்ள பிரiஜ தான் பெண் என்கிற எண்ணத்தை அனைவரின் மனதிலும் ஏற்படுத்த இது வழிவகுக்கும். சரிகாஷா வழக்கில் 10 ஆண்டுகள் கழித்து தான் தண்டனை உறுதிப்படுத்தப்பட்டு தீர்ப்பு வெளியாகியுள்ளது. தேசத்தின் கவனத்தையே ஈர்த்த வழக்கிலே கூட இது தான் நிலை எனும் போது வழக்காக பதிவு செய்யப்படாத சம்பவங்களின் நிலை என்னவாக இருக்க முடியும். தனிப்பட்ட ஆணின் வக்கிர உணர்வுகள் இத்தகைய சம்பவங்களுக்கு காரணமாக இருந்தாலும் ஒட்டு மொத்த சமூகத்தின் மனோபாவத்தை மாற்ற வேண்டிய கடமையும் நம்முன் உள்ளது என்பதை நாம் உணர வேண்டும். சில அமைப்புகளின் சார்பில் ஜுலை 25 பெண் சீண்டல் எதிர்ப்பு நாளாக அனுசரிக்கப்பட்டு விழிப்புணர்வு கருத்தரங்கள் நடத்துவது உறுதிமொழிகளை ஏற்பது பேரணிகளை நடத்துவது போன்ற நிகழ்ச்சிகளை ஏற்பாடு செய்கின்றனர். இத்தகைய இயக்கங்கள் பரவலாக்கப்பட வேண்டும். ஈவ்டீசிங் இல்லாத தோழமை உணர்வுடன் கூடிய சமுதாயம் உருவாக வேண்டும் என்பவே அனைவரின் விருப்பம்.

பெண்ணியத்திற்காக றஞ்சனி

5 comments:

Anonymous said...

This article on 'eve teasing" is really nice - a simple presentation at that. One indulging in eve teasing would generally be a sadist in other respects too. He would almost be the same towards his own gender. Unless a man has the vicarious feeling of a high degree i.e. empathy, he cannot appreciate the feelings expressed here in this article. It is unfortunate that the media very much lacks in creating such a frame of mind among its clientele.

Anonymous said...

Article is good. But this name of web site itself prevents men to read this one. That is the harsh reality of our society. Political will is necessary on the part of not only the ruling establishments but also among the every organisations functioning for the betterment of society.

Anonymous said...

An excellent article!!!The aspects of eve teasing have been well depicted in this article.As rightly pointed out by the author,the fact that eve teasing can be prevented by combined efforts from women as well as men is the need of the hour.

Anonymous said...

Dear friends,

thanks for posting your valuable comments...

ranjani

sathish said...

really a good article. u had a more valuable point but u also done a same mistake i.e u never gave a solution u just told u'r view and suggestion...

Post a Comment

பெண்ணியம் vimeo சேனல்

பெண் நிலை - வீடியோக்கள்