/* up Facebook

Jul 23, 2010

ஆமென்...மெய்யாகவே நான் உங்களுக்குச் சொல்கிறேன் - கொற்றவை


பாவிகளின் வீதியில்
தனக்கான வெளித்தேடி
குதம் சிறுத்தைலைகிறது மன்னிப்பெனுமொரு சொல்

பாலைவனத்தில் நீர் கண்ட பறவையின்
வேட்கையுடன்
என்
மென்னிதயமதைப் பற்றியே தீருவேன் என நெருங்க
தன்னலமெனும் தோலை அதனுடலில்
தேமலெனக் காண்பித்தேன்

கண் பார்த்து காதலுடன் முத்தம் ஈனும்
கணவனை
பேரதிர்ச்சியுடன் வியக்கும்
மனைவி போல்
விழிகள் விரித்தது அச்சொல்

அதனர்த்தங்களில் மறைந்துள்ள
பெருந்தன்மையெனும் திரவத்தை பீய்ச்சி
குற்றவுணர்வுகளை சமைத்ததனை
நுகரச்செய்தேன்

பற்றியிருக்கும் நாற்காலியையும்
கிரீடத்தையும் விட்டெறியுமாறு
கட்டளை வீச

பிச்சையென
சொற்கள் வாங்கி
சுற்றிக்கொண்ட வார்த்தைகளின் துர்நாற்றம்
காற்றை விஷமாக்கிக் கிழிக்கிறது

யூதாசின் முத்தம்
பிலாத்தின் கைகள்
உங்கள் மன்னிப்பு

நன்றி - லும்பினி

1 comments:

எட்வின் said...

//பிச்சையென
சொற்கள் வாங்கி
சுற்றிக்கொண்ட வார்த்தைகளின் துர்நாற்றம்
காற்றை விஷமாக்கிக் கிழிக்கிறது//

அருமைங்க. துரோகம் மன்னிக்கப்பட்டாலும் மறக்கப்படுமா?!

Post a Comment

பெண்ணியம் vimeo சேனல்

பெண் நிலை - வீடியோக்கள்