/* up Facebook

Mar 8, 2010

சமவுரிமை சமவாய்ப்பு அனைவருக்கும் உயர்வு -தில்லை


மார்ச் 8 - சர்வதேச பெண்கள் தின நினைவாக
2010 ஆண்டின் சர்வதேச பெண்கள் தினத்தின் பிரதான தொனிப்பொருளாக சமவுரிமை, சமவாய்ப்பு மற்றும் அனைவருக்கும் உயர்வு என்பதனை ஜக்கிய நாடுகள் சபை அறிவித்துள்ளது. இதனை முன்னுதாரணமாக கொண்டு சமூகத்தில் பெண்களை ஒன்றிணைப்பதும் சமூக, பொருளாதார ரீதியாக பெண்களை விரைவாகவும் இலகுவாகவும் பலம் பெறச்செய்வதும் அவசியமானதாகும். சமூகமேம்பாட்டுத்திட்டங்களில் பெண்களின் அதிகளவான பங்கேற்றலையும், பதவிகளையும் வலியுறுத்துவதோடு பாராம்பரிய எண்ணக்கருக்களில் இருந்து பெண்கள் சிந்தனைத் தெளிவு பெறக்கூடிய புரிந்துணர்வை ஏற்படுத்துவதும் அவசியமாகும்.

சமூக மேம்பாட்டுத்திட்டமிடல் முறைமைகளில் ஆண்களின் விகிதாசாரத்திற்கு ஏற்ப பெண்களும் பங்குபற்றுவதற்கான வாய்ப்புக்கள் வழங்கப்படுவதோடு பெண்கள் பங்காளிகள் ஆவதற்கும் ஆக்கபூர்வமான நடவடிக்கைகள் மேற்கொள்ளப்படவேண்டும். சமூகமேம்பாட்டு நிறுவனங்களின் அபிவிருத்தி திட்டமிடல் முறைமைகளில் ஆண்களைப் போன்று பெண்களும் சம அளவான அங்கீகாரம் பெறக்கூடிய வாய்ப்புக்களையும் வளப்பகிர்வினையும் வழங்கும் மனநிலை ஆண்நிலைப்பட்டசமூகத்திடம் உருவாகவேண்டும்.

மனிதகுல வரலாறு என்பது பல்வேறுபட்ட தத்துவ, கருத்தியல் வளர்ச்சிப்போக்கையும், வளர்ச்சிக்காலகட்டங்களையும் கடந்து வந்திருக்கிற போதும் வரலாறு முழுவதும் அதிகாரத்துவ படிமங்களையும் உட்கொண்டுதான் அது வந்து சேர்ந்திருக்கிறது. மனித நாகரிகத்துக்கான தத்துவங்களும் கூட அதிகாரத்துவத்தை தக்கவைப்பதற்கும் அதேவேளை அதனை மறுப்பதற்குமான தத்துவங்களும் கூடவே போராட்டங்களும், நடைமுறைகளையும் கடந்து வந்திருக்கிறது. ஆனால் பெண்களின் மீதான அதிகாரத்துவத்திற்கும் அடிமைத்துவத்திற்கும் இவை எல்லாவற்றிலும் இடம் இருந்திருக்கிறது. வரலாறு முழுவதுமே பெண்களின் மீதான அடக்குமுறையைப் பாதுகாக்கின்ற மரபு ஏற்றுக்கொள்ளப்பட்டதாகவே இருந்துவந்திருக்கிறது.

பெண்களின் மீதான அனைத்துவித உரிமை மறுப்புகளும், அடக்குமுறைகளும், பாரபட்சங்களும் சமய, கலாசார, பண்பாட்டின் பேரால் நியாயப்படுத்தப்பட்டு வந்திருக்கிறது.

பெண்களின் மீதான பிரச்சினைகளை தனித்து அடையாளம் கண்டு அதற்கான கருத்துருவாக்கம் கண்டடையப்பட்டது சமீப நூற்றாண்டுகளில் தான்.
பெண்கள் தம்மீதான பாரபட்சங்களை எதிர்த்து குரல் கொடுக்கவும், தமது பிரச்சினையானது தனித்தது, உலகளாவியது, உலக சனத்தொகையில் சரிபாதியினரது என்பதை எடுத்துக்கூறினர். வீதியிலிறங்கினர், நிறுவனமயப்பட்டனர். அந்த வகையில் சர்வதேச பெண்கள் தினம் இன்று உலகலாவிய ரீதியில் பெண்களின் எழுச்சி நாளாக ஆகிவிட்டிருக்கிறது.

பெண்கள் தமது உரிமைகளைப் பெறுவதற்குச் சமூகமேம்பாட்டுத் திட்டமிடலில் சமவாய்ப்பையும் நாட்டின் அபிவிருத்தியில் சாதகமான பலனைப்பெறவேண்டும். சுமூகமான, ஆரோக்கியமான, பெண்களுக்கெதிரான வன்முறைகளற்ற தீர்மானங்களை எடுப்பதற்கு பெண்கள் சகல மட்டங்களிலும் வாய்ப்புக்களை ஏற்படுத்திக் கொள்ளவேண்டும். பழம்பெரும் வழக்காறுகளை உடைத்துதெறிந்து பெண்களின் பிரச்சினைகளுக்குப் பெண்களே முன்னின்று வெளியில் வந்து போராட வேண்டும்.

பெண்கள் தமது கருத்துக்களைச் சுதந்திரமாகச் சொல்வதற்கும் உணர்வுகளை வெளிப்படுத்துவதற்கும் உரித்துடையவர்கள். தமது சமூகத்திற்குப் பொருத்தமான மேம்பாடான கல்வியை வடிவமைப்பதற்கும் தகுதியுடையவர்கள். பொருளாதார நடவடிக்கைகளில் ஈடுபடுவதற்கும், சொத்துரிமை மற்றும் தமக்கு விருப்பமான தொழிற்துறையைத் தெரிவு செய்வதற்கும் உரிமையுடையவர்கள். பெண்களே சுயமாகச் சிந்திக்கவும் முடிவெடுக்கவும், தீர்மானங்களை நிறைவேற்றுவதற்கும் முன்வரவேண்டும்.

எந்தவொரு சமுதாயத்தின் எழுச்சிக்கும் வளர்ச்சிக்கும் பெண்களின் பங்களிப்பு அவசியமானதும் அடிப்படையானதுமாகும். ஆண், பெண் சமத்துவம் தொடர்பான கருத்துருவாக்கம் வளர்வதற்கும் எமது சமூகத்திற்குப் பொருத்தமான மேம்பாட்டு நடவடிக்கைகளை மேற்கொள்வதற்கும் விழிப்புணர்வும், சுயதிறன் விருத்தியும், பெண்களுக்கு ஏற்படுத்தப்பட வேண்டும். பொருளாதார நடவடிக்கைகளில் பெண்கள் ஈடுபாடுகாட்டுவதோடு சர்வதேச வியாபார நடவடிக்கைகளில் பெண்களும் பங்குபெறவேண்டும்.

கிராமியப்பொருளாதார நடவடிக்கைகளில் பெண்களை ஒன்றிணைப்பதற்கும் அபிவிருத்தி திட்டமிடல் முறைமைகளில் பெண்களின் பங்கேற்றலைத் துரிதப்படுத்துவதற்கும் ஆற்றலும் ஆளுமையும் கொண்டவர்கள் முன்வரவேண்டும். சமூகத்தில் பெண்கள் பலம் பெற வேண்டுமெனில் அவர்களின் ஆற்றல்கள் மழுங்கடிக்கப்படாது ஆரோக்கியமான, உழைப்பைச் சுரண்டாத திட்டமிடல் வழிமுறைகளில் பெண்களும் உள்வாங்கப்படவேண்டும். அபிவிருத்தி வேலைகள் முன்னெடுக்கப்படும்போது அதில் பெண்களின் அங்கத்துவமும் சம அளவில் இடம்பெற வேண்டும். எமது சமூகம் மீளுருவாக்கம் பெறுவதற்கு பெண்களின் கருத்துருவாக்கம் வளரவேண்டும்.

பெண்களின் உரிமை மறுப்புக்கள் காலம் காலமாகத் தொடாந்தவண்ணமேயுள்ளது. இவை பல்வேறு ஆதிக்க கருத்துக்களால் நியாப்படுத்தப்பட்டும் வந்துள்ளது. இவ்வாறான நியாயப்படுத்தல்களைக் எதிர்த்துப் பெண்கள் குரல் கொடுக்கத் தொடங்கியுள்ளோம்.

பெண்களையும் ஆண்களையும் ஒன்றிணைக்கும் சமூகமேம்பாட்டு வேலைத்திட்டங்களை உருவாக்குவதோடு அதிகளவான பெண்களின் பங்குபற்றுதலையும் பங்களிப்பைப்பையும் பெறுவதற்கான வாய்ப்புக்கள் அதிகரிக்கப்படவேண்டும். கடந்தகாலங்களில் சமூகமேம்பாட்டு அமைப்புக்கள் தூண்டுதல் அளித்தபோதிலும் அது வரையறுக்கப்பட்ட வெற்றியையே தந்துள்ளது. பெண்களின் மனங்களில் கருத்தியல் ரீதியான சிந்தனை மாற்றத்தை ஏற்படுத்துவதோடு மரபு ரீதியான சிறுமைப்படுத்தலை ஆண்கள் கைவிடவேண்டும்.

சமவாய்ப்பும் சமவுரிமையுமே உண்மையான விடுதலைக்கு இட்டுச்செல்லுமெனில் ஆண்களும் பெண்களும் சமூக, பொருளாதார, அரசியல், சட்ட, நீதி, நிர்வாகம், போன்றவற்றில் சம அளவில் பங்கேற்கவேண்டும். இதற்கூடாகவே ஆதிக்கக்கட்டுமானங்களில் இருந்து அனைவரும் உயர்வு பெறமுடியும்.

பெண்கள் உடல், உள ரீதியாக வலுப்பெறுவதோடு ஆளுமைகளை வளர்த்துக் கொள்வதற்கூடாகவே ஆண்களோடு சமஅளவில் பங்குபற்ற முடியும்.

ஆண்களும் பெண்களும் பக்கபலமாகவும் பரஸ்பரம் உந்து சக்தியாகவும் இருப்பதற்கூடாகவே சமூக விடுதலையை வென்றெடுக்கமுடியும். ஆண் பெண் இருபாலாரின் முழுமையான அர்ப்பணிப்பே விடுதலையைப் பெற்றுத்தரும். எனவே பெண்கள் முழுமையான பெண் விடுதலையைப் பெற முன்னின்று உழைப்பதோடு சமூகவிடுதலைக்கும் உழைப்பதற்கூடாகவே தேசவிடுதலையையும் பெண் விடுதலையையும் வென்றெடுக்கலாம். மானிட விடுதலையும் இதிலேயே தங்கியுள்ளது.

எது எவ்வாறு இருப்பினும் பெண்கள் தமது உரிமை மறுப்புக்கள் தொடர்பாக சர்வதேச அளவில் அரசியல் நிலைப்பட்ட செயற்பாடுகளையும் கோரிக்கைகளையும் முன்வைத்து வருகின்றனர். இருந்தும் பெண்களுக்கெதிரான வன்முறைகள் இன்னும் குறைந்தபாடில்லை. சமூகத்தில் சகல ஒடுக்குதல்களுக்கும் உட்பட்ட பெண்கள் வெளியில் வந்து சமவுரிமை, சமவாய்ப்பை பெற சமூக அபிவிருத்தியில் ஒன்றிணையவேண்டும். சமூக மேம்பாட்டு உருவாக்கத்தில் பெண்களும் ஆண்களும் ஒருங்கிணைந்து செயற்பட்டால் மாத்திரமே சுதந்திரமான பெண் விடுதலையையும், ஆரோக்கியமான சமூக விடுதலையையும் வென்றெடுக்க முடியும்.

0 comments:

Post a Comment

பெண்ணியம் vimeo சேனல்

பெண் நிலை - வீடியோக்கள்